Llar -> 867 km

Contestu políticu

Yá ye vezu nesti blogue l’analizar -con mayor o menor aciertu- los procesos eleutorales que se vienen dando nos últimos años. Asina, nesti artículu vamos tratar d’ufrir una visión dende la óptica del nacionalismu asturianu d’izquierda que sirva p’afondar nel debate qu’anguaño existe nes redes sociales y nes organizaciones y persones de la redolada ideolóxica d’esti espaciu.

Estes eleiciones, les que menos participación histórica tienen n’Asturies y nel estáu (55.9% y 55.1% d’abstención respeutivamente en 2009) diben pel camín de ser un ensayu nel qu’evaluar el costu eleutoral que tienen les polítiques del PP a nivel estatal, l’aguante del PSOE y la capacidá de recibir una bona montonera de votos desencantaos per parte d’UPyD y d’una IU que, otra manera, fizo poco más qu’existir y tar a la “izquierda del PSOE” -cosa bien cenciella, per otra parte- nesti intre políticu concretu. No tocante a les esquierdes soberanistes del estáu, los comicios valdrán pa midir les posibilidaes d’EH Bildu y ERC pa “facer el sorpasso” a les dereches nacionalistes PNV y CiU n’eleiciones vinientes, cola reedición de candidatures del estilu Europa de los Pueblos nes que les CUP, el fenómenu políticu de moda, queden en principiu n’órsai al optar -paez- el mundu de la esquierda abertzale pola coalición continuísta con una Esquerra que cada vegada fai más concesiones no social.

Y no que cinca a Asturies y l’asturianismu l’escenariu plantegábase con un ciertu optimismu, tres de meses d’avances na unidá d’aición ente organizaciones como Compromisu por Asturies y Conceyu Abiertu, les que representen a la mayoría del nacionalismu asturianu d’izquierda organizáu políticamente. L’asistencia d’estes organizaciones a comuña xunto con otres a estremaes movilizaciones como’l Primeru de Mayu o la convocatoria conxunta d’actos pal 25 de mayu o’l 8 de setiembre xeneraben y xeneren bien d’ilusiones ente’l públicu y los/es militantes asturianistes qu’esperen, como poco, que se caltenga esti clima de non-agresión y de construcción dende’l día a día de pontes desfeches dende siempre ente les dixebraes sensibilidaes polítiques. Amás, esti tipu d’alcuerdos afondaben en dinámiques non eleutoralistes sinón nel trabayu diariu, treslladando’l discursu nacional un poco más encuriosáu a ámbetos nos que munches vegaes o, direutamente, nun se llegaba o llegábase mui precariamente y con salvedaes personales.

Oportunidaes, riesgos y duldes
Los procesos eleutorales son un momentu nel que hai muncha mayor permeabilidá pal debate políticu y pa que les distintes opciones tengan una cierta visibilidá, lo cual cúmplese mui desigualmente. Colos últimos movimientos garren interés estos comicios, qu’otra manera diben pasar más per alto de la opinión pública con una participación que podía -y entá pue llegar, nun lo escaezamos- a ser la más baxa de la hestoria reciente con una abstención mui mayoritaria.

No relativo al espaciu de la esquierda soberanista asturiana esti qu’escribe apuesta, dende hai años, pola unidá d’aición penriba de too. Ye dicir, que les decisiones concasen lo más posible y que vengan tres de la interaición ente les estremaes sensibilidaes del nacionalismu asturianu d’izquierda. Priorizar los alcuerdos, por mui de baxu conteníu que seyan, dientro del asturianismu pa reforzar la existencia del espaciu y, dempués, salir a interrelacionase col restu de la esquierda y movimientos sociales presentes n’Asturies. Asina, plantéguense munches opciones -unes más enquivocaes qu’otres- pero que valdríen pa caltener una cierta coordinación: dende nun se presentar a presentase a les eleiciones pero, a ser posible, xuntos y xuntes en cualquier casu.

Ye verdá que Podemos ye un tren que nun pasa tolos díes, y que Compromisu por Asturies fai un apueste valiente y cásique pioneru nel estáu. Sicasí, tamién ye cierto que si l’asturianismu tuviere capacidá pa facer una llista propia y potente como faen les esquierdes soberanistes d’otros países, esti de xuru que nun sedría un proyeutu prioritariu y ún pue duldar muncho de la capacidá pa influir que vaya tener Compromisu nel procesu. Ye verdá que Podemos ye una masa ensin amoldar, que si sigue les dinámiques del 15M permite l’adaptación a múltiples contestos como podría ser l’asturianu, y que cuanto más se trabaye más averao a lo que se quier va resultar, pero tamién ye cierto que paez que se ruempe una dinámica de confluencia de llargu recorríu cola qu’una parte queda cola sensación de portazu na cara. Ye cierto que puen algamase bonos resultaos nestos comicios, pero tamién lo ye que les eleiciones -y más les europees- nun lo son too, y que’l día depués d’estes les posibles rocées xeneraes pola non resolución d’una candidatura nacional queden n’Asturies mentanto otros marchen pa Bruxelles o pa Madrid.

Per otru llau, la insistencia per parte de Pablo Iglesias et al n’incluyir a Izquierda Unida ensin custionar les sos polítiques pautistes que, como dicíemos, diba xubir una montonera de votos pol fechu “d’existir” a pesar de les sos actuaciones vergoñoses na última década n’Asturies o anguaño n’Andalucía nun ayuda. Qué dicir de Joan Herrera: a lo meyor en Madrid nun carecieron les bondaes de la esquierda plural que nos reprimía igual. Y digo que nun ayuda porque munchos y munches venimos precisamente de custionar sistemáticamente la política de muleta “esquierda” del PSOE que ye y foi IU nos conceyos y gobiernu asturianu. Munches de les intervenciones de los ponentes del proyeutu Podemos suenen más a la enésima refundación d’Izquierda Unida, cosa qu’a mi interésame más bien poco, qu’a refundación del estáu, d’Europa o d’Asturies al traviés d’un procesu nel que s’algamare esi tan cacarexáu empoderamientu popular. Al mesmu tiempu, como yá se viviera nel 15M, falta por esclariar la soberanía de los “círculos” de Podemos. ¿Hasta ónde van ser vinculantes les decisiones tomaes n’Asturies? ¿Cómo se va controlar l’aición política de los candidatos a nivel estatal? ¿Qué llendes van ser marcaes?. Per último, la retórica de los cabezaleros madrilanos de Podemos, apelando n’ocasiones a un “patriotismu de clas” español  “onde la nación ayude y non perxudique”, “como faen los venezolanos, vascos, catalanes o gallegos”, práuticamente podría considerase como una agresión dialéutica pa soberanistes d’izquierda como los asturianos, asumiendo un marcu del Reino de España nel qu’existiríen 3 naciones y nel que’l restu somos dalgo asina como la cuarta, españoles, lo que sema de duldes la compatibilidá de sensibilidaes.

La posición no que cinca a la Europa del Capital y la salida o non del € y les instituciones llexitimadores a nivel internacional del imperialismu, debates tamién propios d’unes eleiciones europées, tampoco salieron entá. El puntu de partida ye una proclama a tomar les instituciones poniendo más per delantre lo que se refuga que lo que se quier construyir, que nun ye poco.

¿Podrase? Veremos. De primer mano pa un soberanista d’izquierdes faise raro que se concurra a unes eleiciones nun marcu de tipu estatal y non nel avezáu, nestos casos, plurinacional. Les argumenteaciones apurríes, pel momentu, son probes en cuantes al analís políticu y tácticu. En cualquier casu, hai tiempu p’andar esi camín, pa dar marcha atrás o pa qu’otros se sumen. Per otru llau, da la sensación de que’l movimientu trescala nuna sociedá asturiana falta de referentes. Sedría una irresponsabilidá’l nun interactuar d’una o d’otra mena con esa xente que ta moviéndose y qu’entama a ilusionase con esta dinámica de trabayu.  La sensación que queda ye la de que con esti procesu ta construyéndose lo que va ser el futuru inmediatu na conformación política n’Asturies y nel estáu español.  Habrá que lu siguir mui de cerca y confiar en que tres de les eleiciones, esta vegada, la esquierda soberanista nun salga damnificada como tantes otres veces.

Da’l 2012 les boquiaes y fina ameritando’l ser probablemente’l peor añu p’Asturies de les últimes décades, -lo que yá ye dicir cuando analizamos el pasáu recién d’esti país-.

Estos dolce meses van pasar a la historia por ser nos que’l capitalismu, enseñando los caniles, dexónos un desemplegu qu’algama cotes dramátiques y unos servicios públicos  tarazaos, en fase de privatización total, cola sida vergoñosa y cruel de los retayos y l’austeridá pública, como si esta llaceria fuere culpa de la clas trabayadora y non de los capitalistes qu’espoxiguen a costa del malvivir del pueblu.

2012, l’añu nel qu’Asturies convocó dos eleiciones nacionales nes que los problemes reales del país foron secundarios. Nes que se xugó puerco. Comicios que valieron pa qu’entrare la particular versión hispánica del “Alborecer Doráu” na Xunta Xeneral pa esfarrapala dende dientro y tres de los que s’amenazó a Asturies con ver suprimíu’l so “autogobiernu” ruin y probetayu.

