Espublizáu'l 25 d'Avientu de 2018 por Llar -> 867 km na categoría Les mios caxigalines
Los comentarios tan zarraos en Un sábadu al añu n’Asturies
Ye sábadu y la cai del to barriu ta enllena xente. Ves a un par de compañeros del cole, qu’hai polo menos trés millones d’años que nun víes, faciendo cola nel supermercáu con cara de nun llevar tarxetina de puntos. Un café nel chigre -con lleche del tiempu y sacarina, ¿eh, nenu?- diz A., la rapaza d’El Franco. El Sporting xuega a les 13h. y l’Uviéu a les 16h. Ordenes la to vida pa esi día en función de lo que Tebas interpreta que ye meyor pal so negociu nel que’l fútbol ye namás una sida pa sacar perres.
A les 13h. hai cuatro o cinco cafés-llibrería -que tu sepas- nos qu’hai una sesión vermú con actuación en direuto. Vas a ún. Xaime Martínez presenta un discu llibru que se llama “Ósculos d’agua nel Imperiu Asturianu” y la estancia ta bastante enllena anque’l conciertu tea contraprogramando al equipu del pueblu. Ye’l discu del añu, anque saliere n’avientu. P. ta al to llau y tira de “Resultados Fútbol” cada poco pa ver cómo va’l so equipu porque la música ta mui bien pero nes coraes fierven los colores. Son les 15h. Decáteste de qu’agora a quien-y fierven ye a ti, porque tas na ciudá enemiga y el to equipu xuega en 60 minutos. Despídeste d’unos cuantos -cinco, seyes- colos que te tendría prestao quedar charrando tola tarde porque va tiempu que nun ves y porque viven fuera, como X. “Vémonos llueu, en conciertu”, diz. Marches pensando que les xeres a desendolcar van acumulándose.
Llegues al to llar futboleru. Al partíu vinieron munchos y munches que diba tiempu que nun atopabes ellí, como N. o E. Aporten cola cara ilusionada, como si fuere’l primer partíu del añu, anque seya’l caberu. Nótase que nun tán de ver el xuegu ramplón y que nun comparten la falta d’ilusión d’una parte de l’afición que tien pa sigo mesma que la temporada, tres ganar al eternu rival, yá escosó toles allegríes pa esti cursu. Presta hasta velos y veles, pola ilusión. Bon xuegu, un puntu, merecióse más. Ye lo de menos.
Al salir hai una mani. Son tiempos raros y toca defender la convivencia, les llibertaes básiques y defendese de los discursos del odiu y les fobies. Na marcha atopes a xente cola que diba muncho que nun falabes. Non, nun ye que tean descreyíes y descreyíos de les sos convicciones militantes. “Enteréme de qu’había esto y como llegué güei…Yá quedé coles amigues a esta hora pa venir toes xuntes” ye lo que te diz O. La marcha anima: visibilízase un discursu integrador, inclusivu y diversu metanes de la voráxine consumista. Pel camín, la mani crúzase con cargos públicos, responsables de les condiciones de vida materiales de les asturianes y asturianos, que van emburriando carros enllenos de comida de beneficencia pa los comedores que les sectes cristianes ponen como manera de paliar les consecuencies de les decisiones que los propios políticos qu’emburrien esos carros xeneren. Ye una situación kafkiana, como pa una espublización d’esa cuenta que ta nes redes col nome “Humans of Late Capitalism” que sorraya les contradicciones y absurdos d’un sistema socioeconómicu inxustu pa la inmensa mayoría de la población.
Son les 19.30h y hai qu’escoyer. N’Avilés hai una gala feminista-conciertu con Silvia Quesada, Marisa Valle Roso y Tania Pereira. N’Uviéu, l’auditoriu acueye un conciertu polos drechos humanos con Xuacu Amieva, Los Berrones, Muyeres y Tejedor. En Xixón, La Tarrancha aprovecha’l tirón d’estos díes –nun va ser l’únicu grupu que lo faiga- pa festexar 15 años d’andadura. Y llégate un mensaxe de M., otru emigráu qu’acaba llegar, y que si tomáis daqué nel Esper. Decídeste, por una cuestión de cercanía política y xeneracional, por dir a Xixón, anque les stories d’Instagram dexen nidio que delles de les tos amistaes fueron tamién a los otros eventos.
Hai quedada enantes, en Canteli. La sidrería ta enllena y atopes a xente que diba meses que nun víes, como a S., a S., a E. o a I. A estes altures del día, yá hai un nunsequé emocional qu’anda pasándote pela cabeza, ensin que-y deas mayor importancia pero que pasu ente pasu va ganando espaciu nel consciente. El conciertu, una fiesta. La sala, enllena. Y al finar, a Sesta, que tamién ta d’aniversariu y que ta tremao de xente pa la sesión post-conci con compañeres y compañeros charrando, chumando y baillando.
A la hora de marchar, cansáu, pal xergón, aquel nunsequé yá va tiempu que ye un doblepedal de hardcore. Nun hai dulda. La d’esti sábadu ye l’Asturies que nos robaron. La de la mocedá fuera. La de la ilusión y les idées anovadores qu’ufre siempre la xente más mozo. La de los seutores tradicionalmente más combativos qu’habríen valtar equí munches de les polítiques que nos conderguen al exiliu, a la diáspora y al malvivir.
Y, frente a esta Asturies, la que va votar en mayu. Yá sabéis: les conexones internacionales per aire y ALSA con Madrid, Barcelona, Londres, París o Berlín, tema d’estáu nel nuesu país. Anque seya namás pa tener a l’Asturies más dinámica a lo menos una selmana en casa.
Espublizáu'l 17 de Mayu de 2016 por Llar -> 867 km na categoría Les mios caxigalines
Los comentarios tan zarraos en La mio firma en Naguando na RPA
Esti día estrenéme en Naguando, un programa de la radio pública asturiana -y n’asturianu- nel que faigo una firma na que’l fútbol ye una sida qu’uso pa falar de coses más importantes. Podéis sentilo equí (dende’l minutu 3.50) o lleer l’artículu que vien de siguío.
Nun me gusten los partíos de sábadu, porque son la cuenta pa estropiar una nueche que suel ser de folixa. Quiero más dexar un posible disgustu futbolísticu, esi arder les coraes, pal domingu: el día que la selmana reserva pa la señaldá, les batamantes y los programes de psicofoníes falses. Pero yá sabéis, como dicía aquel históricu xugador veteranu: “Nun pasa nada, si ganamos: una pinta de cerveza. Y si perdemos dos”.
Esti sábadu l’equipu de la capital d’Asturies xugó escontra’l Mirandés una de les sos 5 finales y ganó. Ganó como tien que ganar un equipu que quier aspirar a tar ente los 6 primeros clasificaos que van lluchar pola gloria de la primer división: dando golpes certeros nel intre afayadizu y matando’l partíu a cibiellazos, con una actitú y control del tiempu que nun se-yos acolumbra a los nuesos lloñe del Tartiere dende va una temporadina.
El casu ye que’l sábadu munchos empobinámonos pa escontra’l nuevu Carlos Tartiere pasando al llau de Villa Madalena. Y ye qu’esta selmana n’Uviéu supimos que’l tribunal supremu fallare a la escontra del ayuntamientu, que va tener que pagar 32 millones d’€ más, hasta algamar unos 63 millones d’€, por un xalé-palaciu qu’en 1995 daquién albidró que sedría una residencia afayadiza pa los príncipes d’Asturies. Yeren otros tiempos, con más xente apostao nel Hotel de La Reconquista y menos xaréu republicanu na plaza de La Escandalera. El casu ye que los uvieínos y uvieínes vamos pagar -nesta xestión llaceriosa- unes cifres equivalentes a lo que’l Mónaco pagó al Atlético pol colombianu Radamel Falcao, o unos millones más de lo que’l Madrid pagó al Barcelona pol trésfuga futbolísticu Luis Figo o mas menos, lo que’l Nápoli recibió pol Uruguayu Edinson Cavani de les arques del PSG. Y desgraciadamente non, nengún xugador d’estos van venir nesta operación. Yá ye pena.
Siguimos falando de cracks futbolísticos, non de cracks económicos –que d’esos tenemos abondo n’Uviéu-: Ayer inaugurábase una cai na redolada del Tartiere, o “Tartier”, como inda diz la xente mayor, n’homenaxe a Isidro Lángara, delanteru icónicu del Real Oviedo nos años 30 y auténticu home récord del fútbol al que namás la guerra pudo quitá-y de ganar lo que tenía tola traza de ser el primer títulu de lliga pal equipu de la capital d’Asturies. Lángara ye l’únicu en consiguir 3 hat-tricks siguíos y cunta col meyor promediu de goles per partíu de la lliga -qu’inda nin Leo nin Cristiano fueron quién a valtar-. Un auténticu killer, de xú potente ya impecable remate de cabeza, lo mesmo n’Uviéu que nel so exiliu americanu (en México y na Arxentina) siendo’l primer pichichi de 3 lligues distintes. Un home qu’afuxó d’equí poles sos idées polítiques y que participaría nuna seleición vasca que daría la vuelta al mundu defendiendo la democracia republicana escontra’l réxime de Franco. Hasta venti familiares acabaron averándose a Uviéu ayer pal actu solemne cola inauguración de la primer placa n’asturianu y castellán del conceyu n’alcordanza d’ún d’esos héroes que, si tuviere nacío nesta dómina de fútbol global, sedría un auténticu fenómenu.
Semeya vía @puxapali.
Pero tornamos a los díes d’anguaño: a pensar nel partíu del domingu a les 19.15 n’Almería, énte un rival que ta en descensu y que xuega la vida nestos cuatro actos últimos de la lliga. Un partíu nel que los nuesos han dar un pasu alantre y reivindicase como candidatos al ascensu. Ye una oportunidá única de tornar a la ciudá y a esta masa social que s’esparde per milenta países al sitiu que-y correspuende por historia y polo que llucha por esti sentimientu.
