A cásique 50 díes de les eleiciones asturianes

Espublizáu'l 7 d'Abril de 2011 por Llar -> 867 km na categoría Analís políticu

Cada vegada tán más averaes les eleiciones del 22 de mayu y nun dexen d’apaecer novedaes cásique a diario no que cinca a la presentación de candidatures, modelos de precampaña, sondeos y programes eleutorales.  Prestaríame sorrayar, enantes de siguir,  l’aquel máxico que tienen los comicios, siendo capaces de poner en “llímites Fukuxima” la concentración d’hormones de la población militante o concenciao políticamente (y más nesti requexu ideolóxicu común a nós).

Ye un momentu onde facemos batalla de cada comentariu expresáu y de cada artículu na prensa  y dexámonos engañar, como siempre, con unes eleiciones regalaes pol réxime parademocráticu que carecemos. Escaecemos demientres pasen estos trés meses que poco o mui poco podemos algamar dempués del  recuentu de los cachinos de papel reciclao mal impreso que Rubalcaba y el poder indie-pedante xudicial del PPSOE dexen poner nes escueles eleutorales; que lo importante vien dempués, el 23 de mayu y el 24, y el 25…que, como diría’l Subcomandante Marcos, “Nada nos va ser dao; nada que nun seya lluchao por nós; nada va ser pa nós regalao; nada que nun arrinquemos vendrá a ser de la nuestra casa; nada que nun lluchemos va vivir ente nós”, esto ye: a trabayar, a trabayar, a trabayar, a trabayar, a trabayar, a trabayar y a considerar que les eleiciones son un momentu clave como cualquier otru nel llabor a desendolcar por un coleutivu políticu, pero de xuru que non el más importante. ¡Que nun nos entre a naide la galbana’l llunes posteleutoral dempués salga too bien, mui bien o mal! ¡pa les aguyetes…más trabayu!

La coalición Bloque-UNA: una bona precampaña ensin munchu compangu ideolóxicu

La xente de Compromisu por Asturies vien dando anuncia, dende la rueda de prensa onde se presentaba la candidatura a la Xunta Xeneral, de delles candidatures llocales como les de Nava, Gozón, Siero, Carreño, Llaviana, Ḷḷena, Casu, Samartín, Uviéu y Xixón onde hai -igual ye una impresión personal- más representación de llau del Bloque por Asturies que del restu d’organizaciones de la coalición. Tamién ye de sorrayar qu’hai sitios nos que se tán presentando llistes que Palacios acertadamente nomare hai tiempu “de paracaidistes”, ye dicir, onde nun hebo trabayu previu de la coalición nin presencia dala. Sí ye verdá qu’en toes elles hai una perbona escenografía, colos candidatos a nacionales y plotter de fondu y con más o menos cobertoria mediática. La estratexa de la coalición ye la repetición al máximu en toes elles per parte de los candidatos/es presentes de los sos puntos fuertes o pallabres tótem, siempre nesti orde: “Una alternativa dende la izquierda, l’asturianismu, l’ecoloxismu y los movimientos sociales”.

Les candidatures preséntense arropaes pola xente de la candidatura dando sensación de bona organización ya implicación, anque n’ocasiones échase mano d’una “titulitis” mal entendida pa endolcar la llista o a les persones, de tal manera que paez que la militancia n’otros espacios anguaño o antaño ye o fai pedigrí personal de cada individiuu, lo que ye mui poco xeneroso pa colos movimientos sociales nos que se diz tar sofitaos/es y un erru endémicu de les organizaciones que se presenten a les eleiciones. Pa finar, échase en falta la existencia de programes y midíes concretes a desendolcar polos futuribles cargos políticos. Nesti sen, lo único sorrayable ye una campaña de tipu pop afalando a la llimpieza nes alministraciones dientro de la precampaña del “O2” asoleyada nos últimos díes y onde s’esbocen delles propuestes más o menos desplicaes ensin sofitase en custiones identitaries -más alló d’emplegar una fórmula billingüe-.

A too esto, Bloque-UNA vien d’asoleyar un sondéu internu que-yos otorgaba un 3.3% de los votos y un diputáu, amás d’una “victoria de la esquierda” (citando a Europapress, entiendo). Abúltame más una bona manera d’intentar animar al votu y a la redolada ideolóxica a sumase al proyeutu qu’una encuesta a tener mui en serio. Nél apaecen datos inverosímiles, como qu’al candidatu d’UPyD lu conoza un 70%, a Palacios un 80% o que Cascos seya menos conocíu qu’Espinosa o Javier Fernández. Namás espero que si los resultaos nun son los esperaos pola encuesta -¡oxalá lo seyan!- o son mui estremaos nun seya un güelpe demasiao fuerte nin un motivu pa facer la gracia interna o esternamente. Que’l bon intentu d’asomar el focicu na prensa y énte la sociedá nun valga pa que-y dean a ún un mocazu de baldre.

Con too y con ello, habrá que dicir que probablemente teamos ente la campaña más del estilu/ asemeyada a la de los partíos tradicionales que se fizo nunca dende’l nacionalismu/soberanismu. Si esi yera l’oxetivu ta cumpliéndose d’una manera mui notable, anque, por supuesto y per descontao, esperamos y confiamos en que’l resultáu nel proceder dende’l 22 de mayu n’alantre nun siga esos mesmos calces, claro ta.

Les candidatures de Conceyu Abiertu: delles lluces rellumantes na nueche

Conceyu Abiertu, pol propiu modelu del proyeutu horizontal y asambleariu que bien prestosu resulta enriba la mesa, tien una manera menos espectacular d’apaecer n’escena pero non por ello menos efectiva a mediu y llargu plazu. Ye verdá qu’engrasar la maquinaria d’unos coleutivos que furrulen d’una manera mui estremada al de la mayoría de les organizaciones tradicionales ye bien abegoso, pero hai delles custiones que tán prestando o que, polo menos, resulten nueves dientro’l panorama. Yá hai presentaes candidatures en Noreña -sitiu aparentemente onde hai mayor posibilidá de sacar representación-, Grau -onde guaña un conceyu que nun existía hasta estes eleiciones con unos primeros testos que me dexaron clisáu pa bien-, Xixón, Villaviciosa -ú sedríen d’agradecer bones nueves d’equí pa poco-, Llangréu y Samartín -con bon trabayu históricu del soberanismu-, pel momentu.

Ye de sorrayar lo llamativo del trabayu que se ta desendolcando, siguiendo siempres un proceder qu’entama pol llamáu a “conceyu abiertu”, el diseñu d’unes exes básiques pa, dempués, tornar a aconceyar pa escoyer una llista de candidatos y candidates -por imperativu llegal- pa ponelos/es, sigún los programes, al serviciu del propiu conceyu abiertu a la participación de tolos y toles vecinos/es; un modelu qu’anque supuestu nes organizaciones de la esquierda (y na asturiana neto que nes demás) nun se suel cumplir cásique nunca, polo que Conceyu Abiertu afonda nun modelu de democracia direuta ensin radicalismos estéticos faltos de conteníu, sinón tolo contrario: efectividá, participación y honestidá.