Un 2012 nel que’l patrimoniu llingüísticu y cultural d’Asturies dió munchos reblagos pa escontra la tumba cola complicidá y silenciu de munchos pa los que siempre hai otres prioridaes coles que tampoco nun cumplen. Nel que los fartones de tola vida siguen a la gueta d’estratexes nueves -agora ye la frayadura hidráulica- pa enllenar el bolsu d’unos pocos a costa de dexar un país estrozáu ambientalmente.

Nós, falo de la esquierda soberanista, del asturianismu o nacionalismu asturianu, pior que nunca –y nun ye un recursu estilísticu-. Toos y toes dicimos enchipaos/es que sabemos ú ta’l problema y qué exemplos de participación política válidos hai na nuesa redolada. Toos y toes coincidimos n’afalagar a la unidá dende abaxo y n’horizontal, el trabayu combativu en toles estayes de la sociedá y la participación nos movimientos sociales, pero depués facémoslo too bien a la escontra.

Pero tamién hebo rellumos positivos nesti añu aciagu. Les agresiones y la represión tamién dexaron evidencies de lo que podemos algamar axuntando fuercies. Fuelgues, manifestaciones, nuevos espacios lliberaos, marches, llucha na cai…Enxamás hebo un momentu más afayadizu pa trabayar dende la base nin vimos una receptividá social tan amañosa pa que les nueses propuestes trescalaren na sociedá. Como dicía Nuberu güei sí que “n’Asturies ye la hora de la llucha y el llabor”.

Nin la griesca heroica de los mineros colos GRS, nin la manifestación histórica énte los premios principiegos. Pa mi, la imaxe esperanzadora d’esti 2012 que fina ye la de la comisaría de Xixón arrodiada de xente na última fuelga xeneral pa esixir la llibertá de los sindicalistes presos na mesma xornada.

A entamos d’avientu hebo una cifra que nos dió en focicu: 105.216 trabayadores asturianos y asturianes condergaos al paru.  105.216 razones que son abondo pa nun abandonar la xera.

Nel 2013, ¡más y muncho meyor!

¡Puxa los y les que lluchen por Asturies!

Falábemos nel anterior artículu d’esti blogue de cómo l’amenaza d’intervención per parte del gobiernu español nel nuesu país suponía’l facer d’Asturies un llaboratoriu de prebes bien afayadizu pal xacobinismu español. Nesa estratexa recentralizadora, que muncha xente yá víemos venir cola sida de la crisis económica, el nacionalismu español cunta col sofitu incondicional de los denomaos “mercaos” y mata dos páxaros col mesmu tiru, dexando vía llibre pa l’anulación de los derechos individuales y coleutivos de los ciudadanos/es y países que conformen l’estáu.

Nesti sen, el desaniciu de los conceyos asturianos tal y como los conocemos anguaño ta na fueya de ruta del españolismu gracies al enfotu d’UPyD, un partíu qu’anque algamare l’entrar na Xunta Xeneral nel “replay” electoral de Cascos nun cunta con nengún conceyal en toa Asturies, polo que se-y presupón o mui poca conocencia de lo que son estes instituciones o muncha gana d’eliminalos por razones evidentes. Como nun podía ser d’otra manera, la esixencia de los de Rosa Díez contrastó col silenciu cómpliz d’una clas política dirixente que, avezada a siguir les normes de les sos sedes centrales allugaes na capital del reinu -Cascos incluyíu-, nun sabe siquiera cómo posicionáse, debatiéndose ente’l rechazu a perder cotes y cuotes de poder corruptu nos conceyos y n’aplaudir coles oreyes pola posibilidá de ver cumplío aquello del “España una y no cincuenta y una”.

Güei La Nueva España -diariu que fuere n’orixe’l panfletu de la Falange y que, “paradóxicamente”, nos últimos meses fizo tolo posible por promocionar a UPyD- espublizaba una propuesta de “reorganización” de los conceyos asturianos, suprimiendo la mayoría d’ellos y dexando en 21 a los 78 qu’anguaño formen alministrativamente’l nuestru país. La supresión de conceyos, la institución política más averada al pueblu, nos que se reflexa de dalguna manera l’aplicación de la democracia direuta tradicional asturiana basada nos “conceyos abiertos” o nes “sestaferies” -el trabayu comunal ente tolos vecinos- ye un pasu alantre haza la degradación del feble contestu “democráticu” nel que ta Asturies, por nun falar del caos nos servicios sociales que xeneraría de siguir alantre esti despropósitu, mui al estilu de los tiempos que cuerren, de desmantelamientu xeneral d’unos derechos que se presuponíen ganaos dafechu.

La propuesta, alloriante pa cualquier persona que conoza un puquiñín Asturies, non sólo ye inxusta sinon qu’amás -y anque esti nun seya’l debate- ye insultante nel momentu nel que se plantega nel nuesu país, siendo ún de los territorios onde los conceyos son más grandes nel estáu. Nun podemos escaecer tampoco lo vergoñoso del proyeutu de “Ciudad Astur”, un apueste pola masificación del centru del país a costa de la despoblación de les ales, un apueste pola especulación y  nada consecuente col mediu ambiente. Un apueste por convertir a Asturies nun centru comercial con xardines a los llaos, la desapaición del modelu de producción agrariu, pesqueru y ganaderu que tanto cafia a los poderosos de Madrid y Bruxeles. En definitiva, la  desnaturalización del modelu territorial, social, económicu y ambiental d’Asturies. Nun siendo un país, nin capital fai falta, nin muncho menos democracia.

Una Asturies más colonial que nunca. Tócanos ser la dinamo llétrica del estáu, y esperar de rodieyes a que venga dalguna migaya d’arriba (o d’abaxo, del otru llau del cordal). Esi ye l’enfotu de los delegaos políticos de Madrid n’Asturies, el consiguir qu’Asturies torne a ser la Provincia de Oviedo franquista ensin derechos sociales, nin individuales, nin coleutivos, un suañu que puede consiguise en trés cómodos pasinos:

1u- Intervención de la Xunta Xeneral y desapaición del más mínimu niciu d’autogobiernu políticu p’Asturies. Devolución de toles competencies, conversión de les Conseyeríes no que realmente fueron siempre: Delegaciones Provinciales de (ponga equí lo que-y paeza).

2u- Desaniciu, supresión y fusión de los conceyos asturianos. Apertura d’un parque temáticu col nome de “Ciudad Astur S.A” nel que l’accesu a la vivienda va siguir siendo prohibitivu, nel que s’especule col territoriu y se degrade inda más la sanidá y la educación. Ta de moda, l’estándar pónlu Esperanza Aguirre.

3u- Ensin conceyos, con una Xunta Xeneral ensin atribuciones, ¡¿pa qué faen falta eleiciones n’Asturies, col gastu que suponen?! Reimplantación de la “Diputación Provincial de Oviedo” compuesta por “notables de la región”.

Escenarios esperpénticos -anque non tan llonxanos, visto lo visto- aparte, queden delles coses clares a la vista d’esti panorama:

– Que’l centralismu español ta aprovechando la coxuntura económica , amás de pa facer pagar la crisis a les propies víctimes del so sistema de producción capitalista, p’abordar tamién la reconfiguración d’un estáu español nel que namás cabe “una, grande y libre”.

– Que’l modelu autonómicu español ye una farsa y qu’Asturies nun cuadra nesa falcatrúa. El nuesu país ye’l primer sitiu onde se llanza un globu-sonda que nun ha cayer embaxo a xente d’otros territorios del estáu que puedan venir detrás.

– Que, lo mesmo los conceyos que la Xunta Xeneral, son instituciones del pueblu asturianu ganaes a pulsu que, anque anguaño adolecen de fondos déficits democráticos, nun debemos arriesganos a perder, porque ensin elles Asturies nun ye Asturies nin se representa a sigo mesma.

El sábadu 26 de mayu, un día dempués de cumplise’l 204 aniversariu de la declaración de soberanía d’Asturies y de la creación del exércitu defensivu y la bandera asturiana, ta convocada una concentración n’Uviéu a les 13h. énte la Xunta Xeneral col lema “Asturies Decide”. Que seya la primera de munches movilizaciones más. Que valga pa entamar a ximielgar concencies.

La existencia d’Asturies, como entidá política propia, ta güei más cercana a la so desapaición. El nuesu país, el que, como diz Faustino Zapico “entraba pela puerta grande na era contemporánea” cola declaración de soberanía de la Xunta Xeneral el 25 de mayu de 1808 ve amenazada, otra vegada, la so integridá.

L’andanada mediática, con vocación de convertise en realidá o non, per parte del ministeriu de facienda del estáu español onde s’amenaza explícitamente cola “intervención” de la economía asturiana amparándose  nel contestu políticu ye un fechu gravísimu que, de concretase, sedría merecedor de ser consideráu como un güelpe d’estáu que nun vendría más qu’a demostrar lo feble y tramposo del modelu “autonómicu” español.

