La xuntura estratéxica de la esquierda soberanista, enriba la mesa.

Espublizáu'l 23 de Payares de 2010 por Llar -> 867 km na categoría Analís políticu

Les coses avanzaron bien poco dende qu’escribiere un articulín perequí nel qu’opinaba so l’espectru políticu de la esquierda soberanista/independentista/nacionalista asturiana anguaño. Básicamente, les novedaes cuéntense colos deos d’una mano de Tortugu Ninja:

Ún) Cásique nun tornó a orpinar na capital del reinu Zirí. (ver entamu del artículu citáu)

Dos) Valledor faló nos medios y dexó nidio que si quier que lu escueyan los/es afiliaos/es como candidatu y dempués ganar la confianza del movimientín ha tener que depurar muncho les sos apreciaciones al rodiu de lo que ye Asturies, la dimensión y definición nacional del proyeutu políticu, los sos oxetivos a curtiu, mediu y llargu plazu y la so rellación colos sos antiguos compañeros/es de partíu. Quedé un poco asustáu coles sos rempuestes.

Trés) Tamién tenemos nueves dende Andecha Astur, que yá yera hora. Nelles -de manera más bien poco trabayada- Mariu Arbesú amuesa la so disponibilidá (y entiendo que lo fai arriendes de resoluciones internes de los muérganos democráticos del so partíu) p’algamar alcuerdos inmediatos y vinculantes con Bloque por Asturies y Unidá Nacionalista Asturiana que, yá d’aquella, paecía que podíen tener bien amarráu’l so alcuerdu.

Namás dende la humildá pa col restu d’actores políticos sedremos quién a construyir y tresformar esti país

D’unos meses p’acó les rellaciones ente organizaciones del ámbetu nacionalista/soberanista/independentista d’esquierda pegaron un valtu. Les maquinaries d’intercomunicación ente les estremaes sensibilidaes d’esti espaciu a lo menos, llubricáronse y suavizáronse. Hebo hasta la posibilidá de facer un actu precariu -ye verdá- pero que, coles sos matizaciones, tuvo una componente unitaria.

A mi abúltame de caxón l’atalantar esti como’l momentu de dexar atrás les rocées históriques y ponese a la xera. Atención, falo de rocées personales, vieyes zunes y percepciones -de xuru más consecuencia de la falta de contautu que d’otro- qu’unos/es tuvimos pa colos/es otros/es y al revés, non de diferencies polítiques imposibles de reblagar/consensuar nun programa y una llínia estratéxica si queremos da-y otra traza a Asturies y facelo cola remanando’l cazu cola manzorga.

Lo mesmo qu’hai unos años -y voi dicilo de mou crudu y sinceru- consideraba (y sigo analizándolo de la mesma manera) como una verdadera sumisión al lliberalismu españolista del PSOE la postura de Valledor y del Bloque por Asturies, anguaño nun pueo otro qu’albidrar que coles sos trayeutories últimes xeneren la posibilidá de que güei munchos/es suañemos cola oportunidá d’articular un movimientu d’emancipación nacional y social de puxu y alternativu.

Al tiempu, siempre me paeció difícil d’entender l’estilu o la traza qu’Andecha Astur tuvo siempre pa trabayar a comuña con otros coleutivos, persones y partíos, con actitúes suicides/autodestructives que quiciabis namás se podíen entender tando dientro de la organización, cosa qu’agora nun m’impide creyer de manera firme que la so presencia nun proyeutu unitariu non sólo ye importante sinón imprescindible pol so bagaxe ideolóxicu y pol so trabayu militante, dambes al mesmu altor.

D’otra banda, anque m’abultaren munchos los errores de precipitación, improvisación, fuxida haza alantre y falta de valentía de la xente d’Izquierda Asturiana y/o Unidá Nacionalista Asturiana pondría la mano nel fueu pol so altor políticu y pola so voluntá pa sumar y aidar a construyir un abellugu escontra la que ta cayendo nesta dictadura del capital que desanicia la nuesa cultura y sangra a los asturianos y asturianes.

Sicasí, y anque toos tenemos los nuesos errores y enquivocaciones polítiques y personales cróniques, tamos nun tiempu nuevu. Un tiempu nel que se siente un pálpitu -pero non del de Gallardón- qu’afala a animase a quien lu nota.

Tarxeta encarnada pa les actitúes destructives, pal posturéu, pa la esclusión d’actores políticos válidos y pa facer que tornen les griesques avezaes

Si de verdá se quier apostar por un movimientu de futuru, que llanque bien fondo los sos pegoyos, nun valen les torgues. Dende Andecha Astur nun se puede denomar como “maniobra de re-entrismu n’IU” los supuestos principios d’alcuerdu ente UNA-Bloque cola presencia de Valledor y menos dende afuera del procesu. Nun me valen les maniobres más bien primitives onde con artículos espublizaos nel micromundu virtual nacionalista/soberanista/independentista se pretende “aparentar” que se ta por una xuntura -esperemos que non- a la que yá quiciabis arrenunciaren. Ye esencial qu’Andecha Astur nun marée la comida y faiga un apueste sinceru pola negociación. Y cuando falo de negociación falo de nun imponer un modelu propiu, sinón de saber cuálu ye’l so papel y tar al altor de les circunstancies.