El casu concretu del conceyu de Xixón merez comentariu aparte. Per un llau, en Xixón C.A. da un pasu alantre que de primeres paez mui interesante: igua una candidatura conxunta col nome de Candidatura d’Unidá Popular de Xixón (CUPX) onde se participa xunto a xente de la vieya guardia’l PCA (Frente de la Izquierda), Izquierda Anticapitalista (IZAN) y con sofitos sindicales perconocíos en Xixón y n’Asturies. Los primeros puntos programáticos asoleyaos son mui asemeyaos a los que Conceyu Abiertu vien defendiendo, incluyendo un separtáu nel que s’esplicita la defensa de la “llingua y cultura nacionales d’Asturies”, cosa que constitúi una mui bona noticia cuando ye asumío con normalidá nel ambetu llocal por xente d’una parte de la esquierda mui refractario históricamente a esti discursu, lo que yá ye un trunfu en sigo mesmu. Siendo como ye Xixón el conceyu con mayor población del país y onde nun hai posibilidá nenguna de qu’organizaciones pequeñes al marxe de PPSOEIU algamen resultaos dignos, ye bona pena que Bloque-UNA nun aprovechare la posibilidá d’axuntar fuercies a nivel llocal. Tamién diba ser mui interesante que la xente del PCPE-Asturies participare nesti procesu, anque paez imposible por razones que nun soi a atalantar ensin más datos. Pa finar, ¡oxalá se reproduza esta dinámica n’Uviéu! Que la esquierda soberanista consiga que delles reivindicaciones históriques, anque seyan toponimia, cultura y llingua seyan asumíes por una parte de la esquierda ye un gran pasu alantre pa la normalización de los nuestros derechos como pueblu y un motivu de gayola pa la propia esquierda seya estatalista o asturiana.

Dicía nel últimu artículu d’esti blogue que “na mio opinión, sedría mui intelixente per parte de Conceyu Abiertu’l nun se presentar más que nos conceyos onde heba capacidá y dexar estes eleiciones onde nun hai nenguna posibilidá de facer nada granible. Si son 5 conceyos namás nos que se pue que lo seyan: lo importante ye’l trabayu de cara al futuru. Al tiempu, el nun presentáse a la Xunta Xeneral sedría toa una declaración d’intenciones y d’arrogancia  pa nun dexar tierra quemao con otres organizaciones de cara al futuru.”

Sigo calteniendo pallabra por pallabra lo mesmo. Que Conceyu Abiertu trabaye poniendo la mirada nel futuru sabiendo, qu’anque agora tea muncha xente mozo detrás, el proyeutu ta maureciendo y les idées bones resulten innovadores y fresques nuna Asturies onde les maquinaries pseudopolítiques de los partíos tradicionales tan a piques d’acabar aferruñaes. Precisamos más que nunca l’organizar a una masa social descontento coles dinámiques neolliberales y etnicides de los partíos españoles n’Asturies.

Paraxuga, pieslla.

N’otru orde d’asuntos, nun se puede pasar per alto una permala noticia pal soberanismu asturianu y pa la cultura en xeneral: l’artículu que lleo nel blogue de David M. Rivas onde s’anuncia que tranca la llibrería Paraxuga d’Uviéu. Desapaez ún de los pocos requexos nos que mercar llibros n’asturianu con ambiente propiu. Ye verdá que’l sitiu que tinía agora nun yera especialmente bonu, ye verdá qu’esta puta crisis capitalista nun dexa a naide con cabeza, pero tamién ye cierto que dende’l soberanismu/asturianismu ficimos mui poco por promocionar esi espaciu de llibertá llingüística onde s’axuntaba música, ropa, arte y otres caxigalines cola lliteratura asturiano. Quedamos resignaos/es, d’equí p’alantre, a la puxarra de seiciones onde les grandes llibreríes tresnacionales arrequexen a la lliteratura de nueso. Otros proyeutos “lliterarios”, por llamalos de dalguna manera, siguirán alantre vivos, faciendo un trabayu de plegamientu al poder que mande, seya’l PSOE-IU-LV-etc o los futuribles FAC-PP.  La mio última vegada en Paraxuga foi esti fin d’añu, enantes de tornar a 867 km del mio Llar, pa mercar un llibru, un repegu de l’asturina y una asturina y paez que-y garro inda más ciñu al cachín de tela qu’anda escolingáu agora mesmo a la mio espalda, como si fuere un recuerdu de guerra. Si tenéis ocasión, nun dexéis de pasar una última vegada per Paraxuga pa mercar daqué y esperar a que vengan tiempos meyores onde l’asturianu torne a tener un abellugu dignu n’El Paraísu.

Agora, apiertar el dentame ensin arrenunciar a nada

Quedando como queden estos 50 y picu díes enantes de les eleiciones, unes últimes pallabres d’aliendu pa la xente de la esquierda soberanista qu’anda dende hai meses preparando proyeutos nuevos y axuntando fuercies nos estremaos ámbetos sociales: de muncha de la vuestra xera n’aquella nación arrequexada más alló del altiplanu dependerá’l futuru próximu del país. Que naide se queme con caxigalines: avancemos ensin torgues y de memoria p’haza una Asturies d’asturianos y asturianes viviendo llibres nel cachín más guapu de la Tierra.

Y, dempués de les eleiciones, a blindar les organizaciones y a reforciar los finxos ideolóxicos de la esquierda soberanista pa qu’enxamás tornemos pela sienda del vivir de rodieyes, del poner la mano al que manda, o del arrampuñar migayes de pan duro. Que’l movimientu d’emancipación social y nacional asturianu seya exemplu de compromisu y de coherencia pa cola militancia y les y los votantes. Qu’entame un tiempu nuevu nes rellaciones ente persones y organizaciones y, toos a comuña, trabayemos por una Asturies arguyosa nun mundu xustu.

A la fin…dos alternatives pal votu d’esquierda soberanista

Espublizáu'l 20 de Febreru de 2011 por Llar -> 867 km na categoría Analís políticu
Etiquetes: , , , , , ,

Nes últimes selmanes venimos viviendo’l desendolcu de les diferentes negociaciones y de la presentación de los estremaos proyeutos eleutorales que van participar nes autonómiques y de conceyu de mayu. Quiciabis la mayor novedá -por llamalo de dalguna manera- vien de la irrupción de la opción personalista y astur-bizarre (de la qu’habría que facer un artículu específicu, cosa que nun descarto porque da munchu xuegu) de Francisco Álvarez Cascos, qu’al ser refugáu pola plana mayor del PP asturianu va a entrar na Xunta Xeneral con partíu propiu y munches decenes de miles de votos. Esta situación va xenerar de xuru una descompensación nel equilibriu PSOE-IU-Verdes y PP, que pudiere traer un futurible gobiernu de la derecha autoproclamada frente al de les polítiques de derecha de la “esquierda plural”.

No cincante al espaciu que nos esmolez, el de la esquierda soberanista, yá tenemos les dos opciones referenciales. D’una banda tenemos la coalición Bloque-UNA (Compromisu por Asturies) con Rafa Palacios como candidatu. D’otra, tenemos a Conceyu Abiertu, una experiencia nueva na política asturiana de calter mui asemeyáu al de les CUP catalanes. Vamos afondar un puquiñín nelles.

Un camín qu’entama nel 2003…

La situación d’anguaño vien tres de la creación, apaición y entrada del BpA nun gobiernu asturianu nel que compartía asientu y responsabilidá con IX, PSOE y, mas sero, Los Verdes. Lo qu’entamaba en 2003 como “etiqueta de marketing” d’IX con unos esperanzadores resultaos tornóse rápidamente, en custión de díes, en desilusión, con una baxada de pantalones épica per parte d’IX y una supuesta élite asturianista que dexaba n’orsai a tol espaciu nacionalista o soberanista que-yos diere’l votu. Ye esta situación la que xenerará l’espoxigue d’opciones como Izquierda Asturiana que con un bon sofitu del mundu de la reivindicación llingüística y dempués d’un par d’años de crecimientu entama les negociaciones con Andecha Astur pa presentar un polu alternativu a la política d’en rodieyes d’IX y la marca blanca “Bloque por Asturies”.  Estes negociaciones finarán con ún de los mayores esperpentos de los últimos años, que separtaron más qu’axuntaron y qu’inda arrastramos, cola ruptura en dos cachos d’Andecha Astur, el resurdimientu d’una Unidá Nacionalista Asturiana qu’enxamás debiere tornar d’ente los muertos, un episodiu freak con Los Verdes-Grupo Verde y, en resumíes cuentes, con un ridículu xeneralizáu de les opciones que defendíemos tolos y toles que formábemos y formamos parte d’esta feble esquierda soberanista.