Esti movimientu, inéditu na historia recién tres de la “transición democrática”, nun ye casual. Dánse toles condiciones n’Asturies y fuera del nuesu país pa que’l xacobinismu ideolóxicu (y económicu) español dea’l pasu pa la suspensión del autogobiernu de cartón-piedra que nos vienen regalando dende’l primeru de xunu de 1979 la clas política embaxadora del gobiernu español n’Uviéu.

El contestu económicu y políticu européu, onde los estaos miembru nun faen otro que plegase y aplicar con gustu los mandaos de la maquinaria del capital, abre una puerte al tardofranquismu pa entrar a degüellu y anular les instituciones polítiques propies de les naciones que conformen anguaño l’estáu español, entamando pola que ta nuna situación más precaria: Asturies.

El nuestru país axunta toles carauterístiques precises pa ser un llaboratoriu de prebes bien afayadizu nel qu’abordar esa recentralización brutal del estáu. A la composición caótica de la Xunta Xeneral, tres de dos eleiciones nacionales nes que la única opción que sal reforciada y llexitimada ye la de l’abstención y, con ella, el desprestixu de l’aición política, hai qu’amestar la non presencia de partíos nin un movimientu social non sucursalistes pa con Madrid nin pa colos retayos de los nuesos derechos. Si, amás, la llave de la “gobernabilidá” -si puen llamar gobernabilidá a lo que vienen faciendo n’Asturies trés décades- ta en manes d’un partíu que tien como oxetivu final la devolución de toles competencies a Madrid y el desaniciu de los conceyos, la fórmula queda resuelta.

El silenciu cómpliz de la FSA, el brazu más nacionalista español y acomplexáu del PSOE, pa col estáu d’escepción políticu nel que quieren dexar a Asturies ye’l mesmu que’l que los de Rubalcaba prautiquen cuando nun cuestionen nin una migayina les agresiones que cada vienres exerce’l conseyu de ministros de Rajoy. A la fin, si tuvieren gobernando diben facer poco más que lo mesmo. Y ye que, dempués de trés décades de sumisión a Madrid y al neolliberalismu asesín, ¿qué vamos esperar d’ellos a estes altures?.

Capítulu aparte merez el partíu ultra “UPyD”, que tres del “replay” de les eleiciones entraba na Xunta Xeneral, una formación que diz surdir pa romper el bipartidismu y lo qu’insiste en proponer n’Asturies ye un gobiernu de concentración PP-PSOE, llogru que Rosa Díez, en boca del so muñecu de ventrilocuista Nacho Prendes, de xuru vendería como “gesta nacional” per tol imperiu hispánicu.

Desgraciadamente, Asturies, la xente asturiano, ta indefenso énte estos ataques, por muncho que la retórica del partíu de la mano derecha -en tolos sentíos- d’Aznar s’antroxe d’asturianu, una definición que concasa perbién cola definición que Nuberu roblaba pa, precisamente, dexar claro qué nun ye ser asturianu. Tampoco ufre nenguna alternativa la coalición de los que regalen los votos al PSOE pa, yá si eso dempués, discutir -nin siquiera lleguen a negociar- mínimamente’l programa a desendolcar.

Na nuesa nación ta cociéndose’l nuevu modelu d’estáu, nel que namás onde hai movimientos que planten cara a la homoxeinización política, cultural y económica del capitalismu d’estáu español van tar en condiciones de contestar y evitar. Somos el campu de maniobres de la reorganización de la “unidad de destino en lo universal” del reinu español y lo pior ye que muncha xente n’Asturies tovía aplaudirán esta galmiada p’atrás guiao pola desilusión endémica na que la política asturiana nos dexa tres de la llegada del “autonomismu”.
Hai que facer un llamáu a la sociedá asturiana pa entamar a organizar la insubmisión dafechu a los mercaos, al FMI y al BCE, a la dictadura del eurodólar y a la ruina económica que nos siguen imponiendo dende Madrid y Bruxeles col so imperialismu económicu y cultural. Hai que facelo bien aína y afuxendo del populismu vaciu de conteníu políticu. Dar una salida asturiana a la estafa del capitalismu.

Nel nuesu cuentu de “Pedro y el llobu” l’amenaza del llobu siempre foi verdá: lo único que camuda ye qu’agora tán muncho más cerca. Los precedentes tán ehí, el modelu de rempuesta históricu del pueblu asturianu tamién. A ver si somos a ponenos d’alcuerdo pa plantar cara.

Tinía que pasar enantes o dempués. Asturies, per primer vegada, enfréntase a una cita eleutoral propia compartida con Andalucía, precisamente, el país dende’l que s’escriben estes llínies. Como si fuéremos una nacionalidá “hestórica” de les que lo ponen per escrito. Nestos 6 meses dende les eleiciones últimes a la Xunta Xeneral vimos fracasar el “fenómenu Cascos” polos sos propios errores políticos y pol proceder xostrón pa xestionar eses mesmes decisiones.

Francisco Álvarez-Cascos I “el Breve” d’Asturies y Madrid

Si entendemos que les espeutatives qu’una parte importante de la xente que votó a Cascos taben puestes na anovación política nel nuesu país, na superación de los rexímenes corruptos y de crisis permanente que dexaron p’Asturies los sucesivos gobiernos del PSOE podemos dicir que nestos 6 meses el nuevu presidente asturianu echó per tierra toles sos posibilidaes. He de reconocer qu’anque munchos y munches sabíemos mui bien de qué partíu (y partíos) venía Cascos y les polítiques rancies neocón que diba aplicar nun dexa de chocar la so torpeza a la hora d’executales. Con esi proceder torpe, improvisáu, el llíder de FAC “sacó la motosierra” con tantu rixu qu’acabó mancándose con ella. Y ye que xugar col tronzón tamién ye un deporte de riesgu.

Básicamente, el llabor de FAC y Cascos consistió nestos meses n’enguedeyase n’Asturies coles patates calientes de la xestión pública neglixente de la FSA pa dexales inda peor de lo que taben, n’apoyar tolos retayos brutales nos derechos sociales de Rajoy en Madrid -reforma llaboral xabaz incluyida- y en nun facer cásique nada más que buscar polémiques innecesaries y un revanchismu infantil que nin supieron nin quixeron xestionar.

Mención aparte merecen, nesti sen, les polémiques cola RTPA, el “Centru Cultural Niemeyer” d’Avilés, el “Festival Internacional de Cine de Xixón” (FICXixón), la “Semana Negra” etc. nes que lo mesmo Cascos que los demás cargos políticos implicaos entraron neto qu’un elefante nuna cacharrería saliendo mui afeutaos poles sos decisiones caprichoses, antipopulares (paez mentira pa un populista como elli) y “carcas”.

Asina, no que cinca a la RTPA, en cuenta d’iguar la situación vergoñosa d’esternalización y precariedá de los y les trabayadores y la potenciación de productores públiques y d’un texíu audiovisual pal país que respete la cultura asturiana, desanicióla dafechu dexando na cai a centenares de persones que nenguna responsabilidá teníen nel diseñu nefastu de tele asturiana de PSOE-IU y que yá taben nuna situación escandalosa. No tocante al Niemeyer, improvisó permanentemente’l futuru d’un equipamientu, seguramente sobrevaloráu pola población d’Avilés y con una xestión del  réxime anterior de xulgáu de guardia, pero que cola so incompetencia convirtió nun arma a la so escontra en cuenta de tolo contrario. Cola maniobra del FICXixón xenera un problema onde paez ser que Xixón nin FAC lu teníen, cola actuación estelar del conceyal de cultura qu’arrastra pa consigo una griesca mediática na que la cultura asturiana sal chiscada y humildada. Asemeyao, anque nesti casu sí hai un conflictu que vien de llargo, tamién regala a la oposición el partíu de Cascos una baza col casu de la Selmana Negra.

Poro, tolos ámbitos culturales y sociales que precisaben d’una reformulación en clave muncho más social y munchísimo más asturiana y controlada, non sólo nun vamos velos meyor, sinon que, nel más bonu de los casos, van quedar como taben, camudando puestos de mandu, privatizándolos, desaniciándolos o folclorizándolos inda más.

No que cinca a la llingua asturiana el bagaxe ye ridículu, inexistente, escosu. Redúzse a un par de xestos del conseyeru Vallaure por falar en comparecencies n’asturianu y gallego-asturiano y yá ta. Nin plan de normalización (nin perres pa la promoción), nin avances toponímicos, nin cambiu na imaxe corporativa del gobiernu, nin defensa de los derechos llingüísticos per nenyuri. Un mocáu nel focicu d’esa parte mínima del asturianismu que s’echó en manes de FAC esperando avances nesti sen que nin se dieron, nin s’intentaron, nin se plantegaron. ¡Y mientres, en Madrid, pautando con UPyD pa da-yos un grupu parllamentariu! El probe Xovellanos revuélvese na so tumba.

PPSOEIU: a nun-y dar aire a FAC y, de pasu, a xugar puerco cola cultura ya identidá asturiana
Y entós, mientres FAC s’enllamuergaba colos equipamientos desastrosos heredaos del arecismu o con reñer como guaḥes con LNE, el PSOE, PP ya IU, entamaron a actuar como si fueren los mayoronos nel patiu la escuela al ver qu’otru entruga por sitiu pa xugar. Enfurrúñáronse y ficiéron-y la cama a un FAC que queda desarboláu dende’l primer momentu, ensin opciones, ensin presupuestos y con una capacidá de gobiernu tan llimitada como’l discursu populista y ranciu del so llíder que fuere militante daquella d’Alianza Popular.