Bona selmana, Carbayones. Y que nun vos siente mal el bollu preñáu del Martes de Campu nel Naranco, nel Pura Tomás, en Santuyano o nel Campillín. Que les sabéis toes.
N’Asturies nun queda naide. Dícenlo les últimes encuestes del Institutu Nacional d’Estadística (INE, 2015) pero les que resistimos (de momentu) perequí sabémoslo porque se ve nes estaciones de tren y d’ALSA. Tamién peles cais, pelos chigres, nos conciertos y nes manifestaciones.
Si hai dalgo que xunta a los pueblos del noroeste de la península, amás de rasgos culturales, históricos y llingüísticos propios, ye la emigración forciao de la población. Ye un fenómenu endémicu; sicasí, les cifres d’emigración fuera (y dientro) del estáu son llacerioses. Galiza, Asturies y Llión tienen ente’l 10 y el 27% del so censu eleutoral residiendo fuera del estáu español. Esto, ensin incluyir a les persones que viven fuera del estáu y nun lo declaren oficialmente y les que, de la mesma manera, son emigrantes dientro del estáu español y siguen computando como gallegues, asturianos y llioneses.
¿El resultáu? Un censu eleutoral nel nuesu país astur que rolda les 110.000 persones censaes acuyá de les llendes del país y fuera, tamién, del estáu español: un 11% sobre’l censu total. Una vergoña absoluta.
Pero, amás de producir mano d’obra formao qu’emigra a Madrid y Londres –como comentábemos nesti artículu d’esti mesmu blogue- nun ye lo único no que coincidimos los pueblos del noroeste de la Península Ibérica; nun ye lo único que carauteriza a los seutores productivos de la nuesa redolada. Tamién somos la pila llétrica del estáu, a cambiu de nada. Bono, sí: a cambiu de contaminación, esfarrape medioambiental y espoliu de los recursos naturales y la fuerza de trabayu del pueblu asturianu.
Pero ¿qué dicen los datos?
Nun dexen llugar a duldes: Asturies y Galiza son los principales noyos onde l’estáu español xenera lletricidá. Ensin embargo nun consumimos, nin de lloñe, lo que producimos. Pela contra, son Madrid, especialmente, y Barcelona los principales sumideros de lletricidá, una enerxía que ye llevao a les grandes capitales del estáu al traviés de llínies de Mui Alta Tensión. Los siguientes gráficos de xeneración llétrica y demanda del añu 2008 de Red Eléctrica Española indiquen bien gráficamente la situación na que nos atopamos.
Pero nun ye too: los datos del SADEI (Sociedá Asturiana d’Estudios Económicos ya Industriales) aporten muncha más información. Por exemplu, el gráficu producción llétrica-consumu d’embaxo, con una serie de 15 años (2000-2015) amuesa la variación de la producción añal de lletricidá nel nuesu país, al tiempu que vemos qu’en cásique tolos años esta foi muncho mayor que la demanda/consumu d’Asturies. Son especialmente sangrinos años como’l 2001-02, onde producimos más de 3,5 vegaes la enerxía demandao. Y esti mesmu añu, en plena crisis enerxética que caltién el consumu a pesar de lo precario de la economía del pueblu asturianu y la desllocalización d’empreses, Asturies produció 2.8 vegaes la enerxía que consumió.
Entós…¿cómo se produz la enerxía n’Asturies?
Llamamos “mix enerxéticu” a los estremaos medios de producción llétrica d’un país, anque ye verdá que la lletricidá nun ye tola enerxía qu’usamos: por exemplu, los coches, los autobuses, aviones y tantes otres máquines furrulen con petróleu qu’Asturies nun produz y nun tamos contabilizándolos.
Tornando a otres formes de producción, tenemos los saltos d’agua, que tenemos en cásique tolos ríos importantes del país con gran capacidá xeneradora. Supunxeron grandes estroces ambientales y hubo que lluchar va poco escontra otros banzaos qu’intenten ya intentarán siguir construyendo. Tamién tán los parques eólicos, la gran obsesión del PSOE-arecismu xunto colos ciclos combinaos que -gracies a tolos santos- nun vimos culminaos (¡hasta 10 proponíen!) por muncho que nos quede n’herencia la vergoña de la regasificadora de Xixón. Estos parques nun permiten caltener -per se- la tensión de la rede llétrica, pero sí permiten amenorgar el puxu de los grupos termollétricos baxando’l nivel d’actividá, y poro, d’emisiones, cuando tán funcionando.
Desgraciadamente, fueron usaos poles grandes empreses non como manera de contaminar menos, sinón d’afayase a les doctrines de la Unión Europea, qu’esixíen la producción d’un tantu por cientu n’enerxía renovable. ¿Abrir eólicos y trancar térmiques? Nun suena tan mal, ¿non?. Llaceriosamente, en cuenta de trancar plantes contaminantes la estratexa de les empreses foi sobreproducir en verde l’equivalente necesariu pa siguir calteniendo’l mesmu porcentaxe d’enerxía xenerao contaminante. ¿Chocante, non?
Sobra dicir que, tres de la privatización de la enerxía público, les empreses enerxétiques operantes nel estáu español y n’Asturies nun apararon de ganar y ganar a espuertes mentanto la capacidá del pueblu asturianu pa pagar les tarifes llétriques yera cada vegada menor, pasando frío y una crisis y probeza enerxética que ximielga les cases de les nueses ciudaes, villes y pueblos. Y xenera tamién contaminación: ¿ves esi puntín naranxa nel mapa de la drecha? Sí, saludái. Somos nós. Polución penriba’l llímite de la Unión Européa. L’únicu puntu del estáu español. ¡Puxa Asturies!
Producción de lletricidá y necesidaes sociales del pueblu asturianu
Énte esti panorama cabe entrugase delles cuestiones.
¿Cómo ye posible que’l pueblu asturianu, que vive nun país que llega a producir tanta lletricidá, pase frío y nun seya quién a xenerar emplegu de calidá col plus que da tener enerxía abondo?
¿Cómo ye posible que paguemos una de les tarifes más altes de la UE los asturianos y asturianes, cuando somos un país productor (y esportador) d’enerxía llétrica?
¿Daquién imaxinaría qu’en Venezuela, o en Texas, o n’Arabia, el petróleu fuere tan caru como n’Asturies? ¿Por qué la lluz n’Asturies se paga como si se truxere de lloñe cuando se xenera al pie de los nuesos pueblos?
¿Cómo ye posible qu’heba empreses privaes y públiques que xustifiquen los sos planes de pieslles “porque la enerxía ta caro” cuando sal a espuertes d’Asturies?
¿Cómo ye que tenemos qu’aguantar les consecuencies de la (sobre)producción -contaminación, enfermedaes respiratories, llínies de Mui Alta Tensión-, tarifes llétriques abusives y lucru pa empreses privaes mentanto vivimos arrodiaos de megavatios saliendo en direición Madrid?
Toes estes entrugues llévennos a custionanos munches coses:
La enerxía debiere tar al serviciu de los intereses de los pueblos, non de los oligopolios, nin de les empreses, nin del porgüeyu priváu, nin de los intereses de clas d’unes naciones sobre los recursos d’otres. Por embargu, l’estáu español considera qu’Asturies, como Galiza, ha ser la pila enerxética del estáu porque-y convién a la so oligarquía, al marxe de les necesidaes sociales y productives del pueblu asturianu, claramente sobrepasaes pol modelu impuestu como “de progresu y de futuru”.
Cuando pagamos la tarifa de la lluz, abonamos un 45% de costes de producción y un 55% de los denomaos “peaxes”. Estos peaxes que se nos imponen a les asturianes y asturianos, como si truxéremos la lluz de la Patagonia y non de Lada, de La Ribera, de Grandas de Salime, de La Perea o de Soutu la Barca son vergoñosos dafechu y humíldennos como pueblu; un pueblu que careció expropiaciones forzoses de tierres y pueblos enteros pa facer saltos d’agua, que respira sulfuros, óxidos de nitróxenu y partícules sólides, que ve estrozaos los montes con parques eólicos y llínies d’alta tensión…y que lleva tolo malo ensin nenguna contraprestación, obligándolu a emigrar al desllocalizase la producción industrial pola poca “competitividá llaboral y enerxética”.
El nuesu pueblu, amás, vió cómo se desfacía un seutor productivu como’l de la minería que podría asegurar la soberanía llétrica d’anguaño en transición a un modelu de soberanía enerxéticu plenu, más llimpiu, con decrecimientu -p’asegurar la sobrevivencia del planeta- y que permitiere la vuelta de la siderurxa y metalurxa y otros seutores de producción, investigación y manufacturación, esgonciaos pol timu de la reconversión del SOMA-FIA-UGT-FSA-PSOE que nos conderga al paru, el malvivir y la emigración forciao.
Paez evidente que, nel procesu imprescindible de recuperar el control social dafechu sobre’l seutor enerxéticu en manes de la UE y Madrid, la existencia d’una tarifa llétrica asturiana pue ser una manera de dir dando pasinos haza la recuperación de les condiciones de vida de les asturianes y asturianos, asegurando que nenguna casa del nuesu país quede nesa probeza enerxética que ye especialmente dura nestos meses del iviernu. Amás, esa tarifa llétrica asturiana vendría a tar xustificada pola delda histórica que pa con Asturies se tien dende l’estáu como paraísu productor de la lletricidá que se consume más alló de les nueses llendes. Yá hai xente esixéndola, por cierto, en Galiza. Y resulta normal y de sentíu común.
Per último, y non menos importante, nun ta de más recordar que cuando la oligarquía d’una metrópoli arrampuña la materia prima y/o la fuercia productiva d’otru llugar alloñáu pa sacá-y provechu mentanto nun se xenera riqueza n’aquel sitiu, condergando a la población d’esi llugar a la emigración, a la probeza y a ver cómo se-y espolien les sos materies primes y la fuerza de trabayu, tamos dando vueltes al conceutu de co-lo-nia-lis-mu.