Otra manera, dende’l Bloque y UNA tán obligaos a ufrir un marcu dignu pa qu’Andecha Astur tea representada razonablemente nesi nuevu espaciu, onde pueda influyir y falar de tu a tu coles otres dos organizaciones. Nun valen “pre-alcuerdos” si se quier integrar a toles partes, custión básica pa qu’esti nun seya otru proyeutu qu’entame col pie malu. Dende estes dos formaciones han confiar per una vegada na voluntá d’Andecha Astur. Intentalo nun cuesta nada y el saltu cuantitativu y cualitativu sedría ablucante.

Pa finar, ye imprescindible que tolos partíos, una vegada afitaos los alcuerdos, qu’a mi paécenme entá posibles, nun dexen de llau a los movimientos sociales nesa construcción plural. Nesi intre han presentar el proyeutu políticu, han contrastar postures no que cinca a los programes d’acción política estratéxicos ya ideolóxicos y han pidir la collaboración a otres entidaes non electoralistes ensin mieu dalu, que neses condiciones van sofitar ensin resquiebres y sumar anque seya una migayina más.

Nun soi a imaxinar un momentu meyor, metanes d’esta crisis capitalista onde la UE va finar sacando tayada “rescatando” la economía estatal, cuando se ta falando de recortar los subsidios, pensiones y los sueldos mínimos, pa lluchar por una solución de clas pal pueblu asturianu. Defender los nuesos derechos sociales y la nuesa identidá ye too uno si queremos entamar a ser realmente llibres.

Tiempu al tiempu y colos güeyos nos actores políticos implicaos.

Siguimos tresmitiendo dende 866.9 km ≈ 867 km del mio Llar.

  1. Moiso diz:

    Yá sé que nun soi precisamente constructivu. Quiciabes soi pesimista, pero nun creo nun matrimoniu durarero ente AA y Valledor, nin ente AA y los ex-AA que tán agora n’UNA.

    Por otra banda, a veces creo que les sigles se multipliquen, pero siguimos siendo los mesmos. Escindímonos, construyimos el nuesu propiu proyectu y volvemos fusionanos pa facer proyectos comunes y supuestamente nuevos, glayando pola xunidá… Ye un poco como un ciclu, un eternu “dejà vu”… Nun sé, creo que la idea d’abir la xunidá a la xente non independentista ye un bon pasu, pero nun pue ser sólo teóricu. Eso desixiría (y supongo qu’ehí nun tarás dalcuerdo comigo :p hehe) dexar un pocu les reivindicaciones nacionales nun segundu planu (porque si non los non nacionalistes/idependentistes nun diben acabar d’afayase).

    En cualesquier casu, les rocees personales nun sé si serán salvables… Espero enquivocame.

    • Ivan diz:

      Perbón artículu -aunque ya tea un tiempu- Iyán. Paezme que nun solu das en clavu, ye lo que munchos venimos pensando hai tiempu. Desgraciadamente paez qu’esa “fueya de ruta” que marcabes y que ye lo lóxicu y que toos tenemos na tiesta nun se dió.
      Per otru llau, toi d’alcuerdu dafechu contigo Moiso na primer parte del mensaxe, lo de facer venti escisiones pa depués arrexuntales y presentalo como la de dios, cuando en realidá ye munchu menos qu’había lo primero, nun pue ser un ésitu en ningun casu. El resultáu de toes eses dixebres y arrexuntances ye qu’anguañu queden dos frentes pal nacionalismu d’izquierda (electoralmente falando) pero que nun son nada ninguna d’elles, porque pel camín mandose pa casa porque acabaren hasta los coyones/ovarios un 85% de la militancia nacionaliega d’izquierda -refiérome a la que sigue asitiada ideolóxicamente n’esi posicionamientu- que podría formar parte d’un frente ampliu y xunitariu si se dieran les condiciones. Ehí ye onde nun toi d’alcuerdu contigo. Si esto pasara pa mi nun ye nin beneficiosu nin deseyable renunciar al calter nacionaliegu d’esti movimientu -salvu casos puntuales y que pudieran ser interesantes estratéxicamente- porque garraríamos bastante puxu social y poro electoral.

      Un exemplu que me paez afayaizu pa esto, ye’l d’Euskal Herria onde hai una cúpula dirixente que vino toos estos años faciendo lo que-y dió pola gana cola izquierda abertzale, hasta que les bases militantes dieron un puñetazu enriba la mesa y tan bien cerca d’algamar el fin de la llucha armada y un nuevu proyectu soberanista y d’izquierdes qu’hai diez años yera impensable. Garremos los bonos exemplos.