Lo que más llama l’atención ye que la mayoría de los ataques a Cascos per parte, sobremanera, de la “izquierda plural del PSOE-IU” nun inciden na so condición de neocón privatizador y “lliberal” (de los malos). Ye chocante la campaña de los xestores del réxime anterior por confrontar con una supuesta vocación asturianista de FAC que como yá se dixo nesti artículu y como queda amosao colos sos “llogros”, nin hai nin se ve per nengún llau. Si la polémica del día yera’l Niemeyer, la “izquierda plural” arremetía escontra l’Arte Asturianu. El nuestru prerrománicu, espresión artística única nel mundu y esclusiva d’Asturies que ta nel más total abandonu como munchu del patrimoniu hestóricu, sobremanera si esti ye “diferencial”, yera asina emplegáu como sacu de boxéu. Si’l tema del momentu yera’l FICXixón la consigna yera’l facer de menos lo asturiano emplegando pa ello “la madreña, la boina y la montera picona” como supuestos complementos “chic” de la tribu urbana de los FACkers. ¿Ye la posibilidá de qu’heba un asturianismu real na Xunta Xeneral de lo que tantu mieu tienen PSOE-IU y PP? ¿Pa eso solfaten el protorrexonalismu casposu de FAC? ¿Pa que nun surda y xorrezca un asturianismu o nacionalismu asturianu nel futuru?.

L’asturianismu, nacionalismu o soberanismu, quedaba asina ente la espada y la paré: cola necesidá de criticar mui duramente’l malgobiernu de FAC pero ensin cayer nel antiasturianismu radical del que PSOE-IU y PP ficieron gala p’atacar a Cascos. Dábase un escenariu desconocíu, nuevu, nel que nun se podía tar de nenguna manera con FAC nin tampoco colos cosmopaletos que llamaben “aldeanos” a FAC poles sos polítiques, too ello ensin un movimientu con autonomía política plena pa desendolcar les sos propies movilizaciones más alló de les llingüístiques. Y nesti tarrén enllamuergáu hébolos que nun fueron quién a caltener esa equidistancia ideolóxica necesaria na crítica, averándose peligrosamente al discursu FAC o faciendo’l caldu gordo a la “izquierda plural” a costa de la dignidá de la nuesa cultura, hestoria y llingua. Eso sí, tamién hai que dicir qu’afortunadamente, artículos como los de Faustino Zapico o Pablo Rodríguez Alonso dexaben mui a les clares cuálu yera’l puntu de vista necesariu dende esta redolada ideolóxica del nacionalismu d’esquierda asturianu. Y menos mal.

La coordinación del nacionalismu asturianu, cada vegada más necesaria pero tamién cada vegada más cerca

“Cuenta la lleenda qu’hebo una vegada unes eleiciones que vinieron bien al nacionalismu asturianu”. Gracies aparte, lo cierto ye qu’onde otres ideoloxíes y movimientos ven otru frente de llucha más, nel que se reivindicar y col qu’avanzar, al asturianismu siempre lu garren col pasu cambiáu. Nun valen les escuses, estes son unes eleiciones qu’entraben dientro de los escenarios posibles y probables dempués del resultáu que dexó a FAC como partíu parllamentariu con más escaños pero ensin mayoría absoluta. Sabíemoslo.

Anque suene ventaxista’l facelo agora, l’actividá del nacionalismu / asturianismu / soberanismu d’esquierda asturianu lleva n’estáu d’hibernación, sacante nel conceyu de Noreña, dende les últimes eleiciones. Y asina nun vamos a nenyuri. Nun ye normal, nin presentable, nin aceptable qu’ente comiciu y comiciu nun se caltenga un trabayu de cara a la sociedá qu’asegure unos meyores resultaos nes próximes cites y años, porque’l trabayu d’avance internu ye necesariu y básicu, pero ensin movese de puertes p’afuera nun hai futuru nengún.

A la fin, nesta cita, tenemos dos candidatures otra vegada bien asemeyaes na ideoloxía de les sos militancies y del so eleutoráu. Nel mes de febreru, tres de la convocatoria d’eleiciones pal 25 de marzu, un grupu de persones vinculaes al nacionalismu y asturianismu cultural y políticu asoleyó una carta abierta al asturianismu, nacionalismu, movimientos sociales y a tola sociedá asturiana.  Nesta carta apaecía xente, ente otros, visiblemente vinculao anguaño y antaño a organizaciones como Unidá Nacionalista Asturiana, Izquierda Asturiana y a Andecha Astur, asina como persones d’altor simbólicu pa nós como Ambás y Xune Elipe. Nel manifiestu afalábase a la construcción d’una coalición eleutoral d’urxencia ente Bloque por Asturies, UNA y Andecha Astur. Estos movimientos, xunto a otros más en clave interna, paecíen abrir más que nunca les posibilidaes pa una candidatura conxunta que munchos afalábemos, afalamos y vamos siguir afalando y alendando.

Ye mui significativo qu’esta vegada, un llamáu del calter d’esti, nun seya unidireicional o venga patrocináu namás por una de les families del nacionalismu asturianu. Anque a la fin nun s’algamare una coalición, paez que cada vegada ta más claro que la presión esterna ya interna de militantes y simpatizantes ha de finar por poné-y igua a esta situación inmovilista y llaceriosa.

Nun ye normal nin xustificable qu’en cada procesu en favor de la unidá heba un piñu de militantes qu’énte la desilusión abandonen la so militancia activa. Nun ye razonable que nesti momentu, nel que nun se presenta’l PAS, por exemplu, y nel qu’hai abiertos procesos de xuntura, la militancia del nacionalismu asturianu seya sensiblemente más baxa y menos visible socialmente que cuando les organizaciones taben un poco más atomizaes. Si’l procesu de converxencia ensin plizcu d’autocrítica o reflexón que tamos viendo y viviendo casi yá na última década ta mandando a más xente p’afuera de les organizaciones que pa dientro dalgo tamos faciendo mal. Si la suma de votos y militantes, per separtao y dempués de delles xuntures parciales, nun fai más visible’l nacionalismu d’esquierda asturianu ye que dalgo tamos faciendo, insisto, mal.

A munchos y munches danos yá igual de qué candidatu o qué candidata hemos d’apegar cartelos, falar bien y repartir panfletos. Namás demandamos un marcu, un espaciu abiertu, nel que trabayar, conocenos, aldericar, charrar, collaborar, coordinanos, discutir. Esborriar del nuestru vocabulariu políticu conceutos como’l de “talibanes” o “vendíos”. Reconocer a toles partes, da-yos capacidá d’espresase, de participar- A les puertes d’un nuevu sapiazu eleutoral hai que facer un últimu llamáu a files pa caltener la dignidá mesmo güei que na nueche del 25 de marzu. Nun necesitamos otru domingu eleutoral d’autoflaxelación pa siguir faciendo lo mesmo los meses vinientes.

D’otra banda, hai esperanza. Hai una xeneración, la más moza del nacionalismu d’esquierda, que sí, quiciabes tea más inactivo que n’otres dómines, pero ta más comunicao qu’enantes; que yá nun precisa pa saber de los d’al llau de sentir batalles que vienen de vieyo. Xente que nun conoció como militante los momentos de más griesca nos últimos años; que tamién se sofita nel bagaxe políticu que-yos dexen los que tuvieron y siguen tando. Rapazos y rapaces que xunto a la xente que vien calteniendo’l pesu de les organizaciones na última década tien muncho que dicir.

Teo collacios y collacies y xente a la qu’almiro personal y políticamente en Compromisu (Bloque-UNA-LV/GV) y Andecha Astur. Los/es primeros/es preséntense col envís de caltener los mesmos votos que nes últimes, lo que-yos permita siguir alantre cola dinámica interna, dando por sentao, na mio opinión enquivocadamente, que yá tienen ganáu’l votu del asturianismu más convencíu y apostando por garrar votos acuyá’l nacionalismu. Inclúin nesta ocasión a un partíu-franquicia como colchón p’amarrar al máximu anque esti fechu faiga rescamplar inda más l’ausencia d’alcuerdu con Andecha Astur. Estos, precisamente, preséntense buscando un votu muncho más ideoloxizáu y cercanu que-yos permita siguir cuntando como interllocutor a partir del 25 de marzu, eso sí, emplegando d’una manera poco entendible’l manifiestu pola coalición unitaria del que falábemos enantes como argumentu pa facelo. ¿Nun sedría meyor nun se tener presentao y siguir defendiéndolu como fueya de ruta?

Agora bien, a Andecha Astur hai que-y pidir que’l 26 de marzu tea la mesma xenerosidá, como poco, qu’en febreru cuando soscribió aquella carta abierta pola unidá. Cualesquier pasu atrás nun ye almisible nesti momentu y debilitaría la so posición dafechu. La militancia d’Andecha, anque quedare desilusionao como tantos y tantes otros y otres pola non apaición d’una coalición, nun puede enrocase enxamás.