Nestos últimos meses, una carambola non prevista pon pates arriba’l panorama. Valledor, nun últimu aliendu de dignidá, dexa’l so escañu y abandona IX, dexando a Roberto Colunga como diputáu del Bloque nel Parlamentu. El nuevu diputáu (sorrayando lo de “nuevu”) fai por emplegar l’asturianu na Xunta Xeneral y da-y una cierta visibilidá al Bloque por Asturies, que s’asitia nuna posición de fuercia, inducida pol puestu en llista, dientro del nacionalismu, con un ciertu crecimientu de militancia. Dempués, el Bloque topa la so excusa p’abandonar la coalición con IX y un gobiernu lliberticida como foi’l de 2003 a l’actualidá: l’aplicación de les midíes neocón del gobiernu Zapatero n’Asturies. Paradóxicamente, ún alcuérdase de les milenta posibilidaes que’l Bloque tuviere a lo llargo de 7 años pa fuxir d’aquel gobiernu y nun pue dexar de sintir cómo-y baxa una gota de mugor manga pel cogote.

Unidá Nacionalista Asturiana, necesitada y esperanzada por poder desendolcar esi Espaciu Políticu Asturianu del que se falare nel so congresu hai exactamente un añu, entama les negociaciones con un Bloque por Asturies de vuelta y colo “guapo subío”, ye dicir, al que se lu reconoz como parte de la solución al dexar de ser parte, nesti intre, del problema.

Y, nestes, ¡que nos lleguen les eleiciones!

Bloque-UNA (Compromisu por Asturies), la opción más resultona de los últimos años na esquierda “soberanista”

Dempués d’unos 6-7 meses -sigún la prensa- de xestación llega la nación de Compromisu por Asturies, la coalición de coaliciones Bloque por Asturies – Unidá Nacionalista Asturiana. Destaca como puntu fuerte la “posesión” d’un diputáu, Roberto Colunga, dándo-y tol bombu mediáticu que, xunto con una escenificación y planificación que paecen afechisques -llogotipu aparte, eso sí- dán-yos un airín mui “resultón”.  Nuna presentación al usu de los partíos tradicionales (nun hotel, “NH”) y col siguimientu de dellos medios de comunicación, anunciaben la so candidatura con delles cares conocíes del mundu de la cultura o del asturianismu que, n’otres cites, firmaren, por exemplu, por Izquierda Asturiana, Andecha Astur o por IX-Bloque en 2003.

Sicasí, tamién hai puntos menos positivos. En primer llugar, y como yá  vinimos expresando nesti blogue, esti procesu de constitución de Compromisu por Asturies vien d’acoxar en dellos puntos. Ún d’ellos, y de los que más m’esmolez, ye’l vetu (podemos llamalo asina o “los pilancos”, o “la non reconocencia”…) al que se sometió a Andecha Astur. Tengo y tendré pa mi que’l discursu qu’anguaño Bloque-UNA van desendolcar nun va ser a seducir a una parte importante del movimientín (precisamente la más soberanista y la más izquierdista, al empar que la más “militante”). Por desgracia, creo qu’esta vegada sí yera posible un averamientu real y xenerosu con esta formación y, sobremanera, col patrimoniu ideolóxicu que representa, una oportunidá perdida qu’ha quedar reflexada equí y qu’esperemos que nun futuru se torne a dar.

Pero ¿cuáles son les razones? ¿por qué sí se puede reconocer y negociar col Bloque , formación qu’IAS y el restu de la UNA y organizaciones de la esquierda soberanista punxeren a cayer d’un burru pola so responsabilidá nel gobiernu represor col PSOE y IU, y non con Andecha, qu’anque tien les sos metedures de pata históriques, tamién podíen ser asumíes?  Tampoco creo que nun fueren quién a ponese d’alcuerdo nun programa electoral con ellos. A la fin, nun hai más que ver colos que se presentaren otres vegaes toles formaciones y comparar pa ver qu’esi nun ye un problema oxetivu. Cenciellamente, creo que les torgues impuestes a Andecha pa nun tar nesta xuntura vienen, per un llau, del Bloque por Asturies, que tarrecería tener una tercer pata nel tayuelu que-y pudiere facer la pinza con UNA na eleición de candidatu, por exemplu, o que-y cuestionare la so posición de fuercia interna d’anguaño. Al tiempu, un sector d’UNA (más o menos militante n’UNA, más o menos averáu) sigui ensin poner igua xunto cola xente que se presentó cola siegla d’Andecha les últimes eleiciones al conflictu xudicial pola marca, non reconociendo a Andecha Astur como organización.

No que cinca al candidatu, ta claro que Bloque-UNA ye una coalición que, como los partíos mayoritarios, apuesta por un electoralismu claru y rotundu (analizándolo ensin acritú y ensin prexuicios) enantes que de la creación d’un movimientu popular previu que permita unos bonos resultaos electorales. Quiciabis seya esta la única manera de presentase anguaño a les eleiciones a la Xunta Xeneral nesti plan, pero esta práutica desixe munches perres -que nun tienen-, munchos militantes -que tampoco- o unos candidatos de puxu y reconocíos polo menos pol entornu ideolóxicu al que van pidir el votu.  Nesti sen, la posibilidá de que Valledor fuere candidatu d’esta coalición dába-y un plus a Compromisu por Asturies que diba atrayer munchos votos de la esquierda (falamos d’un home del PCA) y del asturianismu. Nun m’estraña que Faustino Zapico en Les Noticies apostare por él, siempres d’alcuerdo, como dicía, a caltener una postura electoralista ya inda más resultona que la d’anguaño. Ye por ello que, cuando too paecía indicar que Valledor diba ser el candidatu, l’anuncia de que vaya ser Rafael Palacios, el llíder d’una de les dos partes de la coalición, resulta chocante. Tampoco nun resulta chocante que Zapico, qu’apostare por aquella otra opción, dimitiere como voceru y miembru de la executiva d’UNA coles implicaciones que pue tener esto na campaña eleutoral. Aprovecho pa dicir, a colación d’esta noticia, que Faustino ye pa mi, a nivel ideolóxicu y personal, una de les persones más preparaes de la esquierda soberanista asturiana, por nun dicir el “number one” y un activu que nun se debiere perder d’esta miente baxo nengún conceptu.

¿Pero nun había más candidatos? Si siguimos plantegándonos esi “resultonismu” que tanto vengo remanando pa falar d’una eleición de candidatu/a, que n’otres circunstancies ye lo de menos porque sedría cenciellamente’l voceru/a d’una expresión coleutiva y popular, de xuru qu’había opciones meyores que la de Palacios. Mesmamente, na semeya de presentación de la coalición podemos ver a un par de persones del mundu de la cultura que bien lo fadríen. Anque, tamién lo hai que dicir, respeto la voluntá coleutiva de les militancies respeutives d’IAS, UNA y BpA pa la escoyeta, nun dexo nin dexaré d’entrugame qué tendría pasao d’afitar otru candidatu, lo mesmo que de consiguir integrar a Andecha Astur nel proyeutu. Con too y con ello, anque nun soi nada optimista, ta claro qu’a curtiu plazu y pa estes eleiciones Bloque-UNA son la opción más posibilista de la esquierda soberanista. Quédanos saber si’l programa eleutoral va ser tan tibiu nel marcu social y nacional como denoten les intervenciones de los sos candidatos, más averaes a les que podría caltener el Bloque dientro d’una IU en gobiernu col PSOE qu’a les d’un partíu netamente asturianu y afitáu nos tan cacarexaos movimientos sociales o sindicales o, si pol contrariu, van tener un calter más reivindicativu y rupturista col establishment corruptu españolista n’Asturies.

