Estos díes conmemoramos el primer aniversariu de la salvación del Real Uviéu, tres d’un movimientu que ximielgó a la sociedá uvieína, asturiana y a mediu mundu, como yá comentáremos nesti estensu artículu del mesmu blogue que paga la pena anovar y analizar. Güei, un añu dempués, otra vegada l’uvieísmu poníase en marcha p’afalar a una mayor implicación del Grupo CARSO, propiedá del magnate mexicanu Carlos Slim, aicionista referencial -que non mayoritariu- del club. Esta campaña, col nome #yofirmoxcarso, lleva recoyíes miles de firmes pa “calecer el corazón” d’un Arturo Elías, xenru de Slim, que tres d’estos primeros 12 meses alloñábase del proyeutu.
Repás a l’actualidá social y deportiva del Real Uviéu dende’l milagru de la salvación económica
Nel tarrén deportivu esti tiempu pasó ensin pena nin gloria. La temporada suañada, col equipu yá salváu no económico y social, nun pudo algamase al quedar apeaos de la llucha pol ascensu a la 2ª división n’Eibar. Sicasí, l’ambiente xeneráu por una afición que s’entrega y qu’aplaude hasta los saques de banda a favor dexó imáxenes pal recuerdu como la del final del partíu, onde yá eliminaos, la hinchada desplazao aplaudió y animó a un equipu que yera too ún cola grada y que salió ovacionáu polos aficionaos llocales y visitantes.
Esti añu, con una plantiya anovada y, paez que, preparada p’asaltar el primer puestu del grupu, la situación nun ta clara. Si bien ye verdá que mirando pa la tabla les sensaciones son perbones nun ye precisamente esto lo que se puede ver nel prau, especialmente nel Carlos Tartiere, que pasó de ser fortín del equipu en toles temporaes a ser una plaza fácil na que puntúen y marquen cásique tolos equipos que nos visitaron.
No que cinca al tarrén social del Real Uviéu atopamos munches más solombres que no deportivo, que yá ye dicir. D’un llau, desatáronse unes lluches pol control del conseyu mui poco vistes dende la cayida a los infiernos en 2003. La direutiva responsable de la salvación del equipu, que tinía como cabeces visibles a Toni Fidalgo, Juan Ramón “Torla” y Pedro Zuazua, nun supo dar pasu a un nuevu conseyu que cuntare col sofitu de toles partes y foi argayando poquitín a poco.
Primero salía Zuazua, una de les persones que meyor sabía coneutar col sentir de l’afición, tres d’un supuestu episodiu mui poco seriu con grabaciones de conversaciones privaes y posterior unvíu d’estes a México por personaxes desestabilizadores y fuinos. Dempués dexábalo Torla, que tuviere un papel principal na creación del movimientu internacional de salvación del equipu y que yera la persona que más miró por integar, sindicar y axuntar al pequeñu aicionariáu mayoritariu, amás de tener clara la importancia de mirar pol aficionáu nel día a día de la xestión del club. N’últimu llugar, Toni Fidalgo, probablemente de los trés la persona que menos enganchaba cola afición, dimitía dexando pasu a un enésimu conseyu de transición capitaneáu por un Sabino López poco apreciáu pola grada qu’inda nun paez saber en qué va a finar.
Pel mediu, propuestes más o menos afortunaes pa optar al Conseyu del Real Uviéu, mui poca claridá no que quier facer col conseyu l’aicionista de referencia mexicanu, y más últimamente la propuesta de “Conseyu de Consensu” que venía a entamar una recoyida de firmes pa la implicación del Grupo CARSO col hashtag #yofirmoxcarso y que vien d’axuntar cásique 6.000 firmes d’aicionistes nunos pocos díes.
Un añu d’oportunidaes perdíes
La xestión deportiva d’un club ye difícil de valorar porque nella entren el restu d’equipos que compiten y contra los qu’hai que xugar. Una mui bona plantiya a nivel deportivu puede topar con unos cuantos equipos meyor montaos, tener mala suerte’l día señaláu o topar con un árbitru tresvoláu y de toes estes hestories ta’l fútbol enllenu. Ensin embargo, no que nun hai disculpa ye na ausencia d’avances na política social del Real Uviéu. Tres del emburrión apavoriante que vino a ser l’ampliación de capital de 2012 nun se vino más qu’a dar pasos p’atrás. Pasamos d’una campaña na que se lluchaba escontra’l fútbol modernu a facer esautamente lo mesmo que se criticaba.
a) En primer llugar, y pa mi la más importante, nun existe nengún avance no que cinca a la participación de l’afición nel día a día del club. Sí viéremos l’añu pasáu cómo’l club sondeaba a los aficionaos en delles ocasiones sobre custiones como’l merchandising o cellebraciones concretes a lo llargo l’añu, pero dende entós p’acá nun se tornó a mirar pal aficionáu más que pa pidir la renovación del recibu añal. Nun existen, nin se crearon, nin hai voluntá pa ello, calces nuevos de participación/interaición ente’l conseyu y l’afición, por muncho qu’exista la figura del “asesor” de l’APARO (Asociación de Peñes Azules del Real Oviedo).
b) Nun se fizo nengún intentu por rebaxar los precios de los recibos añales, calteniendo unes entraes individuales pal partíu del domingu al nivel de categoríes bastante superiores. Tornóse al modelu de pagar y callar, anque polo menos nun se xubieren, ensin tener en cuenta la situación d’extrema crisis que vive la población asturiano, que vien de romper les huches pa l’ampliación, merca camisetes y bufandes y nun dulda en viaxar en masa col equipu perdayuri. Sigue descansando nel aficionáu/ada tol pesu del presupuestu económicu, anque sí ye verdá que podemos apuntar delles meyores nos patrocinios y sponsors nes equipaciones del equipu. Fracasose nel intentu (si ye qu’hubo intención real dalguna vegada) de ser pioneros na aplicación d’un modelu asemeyáu al alemán dende Uviéu.
c) Nun se ta cuidando nin integrando a los aicionistes internacionales. Recordamos que’l Real Uviéu ye anguaño’l club del estáu español con mayor númberu d’aicionistes, cásique 40.000 persones distintes. Ensin embargo, dende l’ampliación de capital nun se tornó a mirar pa les miles de persones qu’aportaron a la masa social del club. Nin se caltién una correspondencia ellectrónica con ellos, nin se-yos planteguen posibilidaes pa que visiten l’estadiu, la ciudá y el país asturianu, nin se-yos ufre información nel web n’inglés. Tamos dexando de llau una de les coses que más únicos nos fai agora mesmo nel planeta fútbol y ye una auténtica vergoña que nun se reconoza’l papel de toa esa xente anónimo nuevo que nun puede sentase tolos domingos nel Tartiere.
d) El Real Oviedo nun tien nengún tipu d’enfotu en formar futbolistes uvieístes pa la primer plantiya. Reflexu d’esto ye que namás hai un asturianu nel once d’entamu, Diego Cervero, y namás Álvaro Cuello s’asoma a les convocatories de xemes en cuando. ¿Qué clas d’estímulu se-y quier dar a la xente que vien dende abaxo si estos ven que pa trunfar equí hai que venir ficháu dende fuera? ¿Pa qué valen les instalaciones d’El Requexón? ¿Por qué enllenamos la boca al falar de Michu, Cazorla, Mata, Adrián…mentanto nun-y damos una oportunidá a los Chapi, Rúa, Juan Steven…? Oxalá la entrada d’Iván Ania nel Vetusta, un xugador que sabe lo que ye dexar el piel pol equipu, valga pa camudar esta dinámica llamentable.
e) Nun hai nengún tipu d’interés nel Real Uviéu por exercer d’equipu de la capital d’una tierra que se llama Asturies. Nun ye yá que nun xueguen cásique futbolistes del país nel primer equipu, sinon que, como nel casu de los aicionistes internacionales, nun se mira por tener un web n’asturianu tampoco, por más qu’espoxiguen propuestes pa ufrir información normal n’asturianu, al tiempu que se podría siguir faciendo en castellán y n’inglés. Siéntese poca ambición pa que’l club torne a ser l’equipu referente d’Asturies como llegare a ser a finales de los años 90. Nin se promociona nel estadiu la música asturiana como se ficiere en Primera nin se visiten les escueles de la ciudá como sí se ficiere l’añu pasáu. ¡Y too esto son midides a tomar a coste cero! Tien que ser l’afición la qu’exerza como siempre d’embaxadora, como nel Reinu de Llión, cantando “Nel Pozu María Luisa” nuna imaxe que dió la vuelta al mundu enteru otra vegada pola so emotividá.
f) Per último, y non más importante, nun hebo nengún movimientu dende l’afición del Real Uviéu pa construyir un muérganu de representación por derechu y ensin intermediarios nel Conseyu d’alministración. Cola actual composición del aicionariáu los pequeños/es aicionistes somos MAYORITARIOS si fuéremos a comuña -con cásique’l 41% d’elles, frente al 35% del Grupu CARSO-, si sindicáremos les nueses aiciones. D’esta manera tendríemos garantizaos más d’un puestu d’alcuerdo colos estatutos del club onde podríemos llevar les nueses propuestes ensin “asesoríes”, sinon col pesu del nuestru capital puestu pa salvar al equipu. Movimientos d’esti tipu nun son raros n’otres llatitúes: el Swansea de Michu tien un “Supporters Trust” que ye dueñu del 20% de les aiciones, siendo pieza clave nes decisiones que se tomen nel equipu. Paez que nun-yos va mal. Otros equipos como’l FC St. Pauli lleven a les sos asamblées la voz de l’afición como una sola voz.
Una visión crítica sobro’l #yofirmoxcarso
Tres tolo espuesto enriba nun me siento capaz de pidir que venga naide dende México a salvanos cuando nós tamos faciendo mui poco por ameyorar el nuesu amáu club. Por supuesto qu’una postura más clara y activa per parte d’Arturo Elías sedría positiva y determinante pa ver al Real Uviéu n’otres divisiones, pero de fondo quiero ver una falta de confianza no que ye capaz de facer esta afición, de la so capacidá p’autoxestionar un proyeutu al que queremos más que naide, por munches perres qu’otros xueguen nello.
Porque namás el pueblu salva al pueblu, namás l’afición salva al so equipu. Inda tenemos la oportunidá de da-y la vuelta a la tortiella y siguir siendo un club distintu. Hai que s’involucrar, hai que s’axuntar, hai que falar y afalar a la participación de toles persones. Namás axuntando esfuerzos y voces vamos ser quién a facer un Real Uviéu meyor y de toos. Xuntos con CARSO, puede ser, oxalá. Nun m’opongo a que faigan un negociu (relativu) nel futuru cola so inversión si cuenten con nós dende yá, meyor dicho, si nós facemos por que cuenten cola afición pa too. Porque l’afición sabe lo que necesita esti equipu y munches vegaes podría ufrir milenta idées y propuestes pa que too funcione meyor. Porque tamién-yos lo debemos a los que dende lloñe se xubieron a esti barcu que taba fundiendo ensin esperar más qu’un futuru azul prósperu.
¿Entamamos por axuntar les nuestres aiciones pa la xunta d’aicionistes del mes qu’entra?
Por un Real Oviedo asina…yo firmo en blanco.
Dende el primer intre nel que se encamentó a la xente pa que mercara aiciones na ampliación fui escéuticu, por principios ideolóxicos propios y non por pasotismu pa col futuru del club. Dempués ḷḷegó Sid y camudó too; sicasí nun terminé de velo nidiu.
Agora visto con perspeutiva, pue dicise que fizose mal dende l’entamu, o que con el #yofirmoxcarso tamos pegándonos un tiru na pierna. En tiempos de l’ampliación ablucamos polo que se nos vino enrriba, cegaos pola necesidá ficimos un marketing perbono y llimitámonos a andar a la gueta de les perres, pero pa ello ḷḷenábasenos la boca colo de “recuperar el mando del club” – “que los socios tengan el poder de decidir” – “compra acciones y hazte dueño de una parte del club” – “sentimiento global”.
¿Onde quedó eso?. Dalgunos vese agora que namái lo dicíen por persuadir a outros y que paezme que somos poucos, o menos, los que pensábemos firmemente n’ello y que si nun yera la forma ideal na que pudiéremos tornar a recuperar el nuesu club, pudiera ser una bona ferramienta. El fechu de que un aicionista mínimu de 4 aiciones pueda pidir y ver les cuentes el mesmo o que pueda sentase nel Auditorio cuando la Xunta, ye pa muncha xente lo que se podía algamar tres l’ampliación. Esa mesma xente nun se da cuenta que en tiempos bien ceo; con Alberto, Celso y cía, había les mesmes Xuntes y demás, poro, asina nun se pue tener control efeutivu del club.
O facemos ‘trust’ o perdemos el tiempu si queremos “mete-y mano al club”, y paez felizmente que vamos tener novedaes pronto según dixo Torla por Twitter. Nun soi yo espertu nin mui entendíu na xera, pero molesteme en echai un güeyu a les webs de los trust de los dos equipos galeses y qu’agora tan na Premier (oseya que mal nun yos va), Cardiff (http://www.ccfctrust.org/) y Swansea (http://www.swanstrust.co.uk/). Con porcentaxes mas baxos del que podríemos nosotros formar, formen un grupu de presión esencial na xestión, non solu pidiendo cuentes na Xunta anual, tamién sondeando a la afición en xeneral y promoviendo idegues a la xunta direutiva.
Ye esto lo que quería puntualizar, como aficionáu escontra el fútbol modernu nun pueu sinon tar d’alcuerdu nel tueru del artículu, respetando a la xente qu’anduvo col tema de les firmes porque cualesquier movilización ye señal bona de que el club inda ta y va tar vivu. El restu de coses que señales que nel club tan faciéndose regular, pa mi, son consecuencia de to esto; quedó amosáu coles marches de Torla y Zuazua del conseyu y dempués cola renuncia del “asesor” de la APARO que nun yera nin ye esa la forma de tener parte na xestión; el patrón nun va dexar de ser el patrón.
Espero que l’artículu tuyu sirva pa dar outra visión de como puen facese les coses nel Oviedo, que la xente dese cuenta un pouco d’ello y que s’anime a intentar facelo d’outra manera. Los que nun vamos firmar nin firmamos por Carso, nun ye que temos a la so escontra; al contrariu queremos dir xuntos de la mano al mesmu pasu pa escaecer los vieyos ya escuros tiempos que paecimos.