Al Bloque por Asturies y a Unidá Nacionalista Asturiana hai que-yos demandar flexibilidá pa tar al altor. Nun val escondese tres d’un procesu internu-matrioska que se diz tan aparatosu como pa impedir la unidá del nacionalismu asturianu d’esquierda nuna situación d’urxencia con unes eleiciones como estes delantre. Han de reconocer ensin reserves la existencia d’una organización que se llama Andecha Astur qu’anque tamién se tien enquivocao, como otros ficimos munches vegaes, ta ehí, y ta formada por xente que puede aportar muncho si lo fai en comuña.

A la xente independiente, a los y les que colaron pero siguen sollertes a l’actualidá política d’Asturies y del asturianismu, hai que nos ufrir un espaciu nel que participar y desixinos que deamos un pasu alantre pa ponenos tres y al serviciu de les organizaciones polítiques. Nun val de nada’l tar glayando en castañéu si dempués, cuando se dan movimientos d’avance mínimos, nun respondemos en positivo, sofitando económica y militantemente lo que se fai bien, que ye muncho anque siempre aneciemos más nes crítiques que nos aplausos.

Con esti panorama, la bola extra que nos regala la non aprobación de los presupuestos de Cascos, con tola prensa del estáu mirando p’Asturies, con eleiciones namás a la Xunta Xeneral dexando a un llau los conceyos -esi puntu feble del nacionalismu asturianu-, ta perdida enantes de que soltemos el disparador y entame’l xuegu del pinball. Eso sí, la xuntura esta vegada nun cayó por bien poco. Que les persones que tean por ella sigan trabayándola dientro de les organizaciones y fuera d’elles. Y que, por fin, del 25 de marzu p’alló, entamemos a falar menos de xuntances y más de programes, d’estratexa, d’entregar el timón del movimientu a los y les militantes del nacionalismu d’esquierda ¡y a da-y otra traza a Asturies!

Dempués d’una bona tirada de meses ensin anovar esti blogue -pero non por ello ensin dexar d’aldericar con muncha xente en persona y, sobremanera, al traviés de redes sociales y microblogging– vamos echar una güeyada, dende una óptica d’esquierda soberanista, al panorama que se presenta n’Asturies y redolada ideolóxica y xeográfica énte les eleiciones estatales del 20 de payares.

Esta ye la so “democracia”

Nos últimos años, y especialmente dende que nel añu 2008 españare –tamién– nos países del primer mundu una crisis económica que llevaba décades afogando a los más probes del planeta, venimos viendo cómo cada vegada hai más sectores de la población que se decaten de los déficits democráticos que carecemos viviendo nuna dictadura del capital, na que les instituciones pretendidamente democrátiques non sólo nun lo son sinon que siguen  cada vegada más -y cada vegada más evidentemente- secuestraes polos mercaos, grandes empreses tresnacionales y la banca internacional. Asina, los estaos y los sos gobiernos turnistes, vienen garantizando’l caltenimientu del statu quo que beneficia a unos pocos, al poder económicu, al traviés de la puesta en práutica de métodos d’escluxón participativa del pueblu no cincante a la toma de decisiones, de lo cual son exemplu perfeutu unes eleiciones como les del 20 de payares, nes que yá ta too vendío y empaquetao.

Nesti estáu nel qu’inda naide refrendó la monarquía, nel que les eleiciones pasen por ser un llaváu de cara de la parademocracia regalada y nel que la participación redúzse a introducir una papeleta nuna caxa tresparente cada X años, tampoco podemos enfotanos. Unes eleiciones nes qu’unos xueguen coles cartes marcaes (prensa, publicidá, medios, inyeiciones económiques de grupos empresariales, usu partidista de les alministraciones…) déxennos nes manes del bipartidismu más cruel y sangrín, que nun dulda en facer piñu si siente amenazáu’l so chiringu. Concretamente, esta vegada nun podemos dexar de llau que nestes eleiciones y per primer vegada, fízose obligatoria la presentación d’avales (un 0.1% de los censaos/es) pa poder tener derechu a participar nunos comicios, lo que supón un retrocesu democráticu evidente pa les opciones non mayoritaries que foi una torga pa la participación de delles opciones polítiques que quedaron arrequexaes, lo que supón un avisu mui seriu nesta dómina na que nos tocó vivir y lluchar: “a los que molesten, pilancos”.

8 escaños ¿asturianos?

Respírase nel aire políticu asturianu un golor a revenío que tien nomes y apellíos. Les llistes de los partíos con representación na Xunta Xeneral arrecienden a vieyo. Nomes como Antonio Trevín, Vicente Álvarez Areces, Isidro Rozada, Cherines, Carcedo, Morán, Ovidio Sánchez o’l mesmu Gaspar Llamazares, toos ellos nos cartelos eleutorales xunto a la bisarma d’Álvarez Cascos, espeyen mui bien qué ye Asturies pa ellos: poco más qu’un caladeru de votos ensin qu’heba siquiera una mínima voluntá de representar los intereses d’esti país de manera autónoma o non dependiente de lo que-yos dicten nes sos sedes dende la capital del reinu. Esos nomes, que podríen tar guapamente nel hall of fame (lléase n’inglés o n’asturianu)  de los responsables políticos de la situación na que ta Asturies dende l’entamu del postfranquismu, son l’apueste de los partíos mayoritarios n’Asturies. Los mesmos perros col mesmu collar, que si cuadra, voten escontra los sos propios intereses n’Asturies porque lo manda l’aparatu.

Nesti sen, nes eleiciones de la vergoñosa efemérides, vamos topanos cola mareona neolliberal de la gavilueta de la que’l mayor responsable ye’l PSOE y les sos polítiques neocón. Nel estáu español, nun momentu tan complicáu pa la sobrevivencia física de munches persones, vamos pasar de tener un gobiernu de la derecha neolliberal gobernáu por Rodríguez Zapatero a un gobiernu de la extrema derecha más católica y fascista sofitáu por millones de votos de la clas trabayadora, desemplegada y precaria. Van ser tiempos de retayos, de privatizaciones pero tamién de movilizaciones y de llamaos a reorganizar les files de la esquierda real n’Asturies. Al tiempu, los medios de comunicación afines al PSOE tornarán a facer d’altavoz pa les movilizaciones que facíen por acallar demientres el gobiernu de ZP y esta coxuntura, xunto cola propia dinámica del movimientu 15M, van retrotraenos a una dómina asemeyada a la de la segunda llexislatura del Aznaratu na que va ser perinteresante participar y facer por ganar llexitimidá ente la población.

La esquierda soberanista/nacionalista/asturianista: incapaz de coordinase

Per otru llau, si’l contestu llegal que nos apurre la llegalidá constitucional monárquica española yá yera llaceriosu, nesta ocasión, na mio opinión, dánse desgraciadamente dellos condicionantes que faen fondamente previsibles y desmotivantes pal conxuntu del asturianismu políticu y cultural estes eleiciones, al tar precisamente la esquierda nacionalista/soberanista/asturianista probablemente nel momentu de mayor crisis d’idées, proyeutos y militancia activo que se viere dende’l so aniciu embrionariu de los setenta p’acó.

D’una banda, acoyíemos con interés una serie d’artículos asoleyaos en setiembre en dos medios dixitales asturianistes de Mariu Arbesú (Andecha Astur, candidatu por Conceyu Abiertu) y Rafa Palacios (Bloque por Asturies, candidatu de Bloque-UNA Compromisu por Asturies),  onde s’afalaba a la constitución d’una mesa de negociación y a la unidá, respeutivamente, pa facer frente común nestes eleiciones del 20P. Dambes intenciones quedaron pa prau y, primero, UNA y dempués el Bloque por Asturies anunciaben que nun se diben presentar. Conceyu Abiertu, la plataforma impulsada dende los seutores más averaos a Andecha Astur pa trabayar a nivel de conceyos -a pesar de presentase a la Xunta Xeneral- tampoco lo diba facer. Un PAS que quedó práuticamente fundíu tres del últimu revés eleutoral, nin siquiera facía l’amagu y, de dalguna manera, dellos vimos nesta situación un momentu perafayadizu pa que se ficiere un altu na dinámica de les organizaciones d’esti ámbetu, que dende 2003 siguen la llei de poner el carru delantre los gües. Una pausa pa reflexonar, ver ónde tamos y qué queremos, con quién cuntamos y qué plazos y espeutatives vamos xenerar. Un bon momentu pa entamar una reconstrucción de la esquierda nacional con pegoyos fuertes, como se taba faciendo n’otros países cercanos xeográficamente pero que, tamién ye verdá, tán a años lluz de la nuesa dinámica inda embrionaria.

Asina, los que naguábemos por que per una vegada se garrare una de les dos opciones bones (o presentáse toos xuntos o, toos xuntos, nun se presentar y entamar a trabayar mesmamente na propia campaña eleutoral nesa unidá d’aición tan cacarexada en toles families d’esti movimimientu) víemos como s’abría pa la segunda d’elles, de xuru la más fácil acordies cola situación d’incomunicación y desarticulación de la esquierda soberanista, una rayadina de sol qu’a más d’ún ilusionó delles hores.

Ensin embargo, díes dempués Andecha Astur, nun movimientu que por mor de la situación llegal na que s’atopaba la siegla munchos nun esperábemos, fai anuncia de que se presenta a les eleiciones y asina lo desplica’l propiu Mariu Arbesú n’otru artículu na prensa dixital n’asturianu con Arturu Xosé Bermeyu como candidatu al Congresu. Dexando claro enantes de nada’l derechu innegable (por nun falar “d’obligación”) de cualisquier partíu a acudir a unes eleiciones y tamién, por qué nun dicilo, deseá-y lo meyor a la candidatura, paecía evidente qu’esi escenariu imaxináu nel qu’entamar a trabayar en comuña esmucíase per momentos. Como reaición, apaecía un artículu de Roberto Holgado (anguaño na UNA) espresándose en nome d’un grupu de militantes que taben n’Andecha Astur demientres les negociaciones con IAS que finaron col proyeutu d’Unidá y UNA falando d’esi mesmu conflictu poles siegles y, de dalguna manera, apagando fueos con gasolina.

Una vegada más, una de les mancadures más traumátiques que venía careciendo la esquierda nacionalista/soberanista/ asturianista non sólo nun cicatrizaba sinon que la pantasma del desalcuentru paez que puede finar por cortar les poques pontes que quedaben perende y dientro d’un movimientu tan precariu. Andecha Astur, a la fin, va tar presente nestes eleiciones nes que, na mio opinión, nun tocaba tanto’l gatuñar esos votos patriotes y concenciaos que van llega-yos dende Asturies y mui especialmente dende los que tamos lloñe d’Asturies, sinon facer por iguar con tola xenerosidá del mundu los nuesos problemes internos pa presentanos con muncha más seriedá énte la sociedá asturiana nun futuru próximu.

D’equí p’alantre: reconocer el problema, apautar unos calces pa igualu y trabayar pola unidá popular

Como dicíemos enantes, estes eleiciones van dexar un panorama desolador pal nuestru país, pal conxuntu de los trabayadores, cola mayoría absoluta del PP tres d’una xestión llaceriosa del PSOE en materia económica y social, resultante d’entregar a les grandes corporaciones empresariales les instituciones como si esten fueren poca cosa más que xuguetes nes manes del capitalismu.

D’otra banda, ye chocante’l cómo una parte del asturianismu cultural, pequeña pero representativa, pudo cayer nel xuegu macabru d’Álvarez Cascos y el so “Más Asturias, mejor España” (qu’en Madrid ye “Más Foro, mejor España” pa frenar “a los nacionalismos y reforzar a España” y que tuvo a piques de ser de la mano de la mesmísima María San Gil). Quiciabes tengamos que pensar nes propies dinámiques de fracasu tres deceición d’esto que llamamos esquierda nacionalista/soberanista/asturianista y nesi enclín psicolóxicu -cuasi psiquiátricu- que desplique la necesidá de xubir al carru d’un proyeutu que diba garrar poder, cayendo otra vuelta na nuesa dependencia endémica d’un énte superior nel que ser el “lobby asturianista qu’influya dende dientro” en cuenta de construyir les nueses propies estructures polítiques autónomes.

Nesta situación tan prieta, cada vegada se fai más urxente l’ufrir un espaciu d’alcuentru unitariu pa la esquierda soberanista asturiana. Un espaciu que nun ponga más rixu que’l necesariu pal propiu alcuentru, alderique, contraposición de postures y conocencia de toles opiniones y persones. Un llugar nel que se pueda dar la voz al/la militante y al/la simpatizante ensin más consignes que’l topar puntos d’alcuentru ente les estremaes espresiones pa ver qué posibilidaes y qué torgues hai pa desendolcar un trabayu políticu conxuntu. Un sitiu, a la fin, pa debatir y afitar unos pegoyos ideolóxicos comunes, un marcu nacional afayadizu y unos símbolos básicos apautaos que nos faigan paecer como dalgo organizao al tiempu que plural nun plazu mediu énte la sociedá asturiana. Dalgo que nun se fai dende hai décades y que valdría pa saber a qué tamos xugando. El problema, como cásique siempre, ye’l topar quién o quiénes tengan llexitimidá y credibilidá interna dientro de la esquierda soberanista pa plantegar un espaciu como esti ensin que sía otru esperimentu fracasáu enantes de nacer.

Nun quiero tampoco dexar de llau la importancia que tien pa les lluches nacionales nel contestu estatal la fin de la violencia d’ETA.  Per una parte, y anque yá toparán otres escuses, paez qu’habría finar el tiempu de la criminalización a toos y caún de los movimientos y persones que reclamen un marcu pa que los pueblos s’espresen en llibertá. Esa criminalización carecida dende la década de los 70 pa engochar a cualquier coleutivu social, llingüísticu, políticu que custionare la soberanía española queda ensin argumentos p’aneciar neses postures. Pasín ente pasu presta ver tamién cómo n’otros sitios el bon facer y el diálogu ente mesmos actores del movimientu pudo xenerar esta situación de fuercia na qu’agora s’atopen. Ehí hai muncho de lo que deprender.

Pa finar, paezme que ye’l momentu de que la xente más mozo y que vien con puxu garre posiciones y responsabilidá, y xunto colos seutores más implicaos y maduros d’esti movimientu qu’entá tienen muncho qu’aportar, faigan por da-y otra traza a Asturies. Ensin priesa pero con ambición y pasu ente pasu. Si lo facemos bien, si emplegamos una pedagoxía política afayadiza, si espardemos la idea texendo redes dende abaxo con coherencia, de xuru que vamos consiguir la implicación de muncha más xente y, pali que pali, afitanos como una referencia alternativa n’Asturies. ¡Falta fai!

Llegaron les eleiciones, llegaron ensin sorpreses -polo menos pa esti qu’escribe-, y una ventolera ximielgó la política asturiana. Llamentablemente, -anque taba anunciao- esi airón nun vien emburriáu pol contraste barométricu na presión de la esquierda soberanista. Entama agora un escenariu inéditu na política asturiana cola irrupción de nuevos axentes políticos de vieya trayeutoria partidista que vamos dir peñerando pasu ente pasu:

Cascos o l’asaltu al tren del dineru

Anque a una parte mayoritaria de la sociedá-y choque muncho la irrupción de FAC como primer fuercia parllamentaria, dende la configuración del proyeutu “nuevu” de Cascos y viendo les alternatives, taba bien claro qu’a poco que trabayare intelixentemente la posibilidá de dominar la política asturiana taba al algame de les sos manes. Y vaya si lo fizo.

Francisco Álvarez Cascos, antaño conocíu como’l Dóberman d’Ánsar, supo enfocar tola so campaña énte l’eleutoráu asturianu a custiones de tipu emocional que trescalaren na xente. Exemplu d’esto ye l’emplegu d’una imaxe onde la dicotomía “paisanu” y “xestor” foron una constante, remanando mui hábilmente un idioma políticu mui próximu al asturianu mediu del tipu “mientres Espinosa ta nel Ritz yo na Feria de la Xata Roxa en Salas” o “un fuerte apretón de manes asturianes” pa roblar la carta a los eleutores. D’antemano, Cascos cuntaba con una popularidá y conocencia munchos puntos penriba del restu de candidatos/es y foi enllenando auditorios per tolos requexos d’Asturies en díes llaborables, lo que yá adelantaba’l sofitu col que diba cuntar esti 22m.

En cuantes al so programa políticu, amás d’arrodiase d’una bona parte de militancia expepera, tiró en toles sos intervenciones d’una retórica asturiana de “benefactor”, notable/ilustráu qu’apaez n’ayuda d’un pueblu en desaniciu. La recuperación del “arguyu de ser y sintise asturianos”, el votu pseudorrebelde escontra los corruptos de PPSOE y el mitu -qu’esite dende hai munchu tiempu- de ser “la figura que más fexo por Asturies dende Xovellanos” ficieron lo demás. Si a esto-y sumamos l’emplegu indistintu del términu “país” al estilu del ilustráu xixonés -el de verdá, el del sieglu XVIII- y la presencia -más simbólica que de pesu- d’asturianistes como Carlos Rubiera (conceyal inesperáu en Xixón) y Inaciu Iglesias (conceyal en Noreña) tenemos un cóctel tan nuevu como raru na especifidá política asturiana.

El tiempu dirá si fai por presentase a les eleiciones estatales, y formar un grupu parllamentariu en Madrid, y si’l so populismu va tirar pela sienda de la privatización y recortes sociales al estilu de la so amiga y confidente Esperanza Aguirre o, pel contrariu, por un apueste más paternalista -anque tamién ultraneolliberal, por supuesto-, de “presuntu padre de la patria asturiana” que quier que-y faigamos una estatua cuando fine, d’intercesor ente’l gobiernu estatal y Asturies, más averáu a esa supuesta vocación xovellanista que tanto paez gastar.  De mano, habrá que recordar la so trayeutoria franquista y qué partíu-y va dar la presidencia d’Asturies. Acéutense apuestes, y paez que Xandru Fernández tamién anda a la gueta de rempuestes.