Conceyu Abiertu, una experiencia nueva de participación horizontal centrada nos conceyos

Ayeri en Xixón presentábase’l proyeutu de Conceyu Abiertu, una opción nueva de la esquierda soberanista que vien a siguir el modelu de les CUP (Candidatures d’Unidá Popular) de los Països Catalans, que ta centráu en presentáse a nivel municipal namás pa dir texendo una rede con puxu nel ámbetu más próximu al pueblu, que nun precisa de grandes presupuestos y que, pola propia política de los conceyos, nun precisa d’unos alcuerdos complicaos a nivel ideolóxicu qu’imposibiliten la unidá de candidatures con partíos dientro de la esquierda y dende l’asturianismu al independentismu. Conceyu Abiertu surde dempués d’otru tipu d’intentos que, con meyor intención que remangu, apaecieron como Democracy For Asturies o SOS Asturies, plataformes ciudadanes con xente vinculao tamién a Andecha Astur que facíen ver una deriva, polo menos nuna parte significativa, de la militancia d’esti partíu.

Esti modelu de participación yá lu avanzábemos equí nel artículu anterior a esti. De fecho, falábemos concretamente de “Conceyu Abiertu” (con mayúscules y too) -tamién ye casualidá, coime- y cito:

“Faigamos un llamáu a Conceyu Abiertu. Que naide s’engañe, ye posible si naide fai por colgar del pescuezu la medayina de la “iniciativa”, anque esto nun quita pa qu’estos seyan formales, organizaos o operativos, onde tolos/es que quieran puean espresase. Faigámoslo entamando estos espacios d’alderique, por ciertu, con bien d’años per delantre, non a tou trapu 15 díes enantes de meter les llistes, y empobinémoslo más qu’al ermu electoral, al trabayu de concenciación previu y militante del día a día.”

Sicasí, a la opción de Conceyu Abiertu tamién tien delles coses que comentar y va afrontar dellos problemes dende esti mesmu intre. En primer llugar, ye dempués del vacíu que Bloque-UNA faen a Andecha Astur qu’apaez esta opción, colo que nun va a dexar de paecer, a lo menos aparentemente, la vía d’escape d’una organización que queda “compuesta y ensin mozu” a unos meses de les eleiciones. ¿Existiría, entós, un modelu como esti si Bloque y UNA-yos permitieren ser la tercer pata del tayuelu?.

En segundu llugar, ¿va a caltener el modelu CUP -inhibise nes eleiciones nacionales y trabayar esclusivamente a nivel municipal- o va a quemáse nestes eleiciones a la Xunta Xeneral? Na mio opinión, sedría mui intelixente per parte de Conceyu Abiertu’l nun se presentar más que nos conceyos onde heba capacidá y dexar estes eleiciones onde nun hai nenguna posibilidá de facer nada granible. Si son 5 conceyos namás nos que se pue que lo seyan: lo importante ye’l trabayu de cara al futuru. Al tiempu, el nun presentáse a la Xunta Xeneral sedría toa una declaración d’intenciones y d’arrogancia  pa nun dexar tierra quemao con otres organizaciones de cara al futuru.

En tercer llugar, y pa finar pel momentu, el mayor handicap col que surde Conceyu Abiertu pasa precisamente por apaecer nesti intre concretu y asemeyar competir con Bloque-UNA, lo que va ser usao na so contra per una parte d’esti mundín que va acusalos -y yá lo ta faciendo- de “boicó”. Quiciabis Conceyu Abiertu surdiría con munchu mayor puxu’l día dempués de les eleiciones, que puen ser un nuevu mazazu pa xente que ta cuntando con “incrementar la presencia nel parlamentu asturianu”.

La opción de Conceyu Abiertu, una propuesta coherente ideolóxicamente, que tien un plantegamientu a mediu y llargu plazu de calter participativu, horizontal, con autonomía pa cada conceyu dientro d’unes llínies básiques y de recursos a nivel nacional, ye la opción bona pa los que queremos otra manera de militar y de llegar a la xente nos conceyos. Nun va ser d’esta, pero cada vegada vamos averándonos más a un modelu onde’l debate, la vuelta a la cai y l’averamientu a la xente seyan les prioridaes. Y too ello ensin arrenunciar a nada.

Parada viniente: …programes eleutorales y candidatures de conceyos

Quédanos agora esperar a que Bloque-UNA y Conceyu Abiertu presenten los sos programes eleutorales y les propuestes estratéxiques, lo mesmo que saber en qué conceyos van presentáse. De xuru veremos duplicidá de candidatures, lo que ye una bona pena, que van valir pa que salga carnaza…anque esperemos que non. Tengo especial curiosidá y esmolecimientu por conocer el programa de Compromisu por Asturies. Oxalá les dinámiques internes permitan afayar un programa combativu y que vaya al raigañu de los problemes d’Asturies. Un radicalismu bien entendíu que fuxa de postures posmodernes y del esteticismu pa medrar o paecer bien na sociedá.

Oxalá’l pesimismu que tengo con estes eleiciones nun seya pa tanto y se xenere un cambiu de dinámica dientro d’esti movimientu. Un tiempu nuevu pa una Asturies nueva. Guardái les vuestres monedes. Queremos un cambiu.

Por una esquierda soberanista alternativa nel discursu y nel proceder

Espublizáu'l 3 de Xineru de 2011 por Llar -> 867 km na categoría Analís políticu

Sigo col rixu de siempre les noticies que van apaeciendo nos medios dixitales no que cinca al procesu eleutoral del conxuntu d’organizaciones que podríemos asitiar na esquierda soberanista. El capítulu postreru ye’l comunicáu asoleyáu pol Bloque por Asturies y Unidá Nacionalista Asturiana nel selmanariu Les Noticies.

Creo qu’hemos d’analizar esta anuncia como una manera de ganar tiempu per parte de dambes organizaciones que lleven mui retrasáu’l procesu de cara a presentar una alternativa amañosa pa les eleiciones d’esti añu nel que yá tamos. Si facemos apreciu d’anteriores comunicaos, yá va pa un mes que la sociedá asturiana, o a lo menos los que tamos un poco más averaos a esti espectru políticu, debiéremos conocer qué vamos a topar nel mes de mayu. Y paez que va pa llargo y, nun sé, si pa tolo bien que munchos/es esperábemos.

Dexando un poco de llau les posibles causes que tean aseleciendo’l desendolcu de los acontecimientos -diben ser suposiciones más o menos acertaes y de difícil desplicación- y que’l procesu de converxencia nun va ser -paez ser-, y yá me cafia, realmente unitariu, sí que me prestaba analizar un puquiñín qué tipu de furrulamientu/comunicación se da ente organizaciones y persones de la esquierda soberanista (siempre falando de partíos, organizaciones, independientes, etc).

La non existencia d’espacios comunes físicos y estables de trabayu en comuña: el pogu de militantes y organizaciones

Cenciellamente, nun hai: nun tenemos sitios dalos onde coincidir la xente de la esquierda soberanista. Nun falo d’ociu nin de los pogos del próximu conciertu de Dixebra. Por ciertu, bien guapa ye la metáfora del pogu pa falar de la interaición ente persones y organizaciones de la esquierda soberanista. L’asuntu ye esti:

Toos y toes (militantes, independientes, concenciaos/es, averaos/es, permeables…) vamos a los conciertos de Dixebra polo que representen: compromisu políticu + tresmisión d’un mensaxe social y nacional bien curiosu + folixa con mocedá que comparte unos mínimos ideolóxicos. Toos y toes ximielgamos el cadril -d’aquella manera- al mesmu son y glayando lo mesmo, baillamos abrazaos/es a los/es nuesos/es collacios/es.

De sópitu chocamos col d’al llau: conocémonos d’otros conciertos, sabemos que vamos coincidir nel siguiente, cruzamos miraes, sabemos que sabe les lletres y que tamién les comparte.  Si nel choque soltare un puquiñín el coldu devolvémos-y l’emburrión enfadaos y multiplicáu x5 en puxu pa quitalu d’en mediu. Y poco más.