Dicen, y repiten de memoria, una y otra vegada les muyeres y homes de los pueblos indíxenes d’América que la tierra, como l’agua, l’aire o la lluz del sol son dones de la Madre Tierra y, poro, nun puen ser oxetu de comerciu. Nin se puen mercar nin se puen vender.
N’Asturies llevamos demasiáu tiempu regalándo-yos a los poderosos les nuestres vides y los nuestros recursos, pero cásique naide lo denuncia. Unes vides y unos recursos que salen per cables d’aceru y aluminiu y n’autocares d’ALSA de camín, too ello y con suerte, pa Madrid.
Espublizáu'l 10 de Setiembre de 2015 por Llar -> 867 km na categoría Analís políticu
Los comentarios tan zarraos en ¿Qué se ta xugando Catalunya y los pueblos del estáu’l 27-S?
Esti articulín surde, como tantes vegaes, tres d’un alderique peles redes sociales. Con motivu de la celebración del 8 de setiembre, día oficial d’Asturies -otru día falamos d’esto y sobre cómo se podría reinterpretar la data en cuestión-, Podemos entamó una folixa en Xixón cola presencia de Juan Carlos Monedero, una de les trés cabeces más visibles del partíu y otros cargos electos asturianos. L’actu, con bien de xente, foi cubiertu pola prensa asturiana, siendo les pallabres del políticu madrilanu les que coparon la información, lo que podría ser constitutivo d’análisis per si mesmo -con unos medios provincianos dafechu- y de cómo informen sobre un supuestu Día [nacional] d’Asturies, seique tamién de la inxenuidá de la organización, que vió como les sos figures mediátiques n’Asturies quedaben nun segundu planu clisaes pola figura del profesor de la Complutense.
Les declaraciones de Monedero, autor d’otres cites clásiques yá como “empezar de cero en Catalunya no es posible porque llevamos más de cinco siglos juntos” o “la independencia es un sueño irreal”, al que se-y atribúi una militancia “antinacionalista” (ergo, probablemente mui averada a lo qu’en munches ocasiones nel nuesu contestu acaba siendo ser nacionalista español) con proclames del estilu “el nacionalismo [periféricu], esa patraña de Braveheart”, permítenos introducir y poner en contestu la celebración d’unes plebiscitaries catalanes esti 27-S, analizar les postures que se tán dando na so organización y/o que s’habríen de tener dende postures soberanistes y, tamién, democrátiques.
El choque de trenes nacionalistes que nun lo ye
Aldericaba sobre estes coses nun filu d’una rede social con un compañeru adscritu al asturianismu cultural y políticu, que ta na órbita de Podemos n’Asturies, y qu’interpretaba les pallabres de Juan Carlos Monedero en clave federalista cuando definía Asturies “como una comunidá que defendía la so propia identidá ensin necesidá de contraponela a la realidá plural d’esti estáu” nun momentu de “choque de trenes nacionalistes”.
Veníenme entós, a mi, delles considerances que podríen valir p’abrir un alderique dende postures non sucursalistes sobre les estratexes que se tán dando dende la formación morada énte les eleiciones catalanes.
En primer llugar, en Catalunya paezme custionable esa defincion del choque de trenes nacionalistes. Esi discursu, tan de tertulia de radio estatal, vien a igualar a soberanistes y unionistes como una suerte d’estremos que se toquen: la eterna frase fecha. Si hai un choque de trenes, esti ye ente demócrates -los que tán a favor de que’l pueblu catalán decida’l so futuru- y antidemócrates -que non, y que nun quier siquiera que se fale d’ello-. Yá se sabe, lo que se llama igual, al final “ye igual”. Y dende llueu que nun lo ye.
L’Asturies “segura de sigo mesma”
En segundu llugar, per muncho que-y convenga dicilo a Monedero, Asturies nun defende la so identidá de nenguna de les maneres. Nin contraponiéndola nin nun la contraponiendo a una más que discutible ¿”identidá española”?. ¿De qué? ¡Si precisamente lo que vivimos n’Asturies ye un procesu de sostitución/imposición cultural evidente onde una identidá tien tol prestixu social ganáu mentanto la otra ye obligada a ser subsidiaria per aciu de mitos fundacionales como’l cuadonguismu y el ser “la cuna de España”!. ¿Ónde convive n’harmonía la identidá asturiana y española? ¿Na escuela? ¿Na televisión? ¿Nes instituciones? ¿Nes fiestes? ¿Nos periódicos? Non. Nun tracamundiemos la non capacidá eleutoral o social p’afondar nes contradicciones obvies ente lo asturiano y lo tradicionalmente entendío como “typical spanish” con vivir un status d’igualdá o confort identitariu que nun existe o, que si existe, ye como aquella “paz de los cementerios”.
L’actitú de la cúpula de Podemos -ergo del partíu- ye la típica d’organizaciones de calter estatal que, precisamente, nos sitios onde hai un fondu sentimientu nacional averen el so discursu a posiciones federalistes. Mentanto, en sitios onde non, nun se fai trabayu de base. Llevamos viviéndolo n’Asturies milenta años: onde’l PSOE defende que Catalunya ye una nación, equí, la FSA una “región”; onde’l PSOE usa’l galego ensin complexos, equí, refuga los derechos llingüísticos. Nun existe en Podemos un análisis de la custión nacional rigurosu en términos políticos. Nun s’interpreta l’estáu como una cárcele o, si queremos dulcificalo, una federación de pueblos qu’han d’emponderase, empoderase y ser conscientes de selo pa, dende la propia soberanía, construyir un proyeutu en común. Ehí tenemos lo federalizante de les sos primaries de circunscripción única o cómo los estatutos de la organización torguen dafechu la capacidá de decidir de lo que se da en llamar “territorios”, como si fueren poco más qu’una seición de “bluyíns” d’El Corte Inglés. Non, nun se ye quién a ver en Podemos nin en Monedero nengún discursu federalizante. Non más que como coartada pa disimular un patriotismu español “nes trés naciones oficiales, Catalunya, País Vascu y Galiza” del que s’echa mano pa desendolcar una estratexa (en terminoloxía estrictamente política) populista.
Podemos, les catalanes y l’últimu cartuchu na recámara del unionismu
Les compañeres y compañeros que militen na mesma organización que Monedero y que tienen concencia social y nacional -que ye evidente que les hai, y non poques-, han saber que la campaña que se ta desendolcando en Catalunya con motivu del 27S ta siendo de les más puerques que se tien visto n’años.
Dízse per activa y per pasiva que los del sí y los del non son Mas y Rajoy respeutivamente, cuando’l procesu ye de lo más plural y sociolóxicamente muncho más progresista de lo que se tresmite fuera de la propia Catalunya (y pa muestra ehí tán los datos del CEO catalán) y muncho más, por supuesto, que l’unionismu, clarísimamente escoráu a la derecha y a la defensa del réxime y la monarquía. Acúsase al soberanismu de ser corruptu, como si l’unionismu nun lo fuere y como si los corruptos nun acabaren de llegar a posiciones independentistes arrastraos pola mareona social que los obligó a nun quedar n’orsai. ¿Cuándo tuvo pol derechu a decidir una CiU que siempre foi muleta de los gobiernos del PSOE y PP? Mas, ¿va per delantre o per detrás de la sociedá civil organizada?.
Per último, ye evidente que la independencia del Principat sedría’l mayor cambiu nel estáu español en sieglos qu’arreyaría un efeutu en cadena que nun sabemos en qué midida podría afeutar en positivo (o en negativo) a Asturies. Dependerá de les dinámiques que se dean nel nuesu país, en cualquier casu.
Mentanto, Podemos ye -consciente o inconscientemente- ún de los pocos actores políticos útiles que-y queda na recámara al estáu pa torgar la independencia tres del fracasu absolutu del PPSOE en Catalunya. Actúese, si se tien conciencia social y nacional, y si se ye verdaderamente internacionalista, en consecuencia dende Asturies. Actúese, tamién, estratéxica y táuticamente sofitando a les organizaciones y persones que lluchen pola soberanía popular y la tresformación social frente a les que la quieren subordinar los procesos constituyentes a lo que pase en Madrid. Recordemos qu’España, como réxime políticu, aguántalo too…Repúbliques, monarquíes, dictadures, “democracies” gobernaes por partíos más o menos lliberales. Too menos la desintegración. Que-y lo entruguen a Portugal.
Asturies y l’asturianismu que precisa esti país siempre llega tarde a toles cites, que nos garren toes al trespié. Entamemos a organizanos pa facenos respetar como pueblu, como dicía un compañeru esti 8 de setiembre n’Uviéu, tres de les esperiencies d’otros momentos constituyentes pasaos que nun llegaron a cristalizar n’Asturies en dalgo granible.
Dicía Eduardo Galeano n’aquel cuentu que la utopía val pa siguir caleyando. Caleyemos, entós. Al nuesu ritmu, cola nuesa realidá que nun ye nin la catalana nin la vasca, pero ensin complexos. Reivindicando soberaníes parciales (enerxética, alimentaria, de la mocedá, de les muyeres…) pa dirixir les nueses vides como nos pruya. Dafechu. P’atopar el nuesu encaxe nun mundu xustu. Nun hemos retrasar más l’articulación de discursos y esfuerzos nel sen de da-y viabilidá a una Asturies que se gobierne a sigo mesma, por y pal pueblu. Una Asturies na que pague la pena vivir.
Espublizáu'l 20 de Xunetu de 2015 por Llar -> 867 km na categoría Analís políticu
Los comentarios tan zarraos en Esquierda soberanista asturiana: ¿Qué facer? Autocrítica, autocrítica, altor de mires y más autocrítica.
Ye evidente que vivimos un momentu de convulsión política n’Asturies y na coxuntura europea. El ciclu de lluches que surdía tres del crack -endémicu, propiu del sistema de producción capitalista- del añu 2008 vien camudando nel nuesu ámbitu nel últimu añu y mediu. Lo que fuere una presencia permanente de movilizaciones nes cais del país tornóse en dinámiques puramente eleutoralistes -davezu domesticaes y descafeinaes- cola vista puesta nes convocatories d’eleiciones europées, conceyiles y a la Xunta Xeneral. Por embargu, desgraciadamente, estos comicios nun supunxeron nin de cerca la derrota del neolliberalismu nin una concienciación masiva de la población na necesidá de superar el modelu social y económicu nel que vivimos. Anguaño, per otru llau, tamos metanes de la resaca braniega que dexa’l güelpe de realidá que pa munchos suponxo’l fracasu de la vía Syriza nel so enfotu por reformar una UE que nun nació pa ser una Europa de los Pueblos, sinón como proyeutu de les oligarquíes de los estaos europeos. Tamién tamos, agora, a les puertes d’unes eleiciones estatales que prometen ser les más interesantes de los últimos años y que, xunto a la convocatoria d’eleiciones catalanes, van configurar el tableru de xuegu que nos va tocar vivir en 2016.
Sintomatoloxía y diagnósticu
Sicasí, analizando la situación dende un puntu de vista soberanista, la situación ye mui probetaya nel nuesu contestu. Vivimos una dómina especialmente complexa pa lo que podemos dar en llamar “nacionalismu asturianu d’izquierda”, “izquierda soberanista asturiana” o “asturianismu d’izquierdes”, precisamente nestos meses nos que se cumplieren 40 años de la fundación de Conceyu Bable. Anque bien ye cierto que venimos d’unos años de munches movilizaciones n’Asturies, nun podemos dicir, sacantes espacios combativos mui trabayaos como Asturies En Pie, que’l soberanismu asturianu saliere reforzáu nos sos métodos nin que dende l’espaciu que representa se tuviere la capacidá pa incorporar a l’axenda política d’Asturies nin un discursu, nin una visión, qu’ufriere al nuesu pueblu una salida asturiana, non sucursalista, a la crisis.
Nel tarrén eleutoral, la situación ye, como correspuende a un movimientu ensin afitar, inda más dramática que nel tarrén social. Podría dicise qu’eleutoralmente la izquierda soberanista dexó, na última década, de ser un espaciu que podía optar a mediu plazu a presentar un proyeutu propiu p’afitase en conceyos y aspirar a entrar na Xunta Xeneral. A la escontra, anecióse en prauticar el posibilismu eleutoral, dilíse en proyeutos más amplios que poco algamaron pa, finalmente, pasar a posiciones testimoniales d’invisibilidá en solitú o inxertes n’otros proyeutos d’ámbetu estatal. Con too ello anguaño podríemos falar, ensin duldes, de fin de ciclu -por escosamientu de discursu y ausencia de tou éxitu eleutoral- nel continuum políticu nacionaliegu dende la fundación del Conceyu Nacionalista Asturianu, en 1976, hasta los nuesos díes. Sobren los elementos de diagnósticu.
Como si precisamente d’una “crisis de los 40” se tratare, el nacionalismu asturianu vive nuna situación de frustración propia d’un movimientu que nun ta algamando los oxetivos pa los que nació. Asturies nun ye güei oxetiva nin xurídicamente más suxetu políticu qu’en 1974, na dómina na que ñaz Conceyu Bable, por munchu “estatutu d’autonomía” regaláu que tengamos; nin el pueblu asturianu ye más consciente de ser el suxetu de decisión cimeru sobre lo que pasa na nuesa nación y, amás, llevamos cuatro décades de naufraxos no político sacante dalgún trunfu no cultural y llingüístico.
Por si too esto nun fuere abondo, nel contestu estatal y européu vivimos un momentu de reconfiguración política que, como siempre, gárranos ensin organizar, ensin una estratexa clara a curtiu, mediu y llargu plazu nin un posicionamientu táuticu énte la realidá política d’Asturies. Y, nesti contestu, aprucen rellumantes apuestes políticos non reflexonaos en clave de movimientu, non coordinaos, non argumentaos nin xustificaos nos sos oxetivos nin nes sos llínies coloraes, práuticamente improvisaos, d’afuxida haza alantre, mui poco defendibles dende posiciones soberanistes y d’izquierda, qu’hemos de superar.
Tratamientu y pronósticu
Pero énte esti panorama aciagu tamién hai elementos d’análisis interesantes y en positivo qu’apunten a l’apertura d’una ventana d’oportunidá que podría valir pa construyir los cimientos d’un movimientu nacional asturianu a mediu plazu:
– D’una banda, la mesma desarticulación del asturianismu, cola falta de referentes orgánicos anguaño -sacantes na mocedá-, dexa abiertu’l camín pa puxar dende cero pola construcción horizontal y a comuña de lo que se dió en llamar, mui acertadamente, un “Espaciu Políticu Asturianu” non sucursalista, qu’empodere al pueblu asturianu y que defenda los sos intereses de clas y los sos derechos ya instituciones históriques pa poneles al so serviciu. Ye equí, no tocante a la participación horizontal y abierta, onde hai que-y reconocer a Conceyu Abiertu‘l méritu d’introducir, años enantes de l’apaición del 15M, un modelu de participación abiertu y flexible inéditu n’Asturies.
– Per otru llau, nun se pue descartar que nel contestu estatal se dea, en función de cómo evolucione’l panorama políticu catalán y vascu y el contrapesu cola proyeición estatal de Podemos, un procesu de reconfiguración del modelu d’estáu. En cualquier casu, -seya esti federalizante o recentralizador, que ta por ver- habría obligar n’Asturies a encadarmar un movimientu organizáu qu’emburrie pa torgar quedar n’orsai, otra vegada, como yá asocediere na “transición democrática” qu’inauguraba una ruina fase autonomista que n’Asturies siquiera llegamos a tastiar.
– Amás, anque na forma-partíu tengamos que falar d’absolutu fracasu, sí hai que sorrayar que na esquierda soberanista vienen pasando coses nos últimos meses qu’apunten a una manera distinta de facer les coses. Les concluxones del V Conceyu Nacional de Darréu onde s’apostaba como organización por ponese al serviciu d’una esquierda soberanista en construcción na so forma-movimientu y la medra de militancia dende la mocedá y na Xunta Estudiantil Asturiana, van nesi sen. Tampoco podemos dexar de llau l’apaición de les convocatories de Bloques Soberanistes unitarios que tán valiendo p’avanzar n’unidaes d’aición enxamás vistes pa munches y munchos de los qu’anguaño militamos na esquierda soberanista. Lo mesmo podríemos dicir de la creación del Espaciu La Llegra n’Uviéu, que ta valiendo pa coordinar y axuntar fuercies. Estes propuestes, nes que se trabaya coldu con coldu y que tán siendo desendolcaes na mayor parte de los casos por xente que, o nun llega, o pasa per poco la trentena, son esperanzadores y constituín un relevu pernecesariu pa superar dinámiques vieyes y abrazar otres nueves.
Poro…¿qué facer?
Lo primero, afondar na autocrítica: asumir el fracasu ye’l primer pasu pa pone-y igua. Paez claro que les propuestes y diagnósticos que se faen de la sociedá asturiana dende la esquierda soberanista nun tán caltriando nel nuesu pueblu y, ye evidente, nun hai país que defender nin pol que lluchar ensin cuntar cola xente que vive nelli.
Lo segundo, detectar les causes: rescampla que nun se ta incidiendo efeutivamente na sociedá, nin hai un modelu de país pensáu, diseñáu, que treslladar más alló de les consignes que glayamos en manifestaciones, conciertos y redes sociales. Con eslóganes, ensin un proyeutu nacional que-y dea soluciones a les problemátiques del pueblu asturianu, faise mui abegoso convencer a naide y disputar la hexemonía al proyeutu neolliberal español.
Per último, hemos de da-y la pallabra a la nuesa xente y abrir un alderique a nivel de movimientu sobre’l so propiu futuru y viabilidá. Tenemos recién l’exemplu de constitución de Compromisu por Asturies que, colos sos aciertos, errores y trayeutories, foi l’últimu momentu nel que s’abrió mínimamente’l debate nel nacionalismu asturianu. Hai que saber aprovechar la folona de participación que vien ximielgando Asturies dende hai dellos años n’otros ámbitos y abrir un procesu participativu y constituyente a nivel de movimientu, repensando l’Asturies que queremos dende lo más puramente ideolóxico a lo simbólico y de lo estratéxico a lo táutico. Con altor de mires, xenerosidá, respetu ente nós -independientemente de les estremaes estratexes que nos truxeron hasta equí- y los pies na tierra. Y, sobremanera, con escrupulosidá democrática, paciencia, ensin afoguinos eleutorales y reflexón permanente, na cai, faciéndonos mestices, sabiendo asumir otros puntos de vista qu’arriquezan la estratexa soberanista.
Esta xeneración tien la responsabilidá de que nun rompa la llínia conductora del nacionalismu asturianu que ñaz nos años 70 y llega hasta güei y que ta a piques de desfacese. Nun lo permitamos.
Espublizáu'l 3 de Payares de 2014 por Llar -> 867 km na categoría Les mios caxigalines
Los comentarios tan zarraos en El secuestru de la #SeleiciónAsturiana como metáfora de lo que pasa n’Asturies
Recordábemos nesti artículu del mesmu blogue la cita de Jorge Valdano na que dicía que “el fútbol ye la cosa más importante ente les coses que nun tienen importancia” y tornamos a mentala, otra vegada, pero pa referinos a la situación na que s’atopa la Seleición Asturiana de fútbol.
Un puquiñín d’hestoria…
Echando una migayina la vista p’atrás, la Seleición Asturiana de fútbol tien los sos raigaños na creación de la Federación Asturiana de fútbol, daquella col nome de “Federación Cantábrica” el 9 d’avientu de 1915, sobre la base de la Federación Autónoma de 1913. Ta integrada por 6 clubes asturianos y, ente los años 1916 y 1918, tamién polos equipos de Cantabria. Ye nesi momentu, en 1918, cuando l’asturiana adopta’l nome de Federación Asturiana de Clubes de Fútbol. En 1919 acueye a los equipos de Llión, Palencia, Zamora y Burgos y en 1933 cambia’l so nome a Federación Astur-Montañesa de Fútbol integrando a los equipos d’Asturies, Llión, Palencia, Santander, Burgos, Zamora y Salamanca nuna xuntura que podría hasta considerase interesante pol venceyu cultural y hestóricu esistente ente toos estos territorios. Pa finar, en 1952 tornaría a adoptar el nome de Federación Asturiana y, nel añu 1985, la de Federación de Fútbol del “Principado de Asturias”.
Dende la so creación xugó torneos d’ámbitu estatal, ganando un títulu y siendo subcampeona n’otra ocasión, y dellos partíos amistosos escontra otros combinaos nacionales como México (1934) y en Bruxeles (1936). La llegada de la dictadura fascista en 1936 fina cola so hestoria, sufriendo’l so primer secuestru del que nun s’habría de llibrar, llamentablemente, hasta l’añu 2000 y, amás, perxudica al Real Uviéu, que ve cómo l’entamu de la guerra torga una probable victoria lliguera nun campeonatu suspendíu que-y taba pa la mano.
Nos primeros años de franquismu son munchos los xugadores qu’emigren a otros países d’Europa o a Llatinoamérica y ye precisamente en países como México onde l’espíritu de la Seleición Asturiana podríemos dicir que se caltién. Al calor de les grandes migraciones del pueblu asturianu a México, nel añu 1918 fundárese l’Asturies F.C., formáu por emigrantes organizaos nel Centru Asturianu de México. A partir del añu 1936 esti equipu axunta a munchos de los asturianos emigraos por mor de la llegada del fascismu y llegaría a representar deportivamente’l sentimientu antifascista d’ente los exiliaos y exiliaes d’Asturies y del estáu español al país norteamericanu. Ye precisamente nel 1936 cuando s’inaugura’l “Parque Asturias”, l’estadiu del Asturies F.C. con capacidá pa 25.000 espectadores escontra’l Botafogo brasileñu.
Na temporada 1943-44, l’Asturies F.C. ganaría’l primer tornéu de fútbol profesional de México, paradóxicamente, al Real Club España, nel que taba Lángara, l’héroe vascu del Real Uviéu y militante d’ANV qu’afuxere cuando la guerra y que tornaría pa xugar nel equipu carbayón dellos años depués.
El resurdir de la Seleición Asturiana de Fútbol
Cola muerte del dictador en delles naciones del estáu español entamaron a recuperase, aparte de les instituciones polítiques propies, otres entidaes simbóliques como les seleiciones deportives nacionales. Asina, en 1977 tornaba la Seleición Catalana, que xugaba nel Nou Camp escontra la Unión Soviética (1-1) y dende 1997 xuega un partíu añal; en 1979 la Euskal Selekzioa reapaecía escontra Irlanda en San Mamés (4-1) y tamién xuega tolos años; en 1990 torna la Seleición Andaluza calteniendo cásique un partíu añal dende 1998.
Nel añu 2000, con motivu del parón navidiegu de la lliga de fútbol y l’estrenu del Nuevu Estadiu Carlos Tartiere n’Uviéu torna la Seleición Asturiana. Con más de 25.000 persones, a piques d’enllenar, y una afición entregao la seleición del nuesu país ganaría a Macedonia por 1-0. Aquel equipu que taría dirixíu por Díaz Novoa cuntó con un 11 d’entamu d’altísimu nivel formáu por: Esteban, Manel, Boris, César, Muñiz, Isma, Amieva, José Manuel, Manjarín, Luis Enrique, Pablo Lago, Angulo, Quique Martín, Iván Iglesias, Iván Ania, Mario Cotelo, Oli, Sietes y Juanele, que marcaría’l gol y que declararía apocayá qu’esi día “sedría’l que más se respigó na so carrera, al sentir l’himnu asturianu tocáu pola banda gaites nel estadiu”.
Nel añu 2001 repetiría la nuesa seleición, esta vegada en Xixón, escontra Llituania a la que ganaríemos por un contundente 6-1 cola presencia de más de 16.000 espectadores y goles d’Oli, César, Pablo Lago, José Manuel y Juanele, nun equipu nel que faltaron Luis Enrique y Abelardo y na que debutaría David Villa.
Nel añu 2002 xugaría escontra Hondures la nuesa seleición l’últimu partíu del combináu absolutu. El partíu, nel Suárez Puerta d’Avilés, finó con un 5-3 a favor de los asturianos, que xugaríen con Esteban, Javi Venta, Manel, Abelardo, Miguel, César, Urbano, Sietes, Manolo, José Manuel, Mario Cobas, Pablo Díaz, Iván Ania, Oli, Castaño y Villa. Los goles sedríen d’Abelardo, que por fin podía xugar cola azul, Mario, Oli, Villa y Miguel, con casi 10.000 espectadores viéndolo.
D’entós p’acá la Seleición Asturiana absoluta de fútbol quedaría secuestrada, otra vegada, como en 1936 por unos dirixentes federativos y políticos acomplexaos y antiasturianos que siguen privándonos de disfrutar de la que podía ser la meyor seleición asturiana de tolos tiempos, un combináu que podría tar formáu por xugadores como Esteban, José Ángel “Cote”, Javi Fuego, Javi Venta, Javi Paredes, Santi Cazorla, Miguel Pérez Cuesta “Michu”, Míchel, Juan Mata, Adrián López, David Villa xunto a tantos otros qu’anguaño tán dexando’l panorama futbolísticu asturianu mui altu.
Pero l’escarniu nun fina ehí. La Federación de Fútbol del Principado de Asturias yá planea la cellebración del so centenariu en 2015 y, ¡cómo non!, nun propón la vuelta d’esta Seleición Asturiana que podía ser histórica sinón un partíu de la Selección Española de fútbol n’Asturies, qu’habría cellebrase nel Carlos Tartiere d’Uviéu. L’exemplu del proceder de Maximino Fernández, presidente de la federación nos últimos 20 años, xunto col d’una Federación Socialista Asturiana acomplexada, qu’odia tolo que güela a asturiano, válnos pa entender perbién qué tipu d’actitúes caltienen pa con otros temes que tienen que ver cola política asturiana que van dende lo llingüístico, lo cultural, lo económico y lo social.
Arrequexen y faen de menos a la Seleición Asturiana de Fútbol dexándola namás pa les fases autonómiques estatales y prohibiendo la so presencia hasta en partíos amistosos que tantu bien podíen tar faciendo al perescaecíu fútbol base asturianu, que diba recibir en forma d’ayudes les ganancies d’esos alcuentros y auténtiques fiestes del fútbol pa l’afición y los neños y neñes.
Tampoco podemos escaecer qu’estos partíos bien guapamente podíen valir tamién pa echar una mirada al fútbol femenín, qu’anguaño tien al únicu equipu que compite na máxima categoría de fútbol per equipos: L’Uviéu Modernu. ¿Habría dalgo más guapo que facer una xornada de fiesta pa tol fútbol asturianu mentanto aconceyen nel prau les meyores y los meyores futbolistes del nuesu país? ¿Nun sedría un exerciciu de dignificación y empoderamientu no tocante a la igualdá y a l’espardimientu de valores como l’esfuerzu, la solidariedá o’l compañerismu? ¿Qué tien tan de malo? ¿A quién pue mancá-y dalgo asina?
L’apaición d’Astur Hinches [*+ ]
Pa finar, lo que pasaba nes graes: tolos partíos de la nuesa seleición cuntaron na dómina moderna cola presencia d’un coleutivu surdíu cola vuelta del equipu nacional y que s’axuntaron embaxo’l nome d’Astur Hinches [*+ ]. La so presencia en partíos de les estremaes seleiciones nacionales (amás de la de fútbol) foi una constante. Por exemplu, nel partíu amistosu-risión ente les seleiciones de balonmanu d’Asturies y España del añu 2007 n’El Quirinal d’Avilés, na que dellos xugadores asturianos xugaron nel combináu español en cuenta de nel asturianu, cola presencia de decenes d’Astur Hinches que recibieron a los de la camiseta colorada con una gran xiblada y na que munchos y munches nun tuvimos siquiera capacidá pa entrar nel polideportivu al escosar les entraes.
Nesti coleutivu axuntábense aficionaos y aficionaes de dellos equipos asturianos n’harmonía y ufriendo una gran animación nes graes, qu’a pesar del so coloríu y ambiente festivu, supunxeron problemes cola policía, como pasaría nel casu del Asturies-Macedonia onde un rapaz foi deteníu por una quema de bandera española demientres l’alcuentru que quedare depués en nada por falta de prebes que lu incriminaren.
Asina vamos…
Y nestes tamos. Con una Federación puesta de rodíes a Villar, que perxudica asina al fútbol base, a l’afición asturiana al fútbol tan necesitada d’allegríes y folixes como la que podría ufrir un partíu de la Seleición Asturiana y qu’amuesa’l so más ranciu provincianismu sintiéndose periférica, dependiente y vasalla. Nun ye yá que nun quieran dir haza un modelu del estilu “Reinu Uníu” onde nes competiciones internacionales puen participar les federaciones d’Escocia, Gales, Inglaterra o Irlanda del Norte per separtao…ye que nin siquiera quieren axuntar nun estadiu a un equipu que represente a Asturies colos meyores xugadores posibles porque nun quieren nada que nos vertebre como pueblu. Siguen mui contentos teniéndonos, dacuando, mui esmolecíos coles griesques -que tamién tienen la so gracia- ente Uviéu y Xixón, Llangréu y Avilés, Ribeseya y Llanes, L.luarca y Cangas…
Una metáfora, un exemplu, de cómo van les coses nesti país. ¿Nun vos paez?
Tornaron. Otra vegada. Como tolos años. Y con ellos, los vasallos y vasalles -y tán qu’echen fumo les peluqueríes y xastreríes d’Asturies-, el golor a naftalina, los llabores de xardinería, el poner la ciudá de punta en blanco, l’arrancar cartelos que nun-yos presten, los controles, los cacheos, la presencia permanente y descomanada de furgones con lluces azules, los francotiradores, les molesties a les vecines y vecinos qu’han de caleyar pela ciudá col DNI na boca, en definitiva: los premios principiegos.
Uviéu ye la ciudá más guapa del mundu…menos nesta selmana aciaga d’ochobre na que ye imposible vivir nin dar trés pasos pel centru de la ciudá ensin un rexistru. Alcuérdome de ser amedranáu y humildáu dende bien nenu polos de les botes de caña alta y traxe azulón, obligándote a abrir la mochila, xulgando les pegatines, camisetes, chapes o apariencia que lleves y tirando de chulería y autoritarismu “porque me sale de los cojones”. Toles que pasamos pel mediu de la ciudá estos díes del añu sabemos de qué va l’asuntu.
Diz Caunedo, l’alcalde non escoyíu de la ciudá, que los premios principiegos suponen dalgo “muy bueno para la ciudad, la región y el país” y más cara nun-y pue echar. Un país -y falo d’Asturies, señor Caunedo- puestu a los pies del fíu del sucesor elefanticida de Franco; una institución -el Principado- fecha a midida non como premiu o honor haza’l pueblu asturianu, sinón precisamente como humildación y pa tener a esta tierra, avezada a irguise, bien amarradina en curtio. Qué gran honor.
¿Pero d’ú vien esto del Principado?
Non, nun ye un títulu puestu por ser mui bueninos, nin mui nobles, nin mui lleales, nin por ser guapes y llistes. La institución naz en 1388, cuando un noble nomáu Alfonso Enríquez andaba a la griesca col rei de Castiella, Juan I. A la tercera de les rebeliones asturianes d’Alfonso Enríquez (Conde de Noreña y Xixón, aliáu de Portugal y d’Inglaterra) escontra la corona de Castiella allá pel añu 1383 el rei de los castellanos decide atropar pa Castiella les tierres d’Asturies, desterrar a los cabezaleros rebeldes del país y destruyir toles fortaleces d’estos.
Cuando Juan I fai’l so testamentu ordena “que las tierras de las Asturias que nos tomamos para la Corona del Regno que sean siempre para la Corona”. Pa da-y una carta de llegalidá a esta usurpación crea en 1388 la figura del “Principado”, entregando automáticamente Asturies al fíu del rei de Castiella, venceyando asina a aquella corona esta tierra d’accesu difícil y un país avezáu a les conspiraciones y rebeliones, como quedare claro hestóricamente coles rebeliones de Gonzalo Peláez (nel 1.135) y demostrao posteriormente en sucesivos llevantamientos. Entamaba asina la sumisión cultural y política d’Asturies haza Castiella con consecuencies qu’inda güei carecemos.
Poro, ¿de qué tenemos que tar arguyosos pola tema del títulu de “Principado” pa referise a Asturies? ¿Qué país cellebra con arguyu la so sumisión, la so conderga, por ser rebelde? ¿La democracia úla? Asturies nin tien rei, nin tien príncipes, nin los quier, nin los necesita, nin enxamás-y entrugaron al pueblu asturianu si quería ser un principáu, nin propiedá d’una neña roxa de 8 años.
¿De qué nos val esti circu añal?
¿Qué ye…qu’Uviéu y Asturies namás puen promocionase gracies a unos premios que, más que gallardones, son un photocall xigante nel que llexitimar, aguapar y arrodiar a la monarquía española de figures -n’algunos casos- de ciertu prestixu y -n’otros casos- de duldosu honor?
¿Qué ye…que los pueblos “exemplares” -y en xeneral tolos pueblos d’Asturies- nun precisen polítiques reales pa caltener la vida y a la mocedá ellí con futuru en cuenta d’un día de permanentes, gomina y fartures borbóniques pagaes por toes y toos?
¿Ónde tán los vasallos, los “empresarios”, los besamanes, la corte borbónica, los artistes del réxime y tola refugaya cuando acaben col texíu industrial del país o cuando emigramos d’Asturies?
¿Cuánto papó la realidá asturiana esi qu’agora ye’l primeru de los españoles siendo príncipe de toles asturianes y asturianos cuando na so proclamación como rei faló en toles llingües del estáu menos na d’esti país que tanto diz qu’aprecia?
Cantaba Dixebra aquello de “una vez al añu vienes con un rebañu servil, una tribu de babosos a enllenar el banduyín” y sigue siendo asina. Marchái d’equí. Pa siempre. Dexáinos vivir en paz. Dexáinos caleyar peles nuestres ciudaes tranquiles y tranquilos. Llevái con vosotros a tola corte de provincianos rancios y acomplexaos, a los empresarios que vos baillen l’agua mentanto nos despiden, nos precaricen y nos retayen la vida. Salíisnos mui caros. Muncho. Emplegando la vuestra terminoloxía “lleváis décades garrando fartures n’Asturies a costa nuestra penriba de les vuestres posibilidaes”.
Esti vienres a les 17 hores tornamos a atopanos los y les que refugamos el ser dueños de naide na Plaza La Escandalera d’Uviéu. Unes movilizaciones cada vegada más y más masives que, dende siempre, tuvieron a la izquierda soberanista en primer llínia. Nos últimos años perespecialmente, coles movilizaciones del Ensame República Asturiana -que yeren minoritaries comparándoles coles de güei onde participen otros seutores sociales en comuña- pero que fueron quién de xuru a abrir dinámiques posibilitando’l qu’esta selmana miles y miles de persones vayan tar xiblando a los reis d’España n’Asturies. Porque esta tierra y a esti pueblu nun se lu pue, nin s’ha d’heredar. Porque les asturianes y asturianos nun somos súbditos nin vasallos.
Pola República Asturiana. Por ser dueñes dafechu de les nuestres vides. Yá nos toca.
El fenómenu de la emigración forzao de la mocedá nun ye nuevu n’Asturies, el país de la crisis sempiterna. Con una de les poblaciones más avieyaes d’Europa, esto ye, del Planeta, les asturianes y asturianos d’anguaño nun somos más qu’otra de les xeneraciones en carecer el fenómenu migratoriu, un fenómenu que nun nos ye desconocíu de nenguna manera, porque equí les poques persones que nacen, colen.
Nuna tierra de güelos y güeles emigrantes a l’Arxentina, México o Cuba y padres emigraos a Bruxeles y Alemaña, la mocedá asturiano de los 90 p’acá nun fai otro que garrar destín Madrid, Barcelona, Sevilla o Bilbao, nunes cifres añales escandaloses.
Les causes d’esti éxodu tán clares: el desaniciu de los seutores productivos asturianos clásicos -l’agroganadería y pesca, la metalurxa y siderurxa, la minería- xunto cola falta total d’una reindustrialización que quedó pa prau, enllenando los bolsiellos d’una mafia sindical y política que texe redes clientelares nel nuesu país mentanto degrada los pocos servicios públicos que teníemos.
Los causantes, tamién son conocíos: la oligarquía económica, española y europea, promotora d’un estáu español y una UE del mercáu común, de la trata de persones esclaves, de la desindustrialización d’unes zones pa reindustrializar otres, del comerciu con estaos nos que nun se respeten los derechos llaborales nin humanos, cristalizando n’Asturies nunos partíos y dirixentes vasallos, serviles y provincianos que faen de correa de tresmisión de les polítiques diseñaes en Bruxeles y Madrid.
¿Les consecuencies? Munches. La primera d’elles, qu’a Asturies quéda-y un futuru de país-postal, un parque temáticu nel que recibir a turistes pa que nos saquen semeyes echando sidra, un país que forma a la so mocedá -universitario y non universitario- y que ve cómo se-y escapen los sos fíos y fíes a trabayar acuyá de les nueses llendes, n’otres tierres onde, a vegaes, son mui valoraos pola so capacitación. Al tiempu, afítense sistemes de producción al más puru estilu d’espoliu neocolonial: la sobrexeneración de lletricidá -con parques eólicos, térmiques con carbón estrayío en condiciones d’esclavitú- y l’intentu por afitar per parte de grandes empreses la estracción d’oru y shale-gas al traviés del fracking, exemplos toos d’un modelu productivu que nin da emplegu -en cantidá, calidá y duración- nin respeta’l nuestru mediu ambiente, nin val pa garantizar de nenguna manera los derechos sociales, arriqueciendo a los de siempre, robándonos al pueblu asturianu los nuesos recursos. Otra consecuencia, de la que mui pocos falen, del despoblamientu nacional asturianu ye l’avieyamientu de la población, dexando un país de pensionistes y alloñando -p’allegría de los que manden- de la so tierra a una mocedá que debiere ser el motor de la tresformación social n’Asturies.
Sicasí, nos últimos años sí tamos asistiendo a un cambiu arreyáu a la crisis económica global y, en particular, nel estáu español: les asturianes y asturianos qu’enantes colaben a Madrid en númberos bayurosos énte la situación de crisis permanente n’Asturies y qu’atopaben na capital del reinu un trabayu precariu anguaño nin siquiera tienen esta posibilidá. Ye por ello que d’una emigración intraestatal -Asturies->Madrid, Barcelona…- tamos pasando a una emigración tamién interestatal, onde los destinos más avezaos van dende’l Reinu Uníu y Alemaña a los países de Llatinoamérica.
Y foi, precisamente con esti cambiu -y de manera mui recién- col que dende dellos sectores de la esquierda estatal se vien afitando nos últimos tiempos un discursu que defende la “vuelta de los exiliaos españoles”, identificando a esi/a emigrante mediu/a como una suerte de “tituláu universitariu en Londres poniendo cafés”. Dexando a un llau un ciertu tufu clasista nesa idea espardida que paez presuponer que les persones titulaes merecen un tratu meyor que’l de les trabayadores non cualificaes, onde s’apela a la “fuga de cerebros” enantes qu’a la “fuga de trabayadores”, podríemos facer otros análisis
Por exemplu, dende la esquierda estatal enxamás se-y dió nin un plizcu d’importancia a ún de los mayores drames que carecemos n’Asturies, que nun ye otru que’l de la emigración -que non exiliu, reserváu a los qu’afuxen de la persecución política- de la mocedá por motivos sociales y económicos fuera del país.
Quiciabes heba que recordar que les que colen d’Asturies a ganar la vida a Castiella, Cataluña o Andalucía son tan emigrantes -anque suene poco chic pa dellos titulaos superiores- como les que marchen a Londres, Hannover o Santiago de Chile. Tampoco taría de más aneciar en que, lo que yá podemos llamar “diáspora asturiana” en sitios como la capital del reinu d’España, nun ye un fenómenu nuevu sinón endémicu col que la burguesía española enllenó y enllena los sos bolsiellos, onde acaben sacando tayada hasta coles perres qu’invierten cientos d’asturianes y asturianos en tornar a la so patria en tresporte públicu toles fines de selmana.
Duel especialmente, esi provincianismu que paez lleése ente llínies: “si ye pa tar en Madrid, un asturianu emigrante lo que fai ye medrar, dir a la metrópoli del so tiempu, a la Capital, sigui en casa, ye namás movilidá interna” etc. cuando a Granada hai 867km. dende Uviéu y a Toulouse 700. Duel esi pensar, col que paez que si nun se marcha n’avión, nun se ta “fuera”, cuando les fíes y fíos d’Asturies emigren mayoritariamente n’ALSA. Duel, porque’l nuestru destín abócanos a ser lleendes urbanes. Duel, a la fin, porque se paez too demasiao a los comentarios de Báñez sobre “movilidad exterior” o la secretaria xeneral d’emigración del gobiernu español, falando del “espíritu aventurero de los jóvenes españoles” per Europa.
Énte esta situación, torna a demostrase la necesidá de que dende y p’Asturies s’articulen rempuestes y soluciones pa les clases populares d’esti país: porque naide va a venir a salvanos dende Madrid, porque namás el pueblu salva al pueblu, porque tolos asturianos y asturianes son emigrantes fuera d’Asturies. Porque pa los que tienen los güeyos puestos nel congresu de los diputaos, les asturianes y asturianos, a la fin somos un caladeru de votos más. Mientres caltengamos la nacionalidá española pa votalos, toos tranquilos.
Hay una percepción extendida entre los asturianos que consiste en considerar que “las mujeres y hombres del tiempo” de las cadenas de ámbito estatal nunca se fijan en Asturies. Según esta idea, la información suele pasar de Galiza a Cantabria quedando la previsión meteorológica asturiana englobada en comentarios del estilo “y lloverá en el resto de la cornisa cantábrica”.
Treinta y ocho años pasados tras la creación del primer partido nacionalista asturiano corren tiempos de reinvención en una izquierda soberanista que vive un momento de reflujo en el que, sin embargo, se pueden estar poniendo los cimientos para el asturianismo del futuro.
Las dinámicas de la última década en el ámbito de los partidos nacionalistas asturianos, estuvieron centradas en promover y alentar procesos de unidad política orgánica. Sin embargo, estos movimientos de agregación que habrían de implicar un crecimiento notable, conllevaron, paradójicamente, la salida por la puerta de atrás de militantes y organizaciones y, en la práctica, una mengua de estas en la capacidad de incidir política y socialmente.
Si bien es cierto que durante estos últimos años se viene abusando del “huír políticamente hacia adelante” -en lugar de reflexionar sobre qué es lo que está fallando- sí se comienzan a ver nuevas praxis y estrategias que, por lo menos, suponen una novedad frente al estado de las cosas. La influencia de los nuevos modelos de participación política parecen tomar cada vez más importancia en el soberanismo asturiano, en el caso de organizaciones como Conceyu Abiertu, que con referentes como el de las CUP a nivel de los Països Catalans empieza a ver en el municipalismo un fin en sí mismo y no simplemente una manera de “amarrar votos” para la Xunta Xeneral. Unos votos que, con esta estrategia centrada en el parlamento asturiano, solamente en dos legislaturas permitieron al asturianismo ocupar un escaño.
Por otro lado, también se ve una nueva manera de entender la militancia, la participación y las propias organizaciones, vinculándolas a las nuevas experiencias en el ámbito de los movimientos sociales como el 15M o ocupaciones emblemáticas en Asturies como el CSOA La Madreña, ex consejería de salud, en Uviéu. Y ejemplo de este cambio en el ámbito del nacionalismo fue el proceso fundacional de Compromisu por Asturies en 2012, con la participación abierta de cientos de personas de manera física y online en la redacción de sus estatutos y bases ideológicas.
No obstante, no es el único síntoma de que las cosas pueden y deben cambiar: cada vez son más los y las trabajadoras que se autoorganizan al margen de las “empresas sindicales” y sus redes clientelares endémicas en Asturies, como en el caso de la creación de la Asamblea de Trabayadores en Llucha, formada por trabajadores de empresas que sufren EREs y cierres y que sacaron a más de 15.000 personas en marzo a la calles de Xixón en un éxito sin precedentes.
En un momento en el que la derecha ha finiquitado los derechos sociales y se reabren las puertas al jacobinismo centralista se trata de poner a Asturies en el mapa. Y, que si llueve, nieve o haga sol, lo sea a gusto de los que menos tienen.
Llegaron les eleiciones europées -unos comicios que solíen ser poco más qu’un trámite, un simulacru y un sondéu pa medir el pulsu de la población en clave de participación, interés y desafección de la xente cola política europea- y diéron-y un valtu a l’actualidá política asturiana y, sobremanera, estatal.
Les eleiciones europées más analizaes
Depués de que posaren los resultaos, y de que toles opciones y en tolos ámbetos se ficieren valoraciones y análisis, podríemos dir apuntando delles custiones que, dende discursos estatalistes, desgraciadamente poques vegaes se sienten.
En primer llugar, n’Asturies había más de 990.000 persones convocaes a les urnes, nuna población de poco más d’un millón d’habitantes, lo que rescampla la falta desoladora de xente mozo nel país. Una población avieyao, con una pirámide poblacional pates arriba que nos mata pasu ente pasu. En segundu llugar, estes son les eleiciones con menos participación de la historia d’Asturies. Namás un 43% de la población s’averó a les urnes. Ye dicir, un 57% de les asturianes nun quixo nin mirar pa elles, asoleyando una falta d’interés total y custionando la representatividá del sistema parademocráticu. Ye curioso, nesti sen, cómo voces cuntaes tán falando d’estos datos que, nel estremu, llevaron a conceyos asturianos como Ibias, Ayande o Cangas a rexistrar una abstención escandalosa del 74,01%, 72, 73% y 72,14% respeutivamente. Nun asistimos esta vegada a una correición masiva de los datos porcentuales de los partíos sobre votu emitíu, traduciéndolos en porcentaxes de población total qu’apoyen a estes opciones y, chocantemente, esmucióse’l discursu del “nun nos representen” per arte de maxa.
En tercer llugar, sigue ganando’l Partido Popular de los retayos más brutales. N’Asturies, recupérase de la fractura con FAC y plánta-y cara a un PSOE que recibe una mocada en focicu mui importante de los sos votantes, llegando al empate téunicu col PP más feble de la historia nel nuesu país. Esi desgaste tremendu del PSOE ye tamién el d’una IU que llegaba a les eleiciones metanes d’un procesu vergoñosu de prevaricación en casa y ensin iguar los sos problemes internos que ve cómo, algamando una subida importante de votos, ye adelantada un proyeutu políticu, el de Podemos, fechu en cuatro meses nun auténticu sorpasso.
En cuartu llugar, queda demostrao que la prensa nun recibe’l nomatu de “Cuartu Poder” de casualidá. Va cuatro años vímoslo cola irrupción d’UPyD, partíu lleváu en volandes por La Nueva España a la Xunta Xeneral, xenerando noticies permanentemente, dando per sentao que diba entrar. Tampoco ye casualidá que los meyores resultaos de los últimos años nel nacionalismu asturianu d’izquierda se dieren cuando la coalición Compromisu tuvo per llei una cuota d’espaciu na prensa que yera de xusticia. La importancia d’apaecer en medios de comunicación de mases nun tien preciu. Permite crear polos d’atracción política y de participación a toes lluces mui difíciles de crear en tan pocu tiempu. Sigue siendo como p’analizar mui en serio la so relevancia, impautu y les razones pa que se xenerare’l maremotu Podemos. Tamién ye verdá qu’hai que saber aprovechalo, trabayalo y diseñar un programa que caltrie ente la xente. El méritu del equipu de Pablo Iglesias ye tremendu y apavoriante, nesi sen.
En quintu llugar, n’Asturies dióse la tormenta perfeuta pa que’l nuesu país fuere’l sitiu nel que Podemos algamare los meyores resultaos del estáu, con 51.000 votos. D’una banda, nun existen polos alternativos a IU específicos d’Asturies, a diferencia de lo que pasa n’Euskal Herria, Catalunya, Galiza o Aragón. Per otru llau, IU, que sube pol meru fechu d’existir y tar a la esquierda inmediata del PSOE, atópase desnortiada y debilitada colos escándalos de prevaricación y la falta de cohexón interna. Per último n’Asturies malgobierna’l PSOE, con una FSA que retaya como’l que más, que reprime y que dexa unos datos de paru, emigración y falta de derechos al más puru estilu PP, polo que nun hebo nenguna posibilidá de que los de Rubalcaba recoyeren n’Asturies nengún tipu de votu descontentu con Rajoy.
N’últimu llugar, el contestu internacional abulta complicadísimu, nuna Europa na qu’alita’l neonazismu como tamos viendo col casu más de recién en Francia. Nun ta de más comentar que n’Asturies UPyD, Ciudadanos y VOX sumen cásique 40.000 votos cásique ensin facer campaña y qu’amestándolos a los votos de FAC y PP n’Asturies la derechona llega a los 145.000 votos polos 100.000 aproximaos de Podemos, IU y otros cásique 100.000 de la FSA.
¿Y ú va la esquierda soberanista asturiana?
Nestes eleiciones hebo, como nun podía ser d’otra manera, trés postures estratéxiques distintes na redolada de la esquierda soberanista. Dende Andecha Astur participóse na coalición de Bildu y BNG qu’algamó un eurodiputáu pa Bruxeles, pero que n’Asturies quedó nuna cifra testimonial de menos de 1.400 votos que nun permiten nengún analís seriu en positivo. Per otru llau, Conceyu Abiertu optaba intelixentemente pola abstención, anque tampoco se fue quién a entamar nenguna campaña de descréitu de la UE como podía ser el casu, colo qu’estes eleiciones nun valieron pa ver nada nuevo nesi sen.
El casu de Compromisu ye más complexu. L’apueste por participar en Podemos foi un puntu y aparte na dinámica de la organización, lo que yá ye una novedá a destacar. Al marxe del éxitu históricu y ensin paliativos de Podemos nel estáu y n’Asturies ta’l ver qué pue algamar l’asturianismu d’esti procesu, ensin entrar n’otres valoraciones sobro los posicionamientos políticos, económicos o sociales de la formación de calter estatal no tocante a la Unión Europea.
En primer llugar, el partíu de Pablo Iglesias entamaba mal, torgando una correición territorial anunciada al entamu nel so procesu de primaries que, d’una banda, facía mui difícil la representación d’un país pequeñu -demográficamente falando- como ye Asturies nel conxuntu de votos nes primaries del estáu y que, quién sabe si de tenese correxío esos votos, podría tener dao con más d’un puestu pa les candidates asturianes nel “top-5” de la candidatura. Esti fechu, consideraciones al marxe del procesu de primares, resulta bastante grave poles implicaciones que tien cuando falamos de proyeutos d’obediencia nacional asturiana.
En segundu llugar, si bien ye verdá que’l trabayu de la militancia de Podemos en sitios como Uviéu, Xixón y Avilés foi perimportante y asina se ve reflexao nos resultaos, contrasta colos perbonos resultaos algamaos tamién en conceyos de la zona rural asturiana nos que nun hebo campaña tan activa de Podemos, colo qu’habría que suponer que’l votu vien determináu de manera importante al traviés de l’apaición de Pablo Iglesias na televisión estatal y les redes sociales xeneraes tres d’ello pol equipu de Podemos. Esti asuntu, xunto col protagonismu del mesmu candidatu, podría ser un bon pilancu a la hora de reasitiar un proyeutu propiu n’Asturies fechu al marxe de la figura omnipresente de Pablo Iglesias que plantegue custiones y un discursu propiu y afayáu a la realidá asturiana. ¿Qué va pasar si se plantega una llínia al marxe de lo que salga de los promotores de Madrid?, ¿cuála ye l’autonomía de los círculos de Podemos? o ¿la xente n’Asturies vota a Podemos Asturies o vota a esi mozu que diz les coses tan bien na tele? yeren entrugues que nos plantegábemos nel postreru artículu d’esti blogue y qu’inda nun paez que tean resueltos a un añu vista de que cientos de persones entren a ocupar cargos como conceyales y diputaes d’esti partíu. Tampoco ta entá decidida la posición al rodiu de la llingua asturiana, a pesar de qu’otres reivindicaciones tocantes a drechos humanos (feminismu, LGTB, antirracismu…) fueren asumíes “de mano” por Podemos. En cualquier casu, nesti sen, tampoco paez que se contemple -a pesar de que se faiga’l discutiniu pa unes coses sí y pa otres non- nengún escenariu nel que Podemos nun defenda la oficialidá de la llingua asturiana de manera arrenunciable, como, por cierto, dicta l’artículu 3 de la sacrosanta constitución española.
Tampoco s’atopa entá, por nun siguir más alló, un discursu qu’analice de mena distinta la existencia histórica d’España como proyeutu nacional. Despáchase la problemática cola defensa del derechu d’autodetermín de los pueblos -que nun ye poco, pero que supón namás un mínimu democráticu- dexando de llau un discursu qu’empodere a pueblos adormecíos como l’asturianu, apelando a sentencies del estilu “yo quiero más que Catalunya nun marche” ensin plantegar alternatives vidables al xacobinismu. Y ye que paez que’l federalismu español furrula en munchos casos como coartada pa salir del pasu cuando se ta falando del País Vascu o Catalunya, onde hai movimientos soberanistes afitaos, mientres qu’onde esi mesmu federalismu habría de crear concencia nacional, concencia de pueblu y de país -como n’Asturies- pa crear concencia con/federal quier más mimetizase y tener un silenciu cómpliz col centralismu “que da menos problemes”.
A Compromisu por Asturies quéda-y per esta vía un trabayu abegosu per delantre pa llevar el procesu a posiciones averaes a lo qu’entendemos por asturianismu, a la consideranza d’Asturies como marcu y suxetu políticu. Una vía, tamién lo hai que dicir, llexítima y que xunto a otres que vayan en paralelo tamién pue obtener resultaos granibles.
Pero hai vida más alló de les eleiciones
Anque les perspeutives no estrictamente eleutoral nun son buenes pa que trunfen propuestes específiques de la esquierda soberanista asturiana, n’otru sen sí van guañando cosines. Al calor de la okupación del CSOA La Madreña vivimos l’apaición d’un espaciu físicu de la esquierda soberanista asturiana como ye La Llegra: un espaciu compartíu poles organizaciones polítiques enantes aludíes xunto con otres como Darréu o la Xunta Estudiantil Asturiana -fechu esti históricu-, faciendo piñu y, polo variao de les actividaes y persones involucraes, paeciendo per una vegada un movimientu dinámicu, atractivu y abiertu a la sociedá de la capital del país.
Nesi llaboratoriu de la esquierda soberanista que resultó ser La Llegra dende’l so entamu non sólo queda nidio que ye posible la unidá d’aición ente les persones y les organizaciones de la esquierda nacionalista sinón qu’esta ye pernecesaria y granible. Como consecuencia d’esta esperiencia tamién s’entamaron dellos bloques soberanistes que resultaron un éxitu nel mes de mayu, cola manifestación del día de les trabayadores, el día les lletres y la de les Asamblées de Trabayadores en Llucha, y nel mes de xunu coles movilizaciones republicanes por mor de l’abdicación del Borbón dando una visión republicana asturiana alternativa énte la visión única y privativa del republicanismu de la que tanto s’adolez nel nuesu país.
Nun podemos dexar equí de facer el paralelismu col denomáu Procés de Vinaròs, tres del que la esquierda soberanista catalana, col handicap de tar nel momentu de mayor medría d’Esquerra Republicana de Catalunya allá pel añu 2002, dexaba a un llau les sos griesques internes y apostaba por un proyeutu nacional dende abaxo nel que les organizaciones de mocedá, sindicales, feministes, d’estudiantes, antirrepresives xunto coles organizaciones polítiques taben al serviciu del movimientu y non trabayando en compartimentos estancos. Nesta dinámica, el papel de los bloques soberanistes nes manifestaciones de la Diada y la existencia d’espacios físicos comunes de la EI (Casals, Ateneus…) como locales, llugares d’alcuentru y d’alderique foi determinante, igual que pudimos ver col casu de La Llegra. El resultáu de lo algamao con esa dinámica a nivel de los PPCC ta a la vista y, conociéndolo, nun ha sorprender a naide la complexidá y efectividá de les redes d’auto-organización xeneraes tres más d’una década de confluencia.
Apostar por proyeutos nos que les eleiciones nun obsesionen nin distorsionen les dinámiques de la esquierda soberanista, avezada a volvese lloca énte la disyuntiva d’echar una papeleta nuna urna, podría ser una opción pa tener en cuenta; lo mesmo qu’afondar nel alderique internu y n’axuntar criterios qu’entamen pelo simbólico y lo estratéxico pa que se visibilice socialmente la existencia d’un espaciu políticu asturianu. Tampoco habría de dexar de llau una estratexa de comunicación y de medios afechisca.
Tamos nun momentu nel que, si lo dexamos pa prau, podemos ver, de facto, la primer discontinuidá existencial na esquierda soberanista o del nacionalismu n’Asturies tal y como lu entendíemos dende la metá de los años 70: como proyeutu autónomu qu’ha tener un sitiu propiu na política asturiana. Tamién ye cierto que per detrás vien una xeneración de xente nuevo que nun tien les zunes de los que yá vivieron toles batalles y que demanda anovar les formes, xenerosidá y apuestes decidíos. Dase’l casu de que concasa too ello con un momentu políticu y una sociedá n’efervescencia que puen recordar precisamente a la dómina de los años 70 na que se-y dió entamu a esti asturianismu que, con too y con ello, sigue siendo un movimientu bien mozu, comparáu con otros de la redolada, pero que tiénlo too entá por dicir.
Tornaron. Otra vegada. Como tolos años. Y con ellos, los vasallos y vasalles -y tán qu’echen fumo les peluqueríes y xastreríes d’Asturies-, el golor a naftalina, los llabores de xardinería, el poner la ciudá de punta en blanco, l’arrancar cartelos que nun-yos presten, los controles, los cacheos, la presencia permanente y descomanada de furgones con lluces azules, los francotiradores, les molesties a les vecines y vecinos qu’han de caleyar pela ciudá col DNI na boca, en definitiva: los premios principiegos.