PPSOE, l’establishment corruptu asturianu, “on sale”

Nun paga la pena analizar muncho más de lo que yá venimos faciendo perequí la situación de los dos partíos corruptos estatales n’Asturies. El PSOE y les polítiques ultraneolliberales coles que sigue faciendo más ricos a los ricos y más probes a los probes vien de recibir una mocada d’órdagu per parte d’esi eleutoráu que tien muncho más d’esquierda qu’ellos y que -tamién yá-yos val- ye traicionáu per enésima vegada dende que Franco morriera y el monarca nos empresta un día d’eleiciones cada 2-3 años aproximadamente.

Como consecuencia de la hecatombe del neolliberalismu sociata, el PP -exerciendo de partíu turnista a más nun poder- recibe’l mayor de los sofitos na so hestoria nel estáu mientres que n’Asturies, colos colores sacaos por un Cascos que nun tará faciendo otro qu’afilar la cadena de la motosierra pa gobernar, nun saben entá ónde se meter y qué facer: si cellebrar la victoria de la derecha que los dexa en ropa interior na Xunta Xeneral y nos ayuntamientos (Gabino, Pardo tremái) o si dir reasitiándose nun panorama políticu nuevu onde hasta LNE yá rinde honor al nuevu llíder.

Sicasí, el futuru pal PSOE ye inda más prietu, como apunta Faustino Zapico. Con un Javier Fernández medio lloramingando y una élite política investigao por corrupción qu’agora tará pasando’l polvu nos muebles de la conseyería, namás-yos queda’l recursu d’esperar a los recortes del nuevu gobiernu asturianu y estatal pa engordar les dignes pero probes movilizaciones que la esquierda real vien desendolcando toos estos años. Les cais van tar interesantes y habrá que tener munchu procuru pa evitar al máximu que PRISA-PSOE-UXT-CCOO tornen a rentabilizar tol trabayu nes cais, reorientándolu dende elles nós a posiciones de tresformación y non de reforma.

IU, la gran beneficiada, ensin merecelo n’Asturies

A pesar de cargar col muertu (xustu) de gobernar hasta les últimes consecuencies con un PSOE n’aplicación masiva de toles midíes escontra los y les trabayadores, IU sálvase de la quema y llogra resultaos históricos en sitios como Mieres, Ḷḷena y otros conceyos, amás de nun acusar na Xunta Xeneral nin les ruptures internes pel llau asturianista (Bloque por Asturies) nin pel llau del PCE (Frente de la Izquierda, que namás salva los muebles en Llangréu).

A una IU con un discursu muncho más descafeináu no asturiano de lo que nos tinía avezao -que nun yera muncho-  beneficióla abondo’l clima de cierta conflictividá internáutica encarnáu nel movimientu #democraciarealyá nel conxuntu del estáu, onde puede tar faciendo un llabor menos patéticu que nesti país. Tamién-yos favorez el ser l’alternativa más próxima haza la esquierda de los votantes desencantaos/es cola llaceria del PSOE, nun penalizando como sí venía pasando, los sos pautos-alcuerdos políticos en conceyos y Xunta Xeneral onde sí se taben y tán desendolcando polítiques de retrocesu nos derechos sociales.

Amás, agora, fortalecida y ensin posibilidá de cayer en más incoherencies énte la non posibilidá de reeditar el pautu a nivel nacional, ye’l momentu nel qu’IU va tornar a pescar nel caladeru de la esquierda de la cai que queda ensin referentes nidios al fracasar les otres opciones pela esquierda y pel asturianismu que pudieren dar abellugu a eses reivindicaciones.

Los nuesos, en tierra de naide, pasando la cuerda ensin rede

Nun son unes bones eleiciones pa la esquierda asturianista/soberanista. Nun lo son, principalmente, poles propies aspiraciones irreales xeneraes que faen qu’agora unos resultaos esperaos seyan una llábana muncho más pesada pa xestionar de lo que debiere anque tengamos munches notes positives que poner. Esta vegada, como cásique siempre nesti mundín, la xornada de reflexón ha facese agora.

– BA-UNA, gol en propia, xugando en casa

En primer llugar, la coalición Bloque por Asturies – Unidá Nacionalista Asturiana algama unos resultaos insuficientes y non presentables como positivos atendiendo a la campaña desendolcada, les esperances puestes, la imaxe proyeutada y el futuru que se-y esperaba a esi Tercer Espaciu Políticu Asturianu (qu’agora ¿habría ser el Cuartu?).

Tres d’una campaña bona, mui bona, quiciabis la meyor de la historia del nacionalismu en cuantes a imaxe corporativa, diseñu, atención de los medios y repercusión social, qu’a la fin sí tuvo un programa eleutoral completu -anque tarde y quiciabis demasiao de mínimos-  Bloque-UNA nun algamó l’oxetivu imposible col que diba a tumba abierta. Compromisu por Asturies quixo xugar al funambulismu ensin rede nin experiencia y apostalo too a vida o muerte ensin probabilidá nenguna d’éxitu. Per un llau, pa xugar a esto hai que cuntar con una persona mui conocida, carismática, que nun foi’l casu, recordamos agora a un Valledor amortizáu, que tampoco diba ser la solución a los problemes de los qu’adolecemos (falta de compromisu militante, precisamente, ente otres).

Dos conceyales (más los trés de Nava que nos lleven emprestando a la esquierda soberanista la xente del conceyu sidreru años y años) nun son un resultáu dignu pa lo que se pretendía y vendía. 6800 votos nes meyores condiciones que vamos tener en munchos años (la visibilidá obligatoria del Bloque na TPA y medios privaos acaba d’expirar) saben a mui poco, y más teniendo en cuenta qu’estratéxicamente de xuru que se ficieron concesiones ideolóxiques pa da-y esa supuesta “seriedá” o rebaxa na “radicalidá del discursu” que lu faiga más abiertu y qu’obliguen a que’l votante convencíu arrenuncie a una parte de la so ideoloxía pero que tampoco valen pa convencer masivamente al votante non “soberanista”. Amás, da la sensación de que se xugó con militancia y simpatizantes nún experimentu sociolóxicu peligrosu: facer por convencer a la xente de que se diba a “consolidar un diputáu” y “sacar una diputada”, amás de reforciar la rede nos conceyos. Resúltame hasta cruel agora’l recordar el famosu sondéu internu que-y daba un diputáu pela circunscripción central al BA-UNA, onde se dicía que’l 80% de la xente conocía a Rafa Palacios.

Resúltame mui cruel pensar que se mandó a muncha xente un mensaxe que, más alló de l’ambición -que facía falta y muncho nesti espaciu políticu de la esquierda soberanista- foi más bien condergar a un golpe durísimu a una militancia y públicu necesitaos de llogros que güei, miércoles, inda nun dieron col cuerpu en suelu d’esa cayida llibre.

D’esta miente, rescampla la verdadera capacidá d’una marca que coyunturalmente tinía un diputáu que supo exprimir bien y tolo que se pudo, que tien una militancia imaxinativo, mozo, preparao y con ganes y capacidá pa facer coses prestoses, pero que nun tien un respaldu suficiente como pa marcase sigún qué oxetivos o permitise’l lluxu de prescindir d’una parte del movimientu organizáu na esquierda soberanista.

Habrá que reflexonar mui muncho, apuntar mui bien los aciertos -que los hebo y abondos, de los qu’habrá que deprender pa siempre (esi actu central en Xixón)- y marcar a en colorao los errores y atayos ensin xida crónicos, y más teniendo en cuenta qu’esi procesu qu’intenta la unidá dende’l 2003 va dexando p’atrás en cada comiciu a una parte importante de la militancia y corrientes internes.

– Conceyu Abiertu, salvando los muebles en Noreña

El proyeutu de Conceyu Abiertu surdía con unos oxetivos dafechu diverxentes a los que proyeutaba Bloque-UNA: el trabayu a nivel llocal, dende la base, con unos finxos ideolóxicos mui claros, de corte nuevu nel furrulamientu, dando voz a la xente de los pueblos pa que se representare a si mesmo. Al tiempu, tamién se tuvo presente pa les eleiciones al parllamentu, con un resultáu anecdóticu pero que taba tamién no esperable.

El trabayu políticu desendolcáu foi exemplar en Noreña, cola presentación de firmes previes pa respaldar y afitar la candidatura, col diseñu pasu a pasu en conceyos abiertos de los programes políticos, cola implicación total de l’asamblea pa decidir candidatu, con un trabayu a nivel de cai mui bonu…que dio los resultaos que merecía hai yá munchos años. Otru exemplu bonu taba en Grau o en SMRA -nun digo que nel restu tampoco-, onde se siguieron dinámiques menos espectaculares qu’en Noreña pero tamién d’afalagar.

Con too y con ello, hai que dexar claro que Conceyu Abiertu, una fuercia creada mui poco enantes de que se cumpliere’l plazu d’inscripción como consecuencia de la non posibilidá d’apautar nada en claro Andecha Astur con Bloque-UNA -fechu que yá foi criticáu nesti espaciu- salva los muebles col llogru de Noreña, que non por esperáu ha ser menos cellebráu.

Sicasí, tamién hai que facer equí delles considerances crítiques: la decisión de presentáse a les eleiciones nacionales nun-y reporta nengún beneficiu a la siegla nin al proyeutu, porque Conceyu Abiertu nun ta a lo mesmo que los partíos tradicionales, o polo menos, nun lo debiere facer na mio opinión. Presentáse nestes eleiciones nacionales nun perxudicó a naide -toles opciones tienen derechu a facelo, tamién ye verdá- pero ye evidente que nun cuayaba nada bien dientro d’un modelu de participación dende la base de los conceyos y foi una oportunidá perdida p’amosar a los simpatizantes y al públicu en xeneral que nun se ta pola confrontación sinon por una estratexa estremada que tien que tener confluencia enantes o dempués col restu de persones y organizaciones.

En cuantes al modelu de CUPX, fracasó estrepitosamente. Ye cierto que cuntó col silenciu mediáticu, pero sistemáticamente tuvo en griesca cibernética y nes cais con otra xente de la esquierda de Xixón (el seutor del PCPE, la CSI…) que llevó al sapiazu eleutoral y a deprender una llección pa próximes entregues. Asina, habrá que replantegase les formes y los actores políticos colos que se trabaya pa evitar una llaceria asina en futures ocasiones.

Tampoco podemos dexar de comentar lo vergoñoso que ye pa tola esquierda soberanista lo asocedío en Villaviciosa, onde la xuntura de les candidatures a nivel municipal de Compromisu por Villaviciosa y Conceyu Abiertu supondría un conceyal seguru. Anque tengo datos d’una parte, nun m’arriesgo a dicir qué pasó pa qu’eses dos candidatures se pisaren la una a la otra y dexaren pa prau la representación asturianista d’esquierda nel conceyu maliayu. Esti tipu d’actitúes han ser erradicaes d’agora n’alantre en tolos conceyos onde heba duplicidá de llistes y ye responsabilidá de toles partes ¡toes! que nun torne a pasar ¡facéi’l favor, ho!

Con too y con ello, munchos ánimos tamién pa Conceyu Abiertu. Agora toca entamar a trabayar en milenta conceyos más con agrupaciones asamblearies y horizontales y facer de Noreña exemplu d’un modelu de democracia direuta que tea basada na voz del pueblu. Ye la hora d’amosar qu’otra manera de facer política ye posible pa entamar a dar otra traza a los conceyos asturianos. Pasu ente pasu, ensin priesa, onde heba xente abondo, y a por ellos, ensin dexar de pensar en tender les manes a lo que pueda venir, poniendo tolos firewall posibles a cualesquier actitú de ghettu, autodestructiva o sectaria que yá nun cabe nel futuru d’equí p’alantre. Ye la vía seliquina, pero ye la vía meyor, la que más s’avera a lo que queremos pa una Asturies del futuru.

– Unión Asturianista (URAS-PAS), adiós mui bones

Anque esta seya una formación non inxerta na esquierda soberanista, nun podemos dexar de constatar el notable baxón eleutoral que lleva a la fin de la carrera política de Xuan Xosé S.Vicente, una de les figures más conocíes (pa bien y pa mal) del asturianismu políticu nos últimos 30 años. Dexa tres de si una organización que lleva a rastres la siegla y que’l tsunami Cascos afogó dafechu. Esperamos noticies de los militantes qu’inda queden nesi perdesgastáu Partíu Asturianista, que se dicen progresistes y asturianistes sigún los sos estatutos. L’asturianismu post-Xuan Xosé, anque yá fuere una realidá práutica, merez que la siegla nun quede arrequexada nel caxón de la Lliga Asturiana o la Coalición Asturiana, quiciabis tenga entá dalgo qu’aportar al escenariu políticu asturianu a nivel nominal.

Un abrazu tamién pa la xente mozo del PAS, qu’agora puede tener un papel simbólicu nes dinámiques que se xeneren inmediatamente dempués d’estos comicios nefastos pal soberanismu y la esquierda en xeneral. Ser quienes a reasitiase nun panorama desfechu dafechu dientro d’esti movimientu de la esquierda asturianista o soberanista diba ser una virtú d’agradecer.

25 de mayu, día de la Nación Asturiana. Y agora…¿qué?

La esquierda soberanista/asturianista/nacionalista ta, anguaño, nel puntu de mayor indefensión de los últimos años. Desplícome: nun existe una rede física, nin militante, nin política, nin social qu’articule nada que de lo que tar arguyosos. Vamos per partes.

Nel tarrén puramente partidista nun hai nengún tipu de referente afitáu. Nin Unidá Nacionalista Asturiana, con ciertes tensiones internes evidentes ente y dientro de les propies families d’Izquierda Asturiana y Andecha Nacionaliega, nin el Bloque por Asturies, nin muncho menos Andecha Astur (sensu stricto) son formaciones merecedores anguaño de tener un papel dominante na articulación del proyeutu de la propia esquierda soberanista. Nenguna de les formaciones lleva voz cantante dalguna, nin tienen lideralgu o autoridá ideolóxica sobre’l restu del movimientu. Escocia nun tien rei.

Na estaya de mocedá, la situación ye dalgo menos enguedeyada pero nin muncho menos más esperanzadora. Darréu, Fai!, UNA-Mocedá/Bloque de la Mocedá Asturianista son les organizaciones que podríen merecer nesti espaciu. Ente estes, namás les dos primeres tienen desendolcao una actividá constante y militante y dambes tán en situación de stand by afogaes pola dinámica eleutoral, más entendible nes mocedaes vinculaes a Andecha Astur que nel segundu de los casos, qu’habrá qu’analizar más posao col tiempu. En cualisquier casu, nenguna de les citaes tán en condiciones anguaño de tornar a dinámiques de trabayu sistemáticu y con ilusión pa construyir dende la mocedá referentes válidos y una rede asociativa digna. Ye evidente,

Ente les organizaciones sociales y plataformes la cosa nun ta meyor:  l’Ensame República Asturiana muerre énte la indiferencia d’una parte de la esquierda soberanista qu’enxamás-y dio un migayín d’opciones de trunfar o de ser lo qu’estes organizaciones quixeren, la Xunta pola Defensa de la Llingua, anque independiente políticamente, vive ún de los piores momentos de la última década, tranquen les llibreríes asturianistes Paraxuga, Trabe y Alborá, pieslla’l Chigre La Casa Posafuelles y quedamos ensin frentes de llucha nin abellugos físicos pa la esquierda soberanista qu’habrá que construyir lladriyu a lladriyu.

Podemos dicir a les clares que l’atomización del soberanismu/nacionalismu asturianu yá llegó a les partícules indivisibles: l’individuu. Les organizaciones amosaron la so incapacidá p’articular un puntu común nel que participar toos y toes xuntos/es. Yá nun ye’l momentu de sentar a cabezaleros/es a falar porque nun hai nada qu’encabezar. Ye hora de dar la palabra al y a la militante, ensin siegles, ensin chapes nin banderes, la hora d’echar mano de ferramientes de participación asamblearies que nos permitan debatir, charrar, conocese, discutir y tomar decisiones conxuntes. Ye la hora de que se xunte la xente y non les organizaciones, de la converxencia de persones d’ideoloxía próxima y marcu territorial idénticu ensin consignes nin llamaes al orde penriba del individuu. Ye la hora, tamién, de dexar de tar incómodos/es nesti espaciu, d’amosar arguyosos/es una formación política que xustifique los posicionamientos ideolóxicos , de mirar pa los convencíos/es y non tanto pal eternu trabayu de “convencer” a esa xente d’afuera que refuga cualquier visión nacional de los nuestros fechos culturales o del conflictu de clas n’Asturies. Hai qu’afitar una base militante qu’eche 5 hores selmanales a militar por y pal país y la so xente.

Pero pa ello hai que caltener un autocontrol total na manera d’amosar les diferencies ente comilitantes, emplegar los mecanismos asamblearios col escrúpulu y respetu absolutu que los compañeros/es y los ideales merecen y presentáse énte la sociedá como un grupu que seya quién a facer frente a los ataques culturales, nacionales y de clas que vamos sufrir nesti nuevu contestu políticu.

Nin que dicir tien qu’esti contestu ye mui difícil que se dea anguaño n’Asturies (superar les rocées, aceutar les crítiques, arrenunciar al francotiradorismu -y equí’l primeru-), pero munchos nun nos damos y naguamos por que se xeneren les dinámiques afayadices. Nos exemplos d’aplicación de la democracia direuta qu’en munches acampaes d’Asturies y la península se tán dando tenemos bonos exemplos pal debate y l’autoorganización.

¿Sedremos quién a ello? ¿Dexarán les organizaciones vía llibre pa que la xente s’esprese -cada militante una opinión-?

Nin nos afogamos nin vamos desapaecer. Agora ye’l tiempu de que la xente llevante la so voz penriba de les cadarmes – calabres organizativos. Cola palabra per delantre. ¿Vémonos embaxo’l texu a les **:**?

Güei ye 25 de mayu. 203 años dempués de la declaración de soberanía, la creación de la bandera asturiana y l’Exércitu Defensivu Asturianu. ¡Puxa’l Día de la Nación Asturiana!