D’esta miente, a la fin, nin siquiera-yos ponemos voz a esos y eses que davezu salen tres de les pancartes d’Andecha Astur, Darréu, Unidá Nacionalista Asturiana, Fai!, Sofitu…Nin siquiera sabemos más que de lloñe d’au son y a qué se dediquen. Nun nos axuntamos pa desendolcar nengún tipu d’actividá política, nin personal, nin pa charrar nin pa contraponer opiniones. Vivimos en burbuxes de xabón efímeres que cuando s’averen españen. Confiamos en que, embaxo de la so militancia, escuéndese’l mal encarnáu y facemos estensibles los errores que pudieren tener les sos organizaciones al tratu personal.

Más interaición política con xente menos averao ideolóxicamente

La mio esperiencia personal dizme qu’en dellos años de militancia nuna o n’otra organización política fino coincidiendo más con xente d’organizaciones como’l PCPE/CMC, PCA/JCA o IZAN que con xente d’organizaciones de la esquierda soberanista. Nin nel ámbetu universitariu, nin nel antibelicista, nin nel antirracista, nin nel feminista, nin nel ecoloxista, nin del propiu de mocedá…

Cuando falo de coincidir, por supuesto, hai que lo dicir: refiérome a BREGAR, vivir a la griesca pa que les actividaes salgan n’asturianu, pa qu’Asturies seya’l marcu estratéxicu d’actuación,  pa dexar albintestate incoherencies nos sos discursos supuestamente izquierdistes que munches vegaes chocaben no nacional etc.

Nun soi a imaxinar un escenariu más murniu qu’esti, onde trabayar con xente que pon más torgues ideolóxiques se fai, increyiblemente, más cenciello que facelo coles organizaciones más próximes. Asina, tenemos que nes “cites” añales más importantes la esquierda soberanista como movimientu queda descordinada dafechu. 1u de mayu: FALLU, 25 de mayu: FALLU, Día les Lletres: FALLU, 8 setiembre: FALLU, ochobre: FALLU, 8 de marzu: FALLU, 28 de xunu: FALLU, Mani Antitaurina: FALLU…y caro, día de les eleiciones…EPIC FAIL.

¿Cómo ye posible que nun seyamos a reblagar penriba d’estes fricciones? ¿Ye sectarismu? ¿Por qué ye esta desconfianza ente organizaciones ya ideoloxíes enforma asemeyaes en condiciones tan precaries?

La necesidá de construcción d’espacios físicos y de debate propios y horizontales nel soberanismu d’esquierda

Una de les torgues más grandes que topamos cuando falamos de la esquierda soberanista ye la imposibilidá de caltener debates de calter internu. Evidentemente, con organizaciones de puxu tan llimitáu y nes que prima más l’aición-posturéu que’l propiu debate y l’asoleyamientu d’enfoques propios, la cosa nun pinta nada fácil. Sicasí, ¿cuálu ye’l motivu de nun tener nengún muérganu oficiosu de debate horizontal ente organizaciones y persones? ¿por qué nun existe nengún foru -por favor, nun falo del ciberespaciu- nel que discutir sobro la bandera asturiana, sobre si 8 de setiembre o 25 de mayu, al rodiu de la territorialidá nacional etc?.

Nun falo d’una tertulia -que tampoco taría mal y yá hai esperiencies nesti sen-, sinón d’una mínima coordinación ente organizaciones tan próximes p’aldericar y dir faciendo un paxu de finxos ideolóxicos básicos y aceptaos colos que trabayar de secute, por nun falar de locales, chigres, centros sociales etc. onde atopar información y material propiu como yá comentábemos nesta otra actualización.

Esto llévanos direutamente a analizar el tipu de participación que se da na propia esquierda en reconstrucción nacional, que garra de los partíos mayoritarios les peores zunes como’l dirixismu, el verticalismu y el despreciu, en munches ocasiones, del/de la militante de base y dexa pa prau el debate, la rexeneración d’idées y praxis polítiques énte la inmediatez de les eleiciones o de la próxima manifestación na qu’hai que “marcar paquete” (sic). Otra manera, nun creo que la reproducción d’estes actitúes correspuendan a que nestes organizaciones heba falta de democracia intencionada per se, sinón más bien a un déficit d’atención, formación y organización interna que nun convida a la militancia a participar activamente, a considerar les organizaciones como daqué propio y a querer ver el so pensamientu espeyáu nelles.

Por un soberanismu d’esquierda participativu y pola recuperación de les ferramientes democrátiques populares: el Conceyu Abiertu frente a la militancia pinza-despinza.

Nun ye ético, nin moralmente aceptable, nin muncho menos práutico que queramos aspirar a rexenerar democráticamente Asturies si nós mesmos nun furrulamos participativa y democráticamente. Eso ye una realidá como un castillete de mina.

Hai que replantegáse claramente qué tipu d’organizaciones queremos y cuáles hemos refugar, lo mesmo que falamos de “tresnar esti réxime pa convertilu nuna Asturies rexenerada”.

Hai que sacar tarxeta encarnada a les actitúes que desmovilicen y que xeneren militantes pasivos pinza-pancarta-qu’entama-la-mani / despinza-que-recoyemos-y-colamos pa tener la capacidá de que non sólo afiliaos/es, sinon tolos/es simpatizantes, seyan a reproducir de manera clara y convencida un mesmu discursu social, ambiental, identitariu, d’igualdá…fuxendo d’actitúes doctrinaries pero tamién de la desideoloxización de los individuos.

Y yá ta bien d’amagüestos previos que valen pa qu’unos pocos pauten y decidan demientres otros poquitinos más queden a la espectativa de qué va ser del so destín militante y ónde van tener que ponese de moñecu pa garrar bandera y/o pancarta na próxima ocasión, xenerando un desfase ente militantes y perdiendo maletes nel viaxe.

Y yá valió, tamién, de plantegamientos del tipu “esto vamos falalo enantes los mayores y dempués yá-yos lo presentamos a los nenos del partíu y, quiciabis a 24 hores del gran actu o de les eleiciones, a los movimientos sociales y/o independientes pa que, a les carreres, firmen manifiestos d’autoflaxelación”.

Faigamos un llamáu a Conceyu Abiertu. Que naide s’engañe, ye posible si naide fai por colgar del pescuezu la medayina de la “iniciativa”, anque esto nun quita pa qu’estos seyan formales, organizaos o operativos, onde tolos/es que quieran puean espresase. Faigámoslo entamando estos espacios d’alderique, por ciertu, con bien d’años per delantre, non a tou trapu 15 díes enantes de meter les llistes, y empobinémoslo más qu’al ermu electoral, al trabayu de concenciación previu y militante del día a día.

¿Cómo -si nun lo facemos asina, en casa-, vamos falar de caxigalines d’ultramegamínimos/valenos de conceutos como “presupuestos participativos”, “democracia participativa”, “ilusión”, “anovamientu”, “rexeneración” o “nuevo”?

Construyir la democracia entama per nós mesmos. Tamos a tiempu d’iguar munchísimes coses trabayando n’andecha, hasta pa estes eleiciones si se quier. Pasín ente pasu, con bona lletra y ensin precipitase, conociéndonos toos de verdá -non de lo que me cuntaron que-y dixeron l’otru día-…

Asturianes/os xuntes/os, organizaes/os, allegres, con ganes de da-y otra traza al nuesu requexu del planeta…y p’alantre!

La xuntura estratéxica de la esquierda soberanista, enriba la mesa.

Espublizáu'l 23 de Payares de 2010 por Llar -> 867 km na categoría Analís políticu

Les coses avanzaron bien poco dende qu’escribiere un articulín perequí nel qu’opinaba so l’espectru políticu de la esquierda soberanista/independentista/nacionalista asturiana anguaño. Básicamente, les novedaes cuéntense colos deos d’una mano de Tortugu Ninja:

Ún) Cásique nun tornó a orpinar na capital del reinu Zirí. (ver entamu del artículu citáu)

Dos) Valledor faló nos medios y dexó nidio que si quier que lu escueyan los/es afiliaos/es como candidatu y dempués ganar la confianza del movimientín ha tener que depurar muncho les sos apreciaciones al rodiu de lo que ye Asturies, la dimensión y definición nacional del proyeutu políticu, los sos oxetivos a curtiu, mediu y llargu plazu y la so rellación colos sos antiguos compañeros/es de partíu. Quedé un poco asustáu coles sos rempuestes.

Trés) Tamién tenemos nueves dende Andecha Astur, que yá yera hora. Nelles -de manera más bien poco trabayada- Mariu Arbesú amuesa la so disponibilidá (y entiendo que lo fai arriendes de resoluciones internes de los muérganos democráticos del so partíu) p’algamar alcuerdos inmediatos y vinculantes con Bloque por Asturies y Unidá Nacionalista Asturiana que, yá d’aquella, paecía que podíen tener bien amarráu’l so alcuerdu.

Namás dende la humildá pa col restu d’actores políticos sedremos quién a construyir y tresformar esti país

D’unos meses p’acó les rellaciones ente organizaciones del ámbetu nacionalista/soberanista/independentista d’esquierda pegaron un valtu. Les maquinaries d’intercomunicación ente les estremaes sensibilidaes d’esti espaciu a lo menos, llubricáronse y suavizáronse. Hebo hasta la posibilidá de facer un actu precariu -ye verdá- pero que, coles sos matizaciones, tuvo una componente unitaria.

A mi abúltame de caxón l’atalantar esti como’l momentu de dexar atrás les rocées históriques y ponese a la xera. Atención, falo de rocées personales, vieyes zunes y percepciones -de xuru más consecuencia de la falta de contautu que d’otro- qu’unos/es tuvimos pa colos/es otros/es y al revés, non de diferencies polítiques imposibles de reblagar/consensuar nun programa y una llínia estratéxica si queremos da-y otra traza a Asturies y facelo cola remanando’l cazu cola manzorga.

Lo mesmo qu’hai unos años -y voi dicilo de mou crudu y sinceru- consideraba (y sigo analizándolo de la mesma manera) como una verdadera sumisión al lliberalismu españolista del PSOE la postura de Valledor y del Bloque por Asturies, anguaño nun pueo otro qu’albidrar que coles sos trayeutories últimes xeneren la posibilidá de que güei munchos/es suañemos cola oportunidá d’articular un movimientu d’emancipación nacional y social de puxu y alternativu.

Al tiempu, siempre me paeció difícil d’entender l’estilu o la traza qu’Andecha Astur tuvo siempre pa trabayar a comuña con otros coleutivos, persones y partíos, con actitúes suicides/autodestructives que quiciabis namás se podíen entender tando dientro de la organización, cosa qu’agora nun m’impide creyer de manera firme que la so presencia nun proyeutu unitariu non sólo ye importante sinón imprescindible pol so bagaxe ideolóxicu y pol so trabayu militante, dambes al mesmu altor.

D’otra banda, anque m’abultaren munchos los errores de precipitación, improvisación, fuxida haza alantre y falta de valentía de la xente d’Izquierda Asturiana y/o Unidá Nacionalista Asturiana pondría la mano nel fueu pol so altor políticu y pola so voluntá pa sumar y aidar a construyir un abellugu escontra la que ta cayendo nesta dictadura del capital que desanicia la nuesa cultura y sangra a los asturianos y asturianes.

Sicasí, y anque toos tenemos los nuesos errores y enquivocaciones polítiques y personales cróniques, tamos nun tiempu nuevu. Un tiempu nel que se siente un pálpitu -pero non del de Gallardón- qu’afala a animase a quien lu nota.

Tarxeta encarnada pa les actitúes destructives, pal posturéu, pa la esclusión d’actores políticos válidos y pa facer que tornen les griesques avezaes

Si de verdá se quier apostar por un movimientu de futuru, que llanque bien fondo los sos pegoyos, nun valen les torgues. Dende Andecha Astur nun se puede denomar como “maniobra de re-entrismu n’IU” los supuestos principios d’alcuerdu ente UNA-Bloque cola presencia de Valledor y menos dende afuera del procesu. Nun me valen les maniobres más bien primitives onde con artículos espublizaos nel micromundu virtual nacionalista/soberanista/independentista se pretende “aparentar” que se ta por una xuntura -esperemos que non- a la que yá quiciabis arrenunciaren. Ye esencial qu’Andecha Astur nun marée la comida y faiga un apueste sinceru pola negociación. Y cuando falo de negociación falo de nun imponer un modelu propiu, sinón de saber cuálu ye’l so papel y tar al altor de les circunstancies.

Otra manera, dende’l Bloque y UNA tán obligaos a ufrir un marcu dignu pa qu’Andecha Astur tea representada razonablemente nesi nuevu espaciu, onde pueda influyir y falar de tu a tu coles otres dos organizaciones. Nun valen “pre-alcuerdos” si se quier integrar a toles partes, custión básica pa qu’esti nun seya otru proyeutu qu’entame col pie malu. Dende estes dos formaciones han confiar per una vegada na voluntá d’Andecha Astur. Intentalo nun cuesta nada y el saltu cuantitativu y cualitativu sedría ablucante.

Pa finar, ye imprescindible que tolos partíos, una vegada afitaos los alcuerdos, qu’a mi paécenme entá posibles, nun dexen de llau a los movimientos sociales nesa construcción plural. Nesi intre han presentar el proyeutu políticu, han contrastar postures no que cinca a los programes d’acción política estratéxicos ya ideolóxicos y han pidir la collaboración a otres entidaes non electoralistes ensin mieu dalu, que neses condiciones van sofitar ensin resquiebres y sumar anque seya una migayina más.

Nun soi a imaxinar un momentu meyor, metanes d’esta crisis capitalista onde la UE va finar sacando tayada “rescatando” la economía estatal, cuando se ta falando de recortar los subsidios, pensiones y los sueldos mínimos, pa lluchar por una solución de clas pal pueblu asturianu. Defender los nuesos derechos sociales y la nuesa identidá ye too uno si queremos entamar a ser realmente llibres.

Tiempu al tiempu y colos güeyos nos actores políticos implicaos.

Siguimos tresmitiendo dende 866.9 km ≈ 867 km del mio Llar.

Mr. BrainWash, ¿otru xuegu mediáticu de Banksy?

Espublizáu'l 8 de Payares de 2010 por Llar -> 867 km na categoría Les mios caxigalines
Etiquetes:
Los comentarios tan zarraos en Mr. BrainWash, ¿otru xuegu mediáticu de Banksy?

Avisu: esti post dexa albintestate l’argumentu d’una película. Si nun quies que t’esgoncie l’argumentu de la mesma ¡¡cola de secute d’esti blog!! (abaxo hai un link pa descargala si te pruye)

Exit through the gift shop

Toi acabante de ver la nueva película del artista gráficu caleyeru y d’identidá real desconocida de Bristol Banksy . El llargometraxe ye más un documental qu’otra cosa y fala de la historia personal de Thierry Guetta, un rapaz francés que lleva viviendo na ciudá de Los Ánxeles dende hai una partida d’años y que tien la zuna de grabar perdayuri tolo que fai. D’esta miente, va dexando en casa milenta cintes almacenaes en caxes que munches vegaes nun tán siquiera etiquetaes más que per años.

De casualidá, entama a grabar a dellos de los meyores grafitteros del planeta, conoz a Shepard Failey (l’inventor del conceutu OBEY-André the Giant) o’l francés Space Invader y, a la fin, ye quién a grabar n’aición a Banksy demientres munches hores y nel so propiu estudiu priváu de trabayu. Cuando Banksy-y encamienta facer un documental col material grabáu en toos aquellos años Guetta enfráscase nel trabayu, pero’l resultáu ye una puxarra total, col nome “Life Remote Control”. Nesi intre, el grafitteru inglés queda col material audiovisual y anima a Guetta a que dea un bon reblagu y pase a facer “arte” al traviés de pintaes, stencils, grabaos…de temática pop mui del so estilu. El francés, bastante aventáu él, viende’l so negociu ya inviértelo too nún estudiu con una bayura de diseñadores trabayando pa él y entama una gran esposición que ye quién a desendolcar gloriosamente gracies a un par de frases de sofitu de dos de los meyores ximielgadores de concencies caleyeros (Banksy y Shepard) pa que la xente vaya al actu.

Resultáu: trunfu absolutu y Guetta ye quién a ganar más d’un millos de $ namás gracies a copiar idées d’artistes anteriores, ensin malpenes pasar pel filtru de calidá de les muries de les cais y, muncho menos, de la crítica. La frase de Banksy “esti mozu ye un auténticu fenómenu de la ñatura, un fénómenu, y nun lo digo de bon xacíu” espeya perfeutamente qué ye lo que quiero dicir.

El fenómenu Mr. BrainWash: performance del mundu del arte d’anguaño

Paez evidente qu’un xostrón como Guetta ye incapaz a facer y pensar toes eses obres de manera independiente y verdaderamente creativa. De fechu, cásique nun sal más que chiscando les obres con tintes/sprais, lo que-y da más puxu a esta teoría. La copia asemeyanza evidente ente les obres de “Mr.BrainWash” y Banksy o Shepard tamién lo dexaría bien a les clares, asina como la so “permisividá” como artistes -digo yo que daqué d’ego tendrán-.

Con esti montaxe, Banksy algamaría’l finxu d’amosar la mentira que constitúi anguaño’l mundu artísticu, onde cualesquier personaxe con un puquiñín de campaña mediática ye capaz a xubir el so caché a galmiaes, ensin control de calidá nengunu o hasta faciendo un fraude evidente. Banksy ye especialista nesti tipu de coses, como cuando foi quién a colase en museos d’USA pa escolingar les sos obres (con tarxeta y too) que pasaron como “una más” ente’l restu.

D’otra banda…Banksy y Shepard ¿vendíos o non?

Nun son poques les persones qu’acusen d’esta miente a estos dos artistes de renome mundial. El motivu de toes estes crítiques sobremanera ta venceyáu a que l’éxitu global de les sos obres llevólos a trabayar con multinacionales o hasta campañes polítiques, dexando’l mundu underground de la clandestinidá nocherniega xunto a los xirones y les plantiyes pa pasar a les galeríes d’arte y les cases de subastes. Tamién ye verdá que la so posición social valió-y pa facer aiciones político-culturales tan bones como la cover del entamu de Los Simpsons d’hai unes selmanes. otres escontra’l centru de tortura de Guantánamo en DisneyWorld, la construcción de la muria de la vergoña en Gaza, la guerra capitalista…

Con too y con ello, lo que ye innegable ye l’impactu planetariu de les sos obres, que xenera que toles miraes finen focalizaes nes sos obres dientro y fuera de les cais. Nun podemos dexar equí de sorrayar que dientro del activismu políticu asturianu, fondamente tradicional no que cinca a les formes y medios, campañes como la del 35 comparten la téunica del axit-prop viral al empar que lo fai Shepard con OBEY!. Agora mesmo alcuérdome de campañes d’Izquierda Asturiana y Mocedá d’Izquierda Asturiana con camisetes con imáxenes de Banksy o stencils en pasos de peatones y stickers en plásticu adhesivu. Tamién Fai! o l’Asamblea de la ReFLEXón apostaron y apuesten por propaganda de tipu “Guerrilla” que nunos casos salió meyor que n’otros, pero qu’amuesa que namás dende la imaxinación y una visión artística y orixinal de la realidá se ye quién a superar les torgues y pilancos que’l sistema pon pa que toles voces lleguen a toles y tolos ciudadanes y ciudadanos. Artivismu RULES.

Agora, si vos presta ver la película documental de Banksy pasái perequí. N’Ubuntu la esperiencia foi brutal: baxa los sotítulos automáticamente…¡coses del códigu llibre!

Y esto ye, too, pel momentu, dende 866.9 km ≈ 867 km del mio Llar.

Orbaya güei na patria del llatifundiu y eso ye de sorrayar. Lleo con interés les nueves que lleguen dende’l mio país. Nesti mes y picu nun dexé nin un día d’echar una güeyada pa la prensa asturianista y tamién pa los medios (ham)burgueses -lleelos ye tan malo pal organismu como la comida rápido-.

Sicasí, esta vegada les ñubes traen escenarios alternativos posibles p’Asturies. Tando como tábemos resignaos a tener otra nueche electoral cenciellamente putapénica quiero pensar que nesti 2011 puede haber un reblincu que, a lo menos, seya quién a preparar l’abordaxe con más garantíes de los nuesos oxetivos.

Nun voi escondelo: el meyor escenariu que personalmente podría suañar sedría’l d’un proyeutu común de tola esquierda soberanista en camín de facese “esquierda nacional”. Falo d’una superación de les rocées y desconfiances mútues qu’incapaciten los debates abiertos “ensin intermediarios” y d’una vuelta a les cais y movilizaciones de base, mirando más pal trabayu factible a curtiu plazu qu’otra cosa.

Pero, ¿quién ye y qué quier esa esquierda soberanista?

De primeres, resulta cenciello poder facer un averamientu y siñalar a les organizaciones, esto ye, per orde alfabéticu: partíos (Andecha Astur, Bloque por Asturies y Unidá Nacionalista Asturiana), organizaciones sociales y de mocedá (Darréu, Fai!, Sofitu y UNA Mocedá) xunto con otres que, anque nun seyan polítiques, sí tán na órbita direuta del mesmu espaciu. A un/a llector/a aniciáu/ada tampoco-y habría que desplicar que les persones que comparten grosso modo esi discursu tán mayoritariamente al marxe d’eses organizaciones.

D’otra banda, nun ye fácil facer un analís absolutu de qué intereses persiguen eses organizaciones porque na inmensa mayoría de les ocasiones les formaciones y coleutivos refuguen el debate y estos apárquense pa facer coses más importantes o, cenciellamente, porque nun hai capacidá organizativa. Por ciertu, abúltame increyible, a estes altures, qu’un movimientín que tien capacidá pa facer bones actividaes a lo llargo l’añu per separtao nun seyamos quién a tener espacios físicos propios nos qu’expresar les nueses postures. Falo de centros sociales, falo d’un sitiu onde tener panfletos, periódicos, música, propaganda de toa triba, banderes, camisetes, pegatines, onde topar a xente que comparte’l mesmu nichu ideolóxicu, onde poder facer charres, onde fomentar l’entendimientu y la confrontación d’idées, al que convidar a cualesquier persona interesada na defensa activa del país…y nel qu’ún nun tea qu’andar de puntiyes por ser soberanista/nacionalista/independentista.

Tornando al matu, como oxetivu a curtiu plazu yo conformábame con que s’estrencharen les rellaciones ellectorales, que se ficieren actos conxuntos con respetu y nos que too tea apautao. Y cuando falo d’apautao falo de que naide faiga por llevar la voz puxante pa presentáse supuestamente como’l suxetu arrogante qu’arrenuncia a too pol bien común. Non, por favor, les coses clares y cada comunicáu que s’asoleye pa falar de les actividaes comunes que seya bien peñeráu en casa, intentando que nun dinamite’l conxuntu del procesu y evitando l’enésimu espolín nos foros de webs con 30 llectores diarios que calquen muncho efe cinco.

Reblagar penriba’l pasáu

Fáise abegoso pensar na llealtá ente persones d’organizaciones con griesques intestines dempués de munchos años. Ye cierto. Históricamente tolos y toles que trabayamos dacuando nesti mundín punximos con más o menos recurrencia a cayer d’una burra les decisiones d’organizaciones propies o ayenes. Pero esti enguedeyu tien igua y toi convencíu d’ello: al traviés del debate puramente políticu, que ye’l que murniamente enxamás se da, somorguiáu en coses más relevantes como’l lema d’una movilización o con victories pírriques nos xulgaos dando y quitando carnés de militancia ente compañeros/es.

Sentáse, proponer un programa políticu de mínimos y de praxis reales (y cuando falo de reales nun digo moderaes, sinón tolo contrario, de decisiones d’aplicación inmediata) de gobiernu nel que toles organizaciones y persones de la esquierda soberanista tean(amos) razonablemente representaos/es y p’alantre. Sé daveres que nun ye tan difícil, pero dalgunos tamos fartucos de votar a organizaciones que, nel casu de qu’algamaren daqué responsabilidá de serviciu al pueblu, tendríen que replantegase mui seriamente per ónde tienen qu’entamar porque, de fecho, esi debate ideolóxicu nin existe, nin ye problemáticu cuando s’aborda de la manera afayadiza.

Los de l’acera, pa la carretera

Teniendo pa nós que’l xuegu parademocráticu ta a la nuesa escontra (pocos recursos económicos, silenciamientu y manipulación mediática) y que la esquierda soberanista aspira a daqué más qu’a ocupar les vieyes poltrones del réxime PP-FSA-IU pa caltener el statu quo, ye obligación del movimientu’l tar a pie de cai, defendiendo les nueses demandes y dexándonos ver personal y coleutivamente en tolos temes. Al fin y al cabu, dende’l nacionalismu/soberanismu/independentismu d’esquierda nun podemos escaecer que lo que s’ha aportar ye una solución a los problemes que carez Asturies. Sofitar a los movimientos sociales (y falo de sofitar, non d’instrumentalizar o querer controlar) con honestidá ye un pegollu imprescindible. Nun arrenunciar enxamás, por munchu éxitu políticu que se pudiere llegar a tener, a tar con toes y caúna de les lluches de base ye obligatorio. Nun usar les cais tanto como sitiu onde vender una marca, custión secundaria ya indireuta, sinón como fervideru d’idées y de contautu direutu cola xente que tien una concencia yá formao p’amosa-yos que les sos demandes van ser defendíes como propies dende la esquierda soberanista y, al tiempu, p’arriquecer les nueses bases ideolóxiques.

Si nun somos a convencer a la xente que yá ta movilizao…¿cómo vamos acceder a potenciales simpatizantes del soberanismu d’esquierda que tean en posiciones muncho más pasives? Si dexamos de tar cola xente de la cai…¿d’au garramos el termómetru pa pulsar la sensación que na xente ta xenerando l’actividá política de la esquierda soberanista?

Eleiciones y candidatos

Por mor de la deficiente organización interna d’esti movimientu adolecemos d’una cierta mitificación del conceutu de “candidatu” que ye dafechu irrelevante n’espacios non tan llonxanos xeográfica ya ideolóxicamente. Lo importante d’un candidatu/a, (teniendo pa nós que les eleiciones son otru -que non l’únicu nin tampoco’l más importante- frente de llucha más), ye, lo primero, que quiera selo, y que seya quién a tresmitir, nel xacíu más averáu a les ciencies físiques del términu, los determinos internos y democráticos de la militancia.

¿Que si me paez bien Valledor? Bono, ye una entruga vacia de conteníu ensin nada detrás. ¿Cómo y con quién? ¿Pa qué? Si Valledor almitiere matase a defender un programa políticu y un marcu estratéxicu non sumisu no nacional y no social al réxime corruptu español n’Asturies entós podría llegar a ser un bon activu -nun sé si candidatu-, anque diba tener entá que lo trabayar muncho de manera esterna y pa los sectores más averaos. Nun ayuda la so desafortunada entrevista nun mediu asturianista y les sos percepciones sobre si Asturies ye o non “una nación”. Eso sí, lo que nun se debe  ye puxar por un candidatu encaxáu a emburriones y qu’obligue a modelar el discursu a la so figura. Ye dicir, una persona nun puede condicionar por munchu tirón mediáticu que tea un determín democráticu internu. Sedría la perversión del proyeutu y de la voluntá de la xente que da’l callu día a día y dexa les sos perres nello. Sicasí, Valledor aparte, esisten figures mediátiques bien conocíes fuera’l ghettu con un compromisu verificable que bien podíen desendolcar esi llabor que, por sigo mesmu, tampoco ye tan determinante si lo demás se fai bien.

Primeres encuestes, los mesmos errores

Anque dende les últimes eleiciones nacionales yá se vien falando d’ello, topámonos a menos de mediu añu pa qu’entame la campaña electoral ya inda nun hai muncho en claro. Paez que les coses ente Bloque por Asturies y Unidá Nacionalista Asturiana van p’alantre ya intúise un ciertu parón na postura d’Andecha Astur. Sicasí, teo confianza en que la militancia d’Andecha, mui anovada y que yá vivió de recién esperiencies de movilizaciones unitaries trabayando en comuña con xente de la redolada ideolóxica, seya quién a axuntase al barcu. La so presencia non sólo ye importante pola capacidá organizativa y militante, sinon inda más pol bagaxe ideolóxicu históricu que puede llevar tres de sí.

Con too y con ello, como siempre les eleiciones gárrennos col pasu cambiáu. Demientres toi escribiendo estos camientos, El Comercio yá asoleyó ún de los primeros estudios de sondéu onde’l rexonalismu de derecha sal pero la esquierda soberanista nun apaez. Nun apaez, y d’eso toi convencíu, porque nun tien nin marca nin cares visibles entá. Y quien llega tarde a la folixa nun-y queda nin el postre.

En fin, esto ye too pel momentu. Habrá que siguir mui sollertes a los nomes y persones que van saliendo y a los posicionamientos d’estes organizaciones. Eso sí, nun hai tiempu que perder si lo que se pretende ye pegar un reblagu y da-y la vuelta al país. Entamar a buscar el sofitu ente organizaciones y persones d’esti mundín ye importantísimo, ensin despreciar nin una sola blima por feble que paeza. A lo cabero, un cestu mal fechu pierde la semiente bien ceo.

Un saludu al planeta dende 866.9 km ≈ 867 km del mio Llar.

¡Hola Mundu!

Espublizáu'l 20 d'Ochobre de 2010 por Llar -> 867 km na categoría Les mios caxigalines

Calco les mios primeres tecles nesti requexu dende un ordenador vieyu.Tendrá al rodiu de 10 años, la pantalla ye más alta que nes d’anguaño -panorámiques- y la batería nun emburria’l ventilador más d’unos 34 minutos ensin cebalu.

Esti equipu nun ye nuevu, anque albidro que toi más averáu a triplicá-y la edá qu’a doblá-yla. O ehí ehí andamos. Nun nos pidáis muncho.

El probe tampoco ye que tea munchu “pedigrí“, hasta hai unos díes yera cásique tan dueñu de Bill Gates como míu, anque agora, yá llibre, ye quién a escribir con gayola’l topónimu d’un prau del mio güelu -“El Cuguḷḷón“-. Prestaríame cuntá-y a él tol simbolismu que tien esta caxigalina pa un idioma como’l nuesu pero de xuru que diba quedar de fatu. Y con razón.

Gatúño-y les pegatines que tien embaxo’l tecláu col pocu procuru que se tien pa lo que yá nun ye nuevo pero inda tampoco venerable. Paradóxicamente, la de güindous, ye la que más resistencia opón, pero fina desapegada como toles demás.

Nun sé a qué me va llevar esti requexu. Sé que voi facer d’elli, si nun queda albortáu pel camín, un diariu de la mio estancia y los mios camientos nesta tierra tan alloñada cultural y xeográficamente del mio país. Coses que me choquen -d’equí y d’allá- y que me presten (esperemos qu’estes seyan les más) van ser temátiques avezaes.

Y, a la fin, ser quién a depositar un granín más de sable nesa cuenca sedimentaria endorreica que ye la mio llingua.

Un saludu al planeta dende 866.9 km ≈ 867 km del mio Llar.