(Déxovos perequí un articulín asoleyáu nel fanzine de la xente del U.C. Ceares. Munches gracies por afalame a emburriar estes pallabres nun mediu d’espresión tan importante como ye’l fanzine d’una afición).
“Sedría pal fanzine “La voz de la Cantina”. El títulu: Un carbayón en La Cruz, por Iyán”. ¿Cómo lo ves?. Iñigo encamentábame asina, con estes mesmes pallabres nun mensaxe, el facer esti articulín. El títulu, de primeres, sonome mal. Como a una mezca ente crucifixón romana y, al mesmu tiempu, faciéndome sintir como si fuere una rara avis n’aquellos 90 minutos + descansu + descuentu que pasé nel llar del Unión Club de Ciares nos que pa nada m’atopé fuera de llugar.
Vamos dexar les coses clares: enxamás tuviere nun boxing day. De fecho, alcuérdome con un aquel de vergoña de la primer vegada que sentí falar -siendo rapacín- d’esti vezu prauticáu na tierra na que s’inventó’l Xuegu. Yo, en cuenta de pensar na tradición de facer colectes en caxes pa la xente menos favorecío, fíceme a la idea de que’l nome venía por dalgún símil puxilísticu. Quesió -imaxinaba- “igual nesta xornada los árbitros son más permisivos colos coldazos y les segaes a l’altor de la rodiya. Nun sé. Por facelo más animao, ¿non? Que pa eso son fiestes”. Por cierto, foi too un éxitu.
El partíu entamaba a les 15.45 hores. Tampoco, que m’alcuerde, tuviere nunca nun alcuentru qu’escomenzare enantes de les 17 hores pela tarde. L’horariu, entendible pola falta de lluz artificial, abúltame un aciertu. D’una banda sincroniza’l match colos partíos de la Premier, lo que da pa milenta xuegos de pallabres radiofónicos del tipu “¡¡Minutu y resultáu dende Anfield, Old Trafford, Upton Park y La Cruz!!”. Per otru llau, permite l’empalmar col restu de la tarde y nueche faciendo del día’l partíu una xornada con un “tercer tiempu” de folixa postfutbolera ensin acabación, lo que resulta de lo más atractivo.
Poder aparcar a venti metros de la puerta’l campu ta infravalorao dafechu. Vaya luxu, collacies y collacios. Pagar 12€ ye caro, pero duel menos cuando sabes qu’eses perres nun van dir al bolsu de conseyeros que lo gasten, xunto coles comisiones por fichaxes y demás ingresos a costa de sangrar a l’afición, en farina, fartures y derivaos.
Y, entós, entramos.
Menudu quórum pa un partíu de la categoría. Mecíes coles de paisanos y xente del barriu, munches cares conocíes nel fondu, al pie d’una cantina que güel a fútbol. Bono, y a cerveza. Cares de xente que nun sueles atopar nesti contestu futboleru sinon en conciertos, movilizaciones, charres, plataformes varies…Xente de casa.
Y presta, vaya si presta, porque en La Cruz sobren les xustificaciones poles contradicciones que nos xenera’l futbolerismu hestóricamente a los que tenemos dalgo d’eso que llamen “concencia social”. Nun yera’l mio llar, -hasta presupongo polo de “por carbayones nunca pasaremos” que toi en tierra amigablemente hostil- pero yera un ambiente nel qu’ún siente confianza. Como si tuviere nel sitiu nel qu’hai que tar, polo menos, una vegada per temporada. Y esa sensación de tar enriba de los xugadores y de que cada glayíu d’ánimu-yos entre peles oreyes y-yos llegue a les piernes ye pa ver in situ.
Los nenos y neñes pasáronlo podre, sobremanera nel descansu. Ver a la reciella pegándo-y pataes al balón pel prau -que ye prau de verdá, non césped nin tapinos d’importación- como si fueren los protagonistes nun tien preciu. ¿Como si lo fueren? Corríxome yo: ¡fuéronlo dafechu!
“¿Entós tu qué, ho? ¿Qué faes perequí, nin?” espetóme un conocíu, que sabe bien que soi un uvieísta moderáu nes formes pero radical nel sentimientu. – Vengo a ver al Ciares porque, lo primero, préstame ver fútbol los fines de selmana, y principalmente, porque hai que sofitar a la xente que fai por devolvé-y la dignidá al Xuegu.
Y ye verdá: el llabor social y políticu que ta -que tais- desendolcando en Ciares ye d’aplaudir. Nuna dómina na que’l fútbol, como la política, ta siendo condenáu a la dictadura bipolar de los “mayoritarios” l’intentar facer barriu, ciudá, país y ociu deportivu dende un equipu de fútbol de “la tercera” -pa mi habría de llamase Primera Lliga Asturiana– tien munchu, munchu, méritu.
Col trabayu que lleváis fechu nesti tiempu queda demostrao que toles estayes de la vida y de la sociedá siempre puen ser vistes con otros valores, con ideales y concencia, dexando de llau mitificaciones del estilu “hai que separtar política de fútbol”. ¡Yá t’oyí navaya!. Como si l’apostar polos neños y neñes del barriu frente a los fichaxes nun fuere una decisión política; como si l’emplegar la llingua asturiana con total normalidá fuere casualidá nun país nel que l’idioma ye marxináu; como si convocar certámenes músico-lliterarios fuere un vezu de los clubs-empreses; como si ganar el derechu a participar de les decisiones del club nun tuviere un calter redemocratizador; como si nel momentu nel qu’un/a entra nuna grada dexare de ser persona con convicciones y se convirtiere en poco más qu’un autómata que nun fala ellí de los problemes qu’atopa nel día a día, de les sos esperances, de lo que tuvo bien a lo llargo de la selmana, de lo que sigui mal, de lo que se podría facer pa camudar les coses… Sí polos coyones. En definitiva, como si’l fútbol del “tu pagues y a callar la boca, pringáu/ada” nun escondiere tres d’él una ideoloxía concreta y un modelu económicu determináu.
Queda pal futuru’l ver qué camín queréis los aficionaos y aficionaes siguir, y equí sí voi ser más polémicu: si hai vocación de medrar como club y esguilar categoríes o si’l destín del U.C. Ciares ye caltenese con honor nel fútbol más humilde de la Primera Lliga Asturiana. Esta opción cabera, quiciabes la más romántica, igual ye la más realista pero ¿por qué nun suañar con un club xestionáu pola afición qu’asalte’l cielu del fútbol nel futuru? Eso sí, de llograse podría avocar a que la hinchada, qu’anguaño de xuru que comparte col Sporting munchos/es incondicionales, a la competencia direuta col equipu “grande” de la ciudá. Dalgo asina como lo que pasa n’Hamburgo col obreru FC St.Pauli y el burgués HSV o, a otru nivel, lo qu’asocede ente’l Manchester United y el FC United of Manchester, club fundáu polos hinches desencantaos colos dueños de los Red Devils. ¿Imaxináislo? ¡Menudu matu!, ¿eh?. Sicasí, ye ceo pa plantegar estos escenarios, y más nestos díes nos que la mayoría entá tamos cellebrando’l fallu nes predicciones pal fin del mundu profetizáu polos mayes.
¿Qué más pue dicivos esti carbayón que nun sepáis? Que faciendo les coses bien, como ye’l casu, puen llograse munches victories diaries, por muncho que los heba que tán rabiando al ver qu’otru fútbol non combayón colos de les perres ye posible. Séi conscientes de que tais abriendo’l camín y marcando’l pasu pa los que vengan detrás, que vendrán.
Pémeque ta dándose la vuelta a la tortiella. Les aficiones de los equipos d’Asturies paez que pasu ente pasu van esconsonando y viendo les falcatrúes del fútbol-negociu. Les estratexes son distintes, ta bien claro, pero rescampla la necesidá de ximielgar los pilares d’esti mundín impuestu porque precisamos que los colores seyan otra vegada propiedá de les hinchaes, de la xente que caltién esti Xuegu vivu.
¡Ah, escaecíame! No puramente deportivo hai un equipazu. Prestome especialmente’l puxu d’Argüelles -¿cómo ye que nun hai una Peña Ciarista col so nome yá?- pela blinga derecha. Tamién me paez valoratible l’estilu de Jimmy y la clas de los mediocentros. ¡Esti añu cellebráis, y yo con vosotros, la permanencia del fútbol alternativu en Tercera con trés o cuatro xornaes d’adelantu!
Y otru día faigo por tornar per La Cruz. Anque seya pa nun escaecer qu’en díes de galerna tamién hai rayadines de sol.
Semeyes:
Web U.C. Ceares: http://www.ucceares